မဲခေါင်၊ မတ် ၁၉
ထိုင်းနိုင်ငံမြောက်ပိုင်း၊ ချင်းမိုင်မြို့မှာ ၂ ရက်ကြာ ပြုလုပ်ခဲ့တဲ့ NCA အပစ်ရပ် ၇ ဖွဲ့ဟာ အဖွဲ့သစ်ဖြစ်တဲ့ (7 Ethnic Armed Organizations Alliance-7 EAO Alliance) ကို ဖွဲ့စည်းလိုက်တယ်လို့ ယင်းအဖွဲ့ရဲ့ မတ်လ ၁၈ ရက်စွဲနဲ့ထုတ်ပြန်စာအရ သိရပါတယ်။
ဒီအဖွဲ့သစ်ဟာ 7 NCA-S EAO ကို ပြန်လည်ဖွဲ့စည်းမှုဆိုင်ရာ ဖွဲ့စည်းပုံစည်းမျဉ်း (Regulation) တို့ကိုဆွေးနွေးခဲ့ပြီးနောက် ဖွဲ့စည်းခဲ့တာလို့ ထုတ်ပြန်စာမှာ ပါရှိပါတယ်။
ယင်းအဖွဲ့သစ်ဟာ မျှော်မှန်းချက်အဖြစ် ဖက်ဒရယ်ဒီမိုကရေစီ အသွင်ကူးပြောင်းရေး လုပ်ငန်းစဉ်ကတဆင့် ရေရှည်တည်တံ့ခိုင်မြဲတဲ့ ငြိမ်းချမ်းရေးတည်ဆောက်ရေး၊ အဖွဲ့သစ်ဟာ လူထုရဲ့သဘောထားတွေကိုဖော်ထုတ်တာ၊ အဖွဲ့အစည်းတွေအနေနဲ့ ပြည်သူလူထုကိုကာကွယ်ရန် တာဝန်ရှိမှုကို သိရှိစေဖို့ သက်ဆိုင်သူတွေအားလုံးနဲ့ နိုင်ငံရေးဆွေးနွေးပွဲတွေကို စဉ်ဆက်မပြတ် ကျင်းပသွားရေး၊ လက်ရှိပဋိပက္ခကိုဖြေရှင်းရာမှာ ငြိမ်းချမ်းစွာအဖြေရှာလိုတဲ့ အင်အားစုတွေရဲ့သဘောထားကို ဖော်ထုတ်နိုင်တဲ့ အခင်းအကျင်းနဲ့ နည်းလမ်းတွေကို ဖော်ဆောင်သွားမယ်ဆိုတဲ့ အချက်တွေပါဝင်ပါတယ်။
ယင်း7 EAO Alliance ရဲ့ ဦိးဆောင်အဖွဲ့မှာ အဖွဲ့ခေါင်းဆောင်အဖြစ် RCSS ဥက္ကဌ ဗိုလ်ချုပ်ကြီးရွက်ဆစ်နဲ့ ဒုတိယခေါင်းဆောင်အဖြစ် နိုင်အောင်မင်းတို့ ဦးဆောင်မယ်လို့ သိရပါတယ်။
ထို့အပြင် မျက်နှာစုံညီအစည်းအဝေးက ချမှတ်လိုက်တဲ့ လုပ်ငန်းစဉ်တွေကို စနစ်တကျ အကောင်အထည်ဖော်ဖို့အတွက် အတွင်းရေးမှူးအဖွဲ့ကို ဖွဲ့စည်းရာမှာ ဗိုလ်မှူးကြီး စိုင်းငင်း(အထွေထွေအတွင်းရေးမှူး)၊၊ ဗိုလ်မှူးကြီးစောကျော်ညွန့်(တွဲဘက်အတွင်းရေးမှူး)၊ နိုင်အောင်မငေး(အဖွဲ့ဝင်)၊ ဗိုလ်မှူးချုပ်စောစိန်ဝင်း(အဖွဲ့ဝင်)၊ ကျာယာကုပ်(အဖွဲ့ဝင်)၊ ဗိုလ်မှူးကြီး ခိုင်ကျော်လှိုင်(အဖွဲ့ဝင်) ၊ PNLO (အဖွဲ့ဝင်)၊ ဦးမျိုးဝင်း(Coordination) တို့ ၇ ဦးကို ယှဉ်တွဲပါ တာဝန်တွေနဲ့ ဖွဲ့စည်းတာဝန်ပေးအပ်လိုက်တယ်လို့ ပါရှိပါတယ်။
7 EAO Alliance အနေနဲ့ လက်ရှိ နိုင်ငံရေးအကြပ်အတည်းကို နိုင်ငံရေးနည်းလမ်းနဲ့ ဖြေရှင်းသွားမယ်လို့ ဖော်ပြပါရှိပါတယ်။
ယင်း အဖွဲ့သစ်ထဲက PNLO ရဲ့ အဓိက စစ်ရေးအင်အားစုတွေဟာ စစ်ကောင်စီကို တိုက်ခိုက်နေသလို မွန်ပြည်သစ်ပါတီကလည်း စစ်အာဏာရှင်တိုက်ဖျက်ရေး NMSP-AD အနေနဲ့ ခွဲကာ စစ်ကောင်စီကို တိုက်ခိုက်နေပြီဖြစ်တယ်လို့ သိရပါတယ်။
US Institute of Peace ရဲ့ ဆန်းစစ်ချက်တွေအရ PPST ၈ ဖွဲ့ရဲ့စစ်အင်အားအနေနဲ့ RCSS မှာ ၆၀၀၀ ၊ DKBA ၂၀၀၀ ၊ ABSDF ၁၅၀၀ ၊ PNLO ၁၅၀၀ ၊ NMSP ၁၅၀၀ ၊ KNU/KNLA-PC ၈၀၀ ၊ ALP/ANA ၃၀၀ နဲ့ LDU ၂၀၀ တို့ရှိတယ်လို့ သိရပါတယ်။
MK-012