မဲခေါင်၊ ဇူလိုင် ၁၂
ရှမ်းပြည်နယ်၊ တာချီလိတ်ခရိုင်၊ တာလေမြို့၊ ရန်အောင်ရပ်ကွက်နေ အမျိုးသမီးတစ်ဦးဟာ တရုတ်လူမျိုးတွေဆီမှာ ယွမ်ငွေ ၆ သောင်း( မြန်မာငွေ သိန်း ၂၆၀ ခန့်) နဲ့ ရောင်းစားခံလိုက်ရပါတယ်။
အာခါတိုင်းရင်းသူ အသက် ၂၈ နှစ်အရွယ် အမျိုးသမီးဟာ အွန်လိုင်းအလုပ်ခေါ်စာကနေတဆင့် အလုပ်လျှောက်မိတာကြောင့် တရုတ်နယ်စပ်မှာ ရောင်းစားခံခဲ့ရတာဖြစ်ပြီး လက်ရှိမှာတော့ တရုတ်ရဲတွေရဲ့ အကူအညီကိုရထားပေမယ့် အိမ်ပြန်ဖို့တော့ အခက်တွေ့နေသူ တစ်ဦးဖြစ်ပါတယ်။
သမီးနှစ်ယောက်မိခင်ဖြစ်နေတဲ့ ရောင်းစားခံရသူဟာ သမီးတွေကိုကျောင်းထားဖို့အတွက် အလုပ်မရှိတာကြောင့် တာချီလိတ်အလုပ်အကိုင်ရှာဖွေရေး ဖေ့ဘုတ်လူမှုကွန်ရက်အဖွဲ့တစ်ခုမှာ လားဟူအမျိုးသမီးတစ်ဦးခေါ်ထားတဲ့ အလုပ်ကိုလျှောက်မိရာက အခုနှစ် မေလ ၂၄ ရက်မှာ အကောင့်ပိုင်ရှင် ပွဲစားအမျိုးသမီး မအဲလေနဲ့ ချိတ်ဆက်မိခဲ့တာပါ။
ပွဲစားအမျိုးသမီးက အလုပ်လုပ်မယ့်သူအနေနဲ့ တရုတ်စကားတတ်ပြီး တရုတ်ထမင်းဟင်းချက်တတ်ရင် “ဝ”ဒေသဖြစ်တဲ့ မိုင်းပေါက်မြို့မှာ အလုပ်ရမယ်ဆိုကာ အခုနှစ် မေလ ၂၅ ရက်နေ့မှာ ရောင်းစားခံရသူအမျိုးသမီးရဲ့ အိမ်အထိ လာရောက်ခေါ်ဆောင်သွားခဲ့တာလို့သိရပါတယ်။
“သူလာခေါ်တော့ ဆိုင်ကယ်နဲ့ ကျိုင်းတုံကနေလာတယ်လို့ပြောတယ်ရှင့်။ အဲ့ဒီအချိန်မှာ ကျွန်မက သူ့ရဲ့ မှတ်ပုံတင်တောင်းလိုက်ပြီးတော့ ဓာတ်ပုံရိုက်ယူခဲ့တယ်။ ပြီးတော့ သူတို့အိမ်မှာပဲထိုင်ပြီးစကားပြောကြပြီး ခေါ်သွားတယ်။ ၂၅ ရက်ညတော့ ကျိုင်းတုံကဟိုတယ်မှာတည်းတယ်။ အဲ့ဒီ ရောက်တော့မိုးမချုပ်သေးတာနဲ့ ခေါ်လည်သေးတယ်” လို့ ရောင်းစားခံရတဲ့ အမျိုးသမီးရဲ့ ဆွေမျိုးနီးစပ်သူတစ်ဦးက မဲခေါင်သတင်းကိုပြောပြပါတယ်။
ရောင်းစားခံရသူကို အလုပ်ခေါ်ပွဲစား မအဲလေနဲ့ အပေါင်းအပါ မမွန်ကျောက်၊ ကိုအားဆော့တို့ကနေတဆင့် မိုင်းပေါက်မှာ နောက်ထပ်ပွဲစားတစ်ဦးဆီ လက်ဆင့်ကမ်းထည့်ပေးခဲ့ပြီး အဲ့ဒီကနေတဆင့် စုစုပေါင်း ပွဲစားအဆင့်ဆင့် (၆) ဦးထိ လွှဲပြောင်းခံခဲ့ရတယ်လို့ သိရပါတယ်။
