မဲခေါင်၊ အောက်တိုဘာ ၁၆
ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသမှာ အသံမိုင်းကွဲပြီးနောက် စစ်ကောင်စီ ဖမ်းဆီးခဲ့တဲ့ ဒေသခံ ၆ ဦးအနက် ၂ ဦးနဲ့ ဒီကနေ့အထိ အဆက်အသွယ် မရသေးဘူးလို့ ဒေသခံတွေက ပြောပါတယ်။
ပြီးခဲ့တဲ့ အောက်တိုဘာ ၁၂ ရက်နေ့၊ ည ၈ နာရီမှာ အင်းလေးဒေသ၊ ကံရွာမှာ စစ်ကောင်စီနဲ့ ပျူစောထီးတွေကို ဆက်ကြေးပေး ဖွင့်လှစ်ထားတဲ့ လောင်းကစားဝိုင်း အနီးမှာ အသံမိုင်း ပေါက်ကွဲခဲ့တာ ဖြစ်တယ်။
အဲ့ဒီ ပေါက်ကွဲမှု ဖြစ်ပြီးနောက် စစ်ကောင်စီက ဒေသခံ ၆ ဦးကို ဖမ်းဆီးခဲ့ရာ သန်းထောင်ဈေးတောင်ဘက်၊ ဓာတ်ဆီဆိုင်အနီးမှာ ဖမ်းဆီးခဲ့တဲ့ သပြေပင်ရွာသား ၄ ဦးကို အောက်တိုဘာ ၁၃ ရက်နေ့မှာ ပြန်လွှတ်ပေးခဲ့ ပါတယ်။
ဒါပေမယ့် အသံမိုင်း ပေါက်ကွဲမှု ဖြစ်ပွားခဲ့တဲ့ ကံရွာအနီးမှာရှိတဲ့ ပေါနော်ရွာသား ၂ ဦးကိုတော့ လက်ရှိအချိန်ထိ ပြန်မလွှတ်ပေးသလို ဘယ်နေရာမှာ ဖမ်းဆီးထားလဲ ဆိုတာ မသိရသေးဘူးလို့ ဒေသခံတွေက ပြောပါတယ်။
“သပြေပင်က ၄ ယောက်တော့ ပြန်လွတ်လာပြီ။ ပြန်လွတ်ဖို့ ပိုက်ဆံတော့ မပေးရဘူး။ ပေါနော် ၂ ယောက်တော့ အခုထိ အဆက်အသွယ် မရသေးဘူး။ လူငယ်တွေကို အကြောင်းအရင်း မရှိဘဲနဲ့ မိုင်းကွဲတာကြောင့် တွေ့ရာလူကို ဖမ်းနေတာ” လို့ အင်းလေး ဒေသခံ တစ်ဦးက ပြောပါတယ်။
မိုင်းပေါက်ကွဲတဲ့ညက ဒေသခံ ၆ ဦးကို ဖမ်းဆီးတဲ့ စစ်ကောင်စီတပ်ဖွဲ့ဟာ လမ်းပေါ်မှာ တွေ့သမျှ လူတွေကို တားဆီး စစ်ဆေးပြီး ငွေ ၂ သောင်းကနေ ၃ သောင်းအထိ တောင်းယူသွားတယ်လို့ ဒေသခံတွေက ဆိုပါတယ်။
လက်ရှိ ဖောင်တော်ဦး ဘုရားပွဲ ကာလ ဘုရားပွဲ လုံခြုံရေးဆိုကာ စစ်ကောင်စီတပ်ဖွဲ့၊ PNO ပြည်သူ့စစ်နဲ့ အင်းလေး ပျူစောထီးတွေ အင်အား တိုးမြှင့်ချထားသလို စစ်ဆေးရေးဂိတ်တွေမှာ တင်းတင်းကြပ်ကြပ် စစ်ဆေးနေတယ်လို့ ဒေသခံတွေက ပြောပါတယ်။
CJ-002
#MekongNews
#အင်းလေး
#အသံမိုင်း
#PNO_ပြည်သူ့စစ်
