မဲခေါင်၊ ဖေဖော်ဝါရီ ၂၀
ရှမ်းပြည်တောင်ပိုင်း၊ တောင်ကြီးမြို့ပေါ်ရှိ ဘောလုံးကွင်းမှ ဆိုင်နှင့် လူနေတိုက်ခန်းများကို မီးပုံးပျံကွင်းနား၊ ညိုမီးရပ် ကားကြီးဝင်းနှင့် အေးသာယာမြို့၊ မင်းကျန်စစ်အိမ်ရာများသို့ ပြောင်းရွှေ့ရမည်ဖြစ်ကြောင်း သိရသည်။
စားသောက်ဆိုင်များကို မီးပုံပျံကွင်းနှင့် တက္ကသိုလ် အိမ်ရာကြား၊ ကားပစ္စည်းဆိုင်များကို တည်ဆောက်ဆဲ ညိုမီးဘက်မှ ကားကြီးဝင်းနှင့် အား/ကာ လူနေတိုက်ခန်းများကို အေးသာယာရှိ မင်းကျန်စစ်အိမ်ရာသို့ ပြောင်းရွှေ့ချထားပေးမည်ဖြစ်ကြောင်း သိရသည်။
“ဆောက်နေတဲ့ ကုန်ကားရပ်နားစခန်း အသစ်က ဟိုပုံးကရော ညိုမီးကရော လမ်းခွဆုံနေရာ၊ ၂ ထပ် ဆောက်ပေးမယ်ပြောတယ်။ အနည်းဆုံး ၃ နှစ်ကြာမှာဆိုတော့ ပြီးရင်လည်း သွားလာရေးက မလွယ်တော့ဘူး၊ ကုန်ကျခ ဘယ်လောက်ရှိမလဲလည်း မသိရသေးဘူး။ အလုပ် မဖြစ်တော့ပါဘူး” ဟု ကားပစ္စည်း ဆိုင်ရှင်တစ်ဦးက ပြောသည်။
လက်ရှိ ဘောလုံးကွင်း မြောက်ဘက်နှင့် အနောက်ဘက်တွင်ကား ပစ္စည်းဆိုင် ၁၀၀ ကျော်ရှိပြီး မြောက်ဘက်တွင် စားသောက်ဆိုင်များရှိရာ စုစုပေါင်း ပြောင်းရွှေ့ရမည့်ဆိုင် ၁၆၃ ဆိုင်ရှိကြောင်း သိရသည်။
“ဆိုင်က ခုငှားရမ်းခက သောင်းလောက်ပဲရှိတာ၊ မီးပုံပျံဘက်ဆို စည်ပင်က ဆောက်ပေးမယ် ဆိုပေမယ့် ခေတ်အရတော့ ငှားခ သိန်းချီပေးရတော့မယ်”ဟု စား သောက်ဆိုင်ရှင်တစ်ဦးက ပြော သည်။
အား/ကာ လူနေတိုက်ခန်း ၆၃ ခန်းမှာမူ အငှားဆိုင်ခန်းများနှင့် သဘောသဘာဝ မတူဘဲ အပျောက်ပိုင်ဆိုင်ခွင့်ကို မြေညီထပ် ကျပ် ၂၅ သိန်း၊ ပထမထပ် သိန်း ၂၀ နှင့် ဒုတိယထပ် ၁၅ သိန်းဖြင့် လစဥ် ပေးသွင်းဝယ်ယူထားခဲ့ရခြင်း ဖြစ်ပြီး လက်ရှိတွင် တောင်ကြီးမြို့ပေါ် မဟုတ်ဘဲ အေးသာယာသို့ အဓမ္မ ပြောင်းရွှေ့ချထားခံရမှုမှာ တရားမျှတမှု မရှိဟု တိုက်ခန်းပိုင်ရှင်များက ဆိုသည်။
“ကလေးတွေ ကျောင်းနေတာကအစ လူမှုဘဝ အကုန်လုံး အဆင်မပြေဘူး။ ပြီးတော့ မင်းကျန်စစ် တိုက်ခန်းတွေ အများစုက ငလျင်ဒဏ်ကြောင့် အက်ကွဲရာတွေနဲ့” ဟု ပိုင်ရှင်တစ်ဦးက ပြောသည်။
တိုက်ခန်းများကို မယူပါက ကျပ်သိန်း ၅၀ သွင်း ၍ ယင်းနေရာရှိ မြေတစ်ကွက်ရယူနိုင်ကြောင်းပြောသော်လည်း ပင်စင်စားများဖြစ်၍ အဆင်မပြေဟု ဆိုကြသည်။
လက်ရှိ ဆိုင်ခန်းနှင့် တိုက်ခန်းများကို ပြောင်းရွှေ့ပေးရန် စည်ပင်မှ တတိယအကြိမ် စာထုတ်ထားပြီး ယခု Grade 12 စာမေးပွဲအပြီးတွင် အပြီးပြောင်းရွှေ့ရမည် ဖြစ်သည်ဟု စည်ပင်ကပြောထားကြောင်း သိရသည်။
City Smart စီမံကိန်းပါ ထီဖောင်းဘက်မှ ဂေါက်ကွင်း တည်ဆောက်နေမှုမှာလည်း ၁၈ ကျင်းအနက် ၉ ကျင်း ပြီးစီးလုဖြစ်ပြီး ၁၈ ကျင်းပြီးပါက အေးသာယာဂေါက်ကွင်းကဲ့သို့ နိုင်ငံတကာပွဲများ ပြုလုပ်သွားမည်ဖြစ်ကြောင်း သိရသည်။
တောင်ကြီး ဘောလုံးကွင်းကို ဖျက်၍ နိုင်ငံတကာအဆင့်မီ ဘောလုံးကွင်းနှင့် လူငယ်အားကစားစင်တာ ဆောက်လုပ်သွားမည်ဖြစ်ကြောင်း စစ်ကောင်စီ အုပ်ချုပ်ရေးအဖွဲ့က ကြေညာထားသည်။
#MeKongNews
#တောင်ကြီး
#ဘောလုံးကွင်း
#ဆိုင်
#တိုက်ခန်း