တရုတ်နိုင်ငံထဲက ပွဲစား (၅) ဦးမြောက်ဆီရောက်တဲ့အချိန်မှာမှ ပွဲစား မအဲလေက တရုတ်ယွမ်ငွေ ခြောက်သောင်းနဲ့ ရောင်းသွားတာကို ပွဲစားကနေတဆင့်သိခဲ့ရတယ်လို့ ရောင်းစားခံရသူအမျိုးသမီးကပြောပြပါတယ်။
“အစ်မအတွက်က သုံးသောင်း။ လမ်းစရိတ်က သုံးသောင်း အကုန်လုံးခြောက်သောင်းလို့ပြောတယ်။ ရောင်းစားခံရတဲ့အချိန်မှာ သူတို့စကားပြောင်းသွားတယ်။ တရုတ်မယားလုပ်ရမယ်ပေါ့။ တရုတ်မယားလုပ်ရင် ငွေတွေအများကြီးရမယ်ပေါ့။ အဲ့လိုမျိုးပြောပြီးတော့ ရောင်းလိုက်တယ်။ သူတို့ပိုက်ဆံပေးလိုက်တဲ့ အချိန်မှာလည်း အစ်မက မမြင်ရဘူး” လို့ သူမက ဆိုပါတယ်။
ပွဲစား (၅) ယောက်မြောက် အိမ်မှာပဲ မိမိရဲ့ အိမ်ကိုအဆက်အသွယ်လုပ်ချင်တာကြောင့် အိမ်ရှင်ကိုခွင့်တောင်းပြီး wifi အသုံးပြုကာ ညီမလေးကို ဆက်သွယ်ပြောဆို အကူအညီတောင်းနိုင်ခဲ့တယ်လို့ သူမက ဆက်ပြောပြပါတယ်။
ရောင်းစားခံရသူရဲ့ ညီမဖြစ်သူဟာ လူကုန်ကူးမှုတားဆီးနှိမ်နင်းရေးရုံးကိုသွားရောက်ကာ အမှုဖွင့်တိုင်တန်းခဲ့ပြီး အဲ့ဒီရုံးကနေတဆင့် တရုတ်ပြည်ရဲတွေကို အဆင့်ဆင့်ချိတ်ဆက်ထားခဲ့တယ်လို့ သိရပါတယ်။
အမှုဖွင့်တိုင်တန်းပြီး တစ်ပတ်ခန့်အကြာမှာ အစ်မဖြစ်သူဆီကနေ တရုတ်ပြည်မကြီးဆီကို အပို့ခံရတော့မယ်လို့ ငိုပြီးပြောဆိုလာတာကြောင့် ရုံးကိုထပ်စောင့်မနေတော့ဘဲ မိုင်းဖြတ်မှာရှိတဲ့ လက်နက်ကိုင် ပြည်သူ့စစ်ခေါင်းဆောင်တစ်ဦးကို အကူအညီလှမ်းတောင်းခဲ့ရာ အဆိုပါ ပြည်သူ့စစ်ခေါင်းဆောင်က အစ်မဖြစ်သူရောက်နေတဲ့မြို့က တရုတ်ပြည်ရဲတွေဆီကို we chat နဲ့ ဆက်သွယ်ပေးခဲ့တယ်လို့ သိရပါတယ်။
“ကျွန်မတို့ အဲ့ဒီလက်နက်ကိုင် ပြည်သူ့စစ်ခေါင်းဆောင်ဆီရောက်တာ ည ကိုးနာရီခွဲလောက်မှ ရောက်သွားတာ။ ည ၁၁ နာရီခွဲကျတော့ အစ်မကို တရုတ်ရဲတွေက သွားပြီးကယ်ထုတ်လိုက်တယ်ရှင့်” လို့ ရောင်းစားခံရသူရဲ့ ညီမဖြစ်သူက ပြောပြပါတယ်။
ညီမဖြစ်သူရဲ့ ချိတ်ဆက်အကူအညီတောင်းခံမှုကြောင့် သူမရောက်ရှိနေတဲ့ဒေသက တရုတ်အစိုးရရဲတွေနဲ့ချိတ်ဆက်မိခဲ့ပြီး ပွဲစား (၆) ဦးမြောက်ဆီအရောက်မှာ အဆင့်ဆင့်ရောင်းစားသူတွေလက်ကနေ လွတ်မြောက်လာခဲ့တယ်လို့သိရပါတယ်။
အစ်မဖြစ်သူနဲ့အတူတူတွေ့ရတဲ့ ၆ ဦးမြောက်ပွဲစားကိုတော့ တရုတ်ရဲတွေက လက်ထိပ်နဲ့ဖမ်းဆီးခေါ်ဆောင်သွားခဲ့တယ်လို့ သိရပါတယ်။
လက်ရှိအချိန်မှာတော့ ရောင်းစားခံရသူဟာ တရုတ်ရဲတွေရဲ့အကူအညီနဲ့ လန်းချားမြို့က တရုတ်သူဌေးတစ်ယောက်ရဲ့အိမ်မှာ အိမ်သန့်ရှင်းရေးနဲ့ ကားရေဆေးတဲ့ အလုပ်တွေကိုကူညီလုပ်ကိုင်ပေးရင်း နေထိုင်နေရတာဖြစ်ပါတယ်။
အဆိုပါ တရုတ်သူဌေးအိမ်မှာ အခကြေးငွေမရဘဲ နေရတာဖြစ်ပြီး သူဌေးလင်မယားခရီးသွားချိန်မှာ သူဌေးရဲ့ သမီးနဲ့ အမေက ဆဲဆိုကြိမ်းမောင်းတာ၊ တရုတ်ရဲဆီပြန်ပို့မယ်လို့ပြောတာတွေလုပ်ခဲ့တယ်လို့လည်း သိရပါတယ်။
“ရဲတွေလာတာတော့ ပြန်မပို့ဘူး၊ ဒီမှာပဲ ကောင်းကောင်းမွန်မွန်ဆက်နေလို့ပဲပြောခဲ့တယ်။ သူတို့ထက်ကြီးတဲ့လူ ရှိသေးလို့ စာတွေဘာတွေရေးတင်ရဦးမှာ အဲ့လိုမျိုးပြောတယ်။ ဘယ်လောက်ကြာမယ်ဆိုတာလည်းမပြောဘူး။ အနည်းဆုံး တစ်လကျော်ကျော် နှစ်လလောက်ဆက်နေရမယ့် ပုံပေါက်နေတယ်။ ပြန်ပို့မယ့်အချိန်ရောက်ရင်တော့ ပြန်လာခေါ်မယ်ပြောတယ်” လို့ ရောင်းစားခံရသူအမျိုးသမီးက ဆိုပါတယ်။
အွန်လိုင်းကနေအလုပ်ခေါ်ပြီး လူကုန်ကူးခဲ့တဲ့ ပွဲစား မအဲလေ ကိုတော့ လက်ရှိကျိုင်းတုံရဲစခန်းမှာ သူမရဲ့ အပေါင်းအပါ မမွန်ကျောက်နဲ့အတူ ဖမ်းဆီးထိန်းသိမ်းထားပြီး ကိုအားဆော့ကတော့ ထွက်ပြေးတိမ်းရှောင်နေဆဲလို့ သိရပါတယ်။
ရှမ်းပြည်နယ် အရှေ့ပိုင်းမှာရှိတဲ့ အမျိုးသမီးတွေဟာ အလုပ်အကိုင်ရှားပါးတာနဲ့ ပညာမတတ်တာတွေကြောင့် အလုပ်အကိုင်ရှာဖွေရင်း တရုတ်နိုင်ငံဘက်ကို လူကုန်ကူးရောင်းစားခံရလေ့ရှိပါတယ်။
ရှမ်းပြည်နယ်အရှေ့ပိုင်း၊ ကျိုင်းတုံမြို့ကနေ “ဝ”ဒေသ၊ မိုင်းပေါက်သို့ အလုပ်လုပ်ရန်သွားတဲ့ အသက် ၂၀ ကျော်အမျိုးသမီး ၂ ဦးထဲမှ အသက် ၂၄ နှစ်အရွယ် မဆမ်မောနီ ဆိုသူအမျိုးသမီးဟာလည်း ယခုနှစ် ဇူလိုင် ၈ ရက်နေ့တည်းက မိဘတွေနဲ့ အဆက်အသွယ်ပြတ်တောက် သွားခဲ့ပါတယ်။
အဆိုပါပျောက်ဆုံးသွားတဲ့ အမျိုးသမီးဟာလည်း မိုင်းပေါက်မြို့မှာရှိတဲ့ လောင်းကစားဂိမ်းခုံမှာ အလုပ်လုပ်ဖို့ အသိတွေက ခေါ်တဲ့အတွက် သွားရောက်ရာမှ ပျောက်ဆုံးနေခြင်း ဖြစ်ပါတယ်။
MK – 009
#MeKongNews
#တာလေမြို့ခံ
#တရုတ်ဇနီး
#မိုင်းပေါက်
#တာချီလိတ်