မဲခေါင်၊ မေ ၃
ရှမ်းပြည်နယ် တောင်ပိုင်း၊ မိုင်းရှူးမြို့နယ်မှာ တည်ရှိတဲ့ အရှေ့တောင်အာရှရဲ့ အလှဆုံး ရေတံခွန်လို့ တင်စားကြတဲ့ ဟိုက်ပါ ရေတံခွန် အနီးမှာ စေတီ တည်မှုအပေါ် လူမှုကွန်ရက်မှာ ဝေဖန်မှုတွေ မြင့်တက်နေပေမဲ့ ဒေသခံတွေကတော့ ကန့်ကွက်တာ မရှိဘူးလို့ SSPP/SSA ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန် က မဲခေါင်သတင်းဌာနကို ပြောပါတယ်။
လူမှုကွန်ရက်မှာတော့ စေတီတည်တာဟာ ဟိုက်ပါ ရေတံခွန် အလှကို ဖျက်ဆီးနေတယ်ဆိုပြီး ဝေဖန် ပြောဆိုနေပေမဲ့ စေတီက ရေတံခွန်ရဲ့ ရှေ့တည့်တည့်မှာ မဟုတ်လို့ သဘာ၀ အလှကို ပျက်စီးစေမှာ မဟုတ်ဘူးလို့ ဗိုလ်မှူးစိုင်းဖုန်းဟန်က ပြောပါတယ်။
“ သူတို့ ဝေဖန်ကြတယ်ဆိုတာ ဘယ်ရှူထောင့်ကနေ ဝေဖန်လဲ ဆိုတာ ကျွန်တော်တို့ ပြောလို့ မရဘူးလေနော်။ ကျွန်တော်တို့ မြင်တာက စေတီတည်ခြင်းအားဖြင့် ဘာမှ ထိခိုက်နစ်နာစရာ အကြောင်း မရှိပါဘူး။ သဘာ၀ ပတ်ဝန်းကျင် ဆိုရင်လည်း ဟိုက်ပါ ရေတံခွန်ရဲ့ သစ်တောဝန်းထဲမှာလည်း ဟုတ်မနေဘူး။ ပြီးတော့လည်း ဟိုက်ပါ ရေတံခွန်ရဲ့ အလှကို ထိခိုက်ရအောင် ရေတံခွန်ရဲ့ ရှေ့တည့်တည့်မှာလည်း မဟုတ်ဘူးလေ။ ဆိုတော့ စေတီတည်တာက ဘာမှ ထိခိုက်နစ်နာစရာ မရှိပါဘူးလို့ ပြောချင်ပါတယ်” လို့ သူကပြောပါတယ်။
ဟိုက်ပါ ရေတံခွန် အနီး မြေတစ်ဧက နီးပါးကို မိုင်းဖုန်း ဆရာတော်ရဲ့ ဒကာ၊ ဒကာမတွေက မိုင်းရှူးမြို့နယ် သံဃာ့ အဖွဲ့အစည်းကို စေတီတည်ဖို့ အတွက် လှူဒါန်းထားတာလို့ ဒေသခံတွေက ပြောဆိုထားပါတယ်။
ဟိုက်ပါ ဒေသခံတွေက ရေတံခွန်နားမှာ စေတီတည်တာကို ကန့်ကွက်သူ မရှိဘဲ ဒီလို စေတီတည်တာက ရေတံခွန် အနီး သောက်စား မူးယစ်နေသူတွေကို ထိန်းကျောင်းရာ ရောက်တယ်လို့ ပြောဆိုထားပါတယ်။
လူမှုကွန်ရက်မှာတော့ ဟိုက်ပါ ရေတံခွန် အနီး စေတီတည်တာက သဘာ၀ အလှကို ပျက်စီးစေသလို ရေတံခွန် လာရောက် အပန်းဖြေတဲ့ ပြည်တွင်း၊ ပြည်ပ ခရီးသွားတွေ မလွပ်လပ်စေတဲ့ အပြင် အပန်းဖြေ နေရာတွေကို ဘာသာရေး အဖြစ် အသုံးမပြုသင့်ဘဲ ဘာသာရေး အဆောက်အုံတွေဟာ သီးသန့်နယ်မြေ တစ်ခုမှာသာ ရှိသင့်တယ်လို့ ထောက်ပြ ဝေဖန်မှုတွေ မြင့်တက်နေပါတယ်။
MK-007
#MeKongNews
#ဟိုက်ပါရေတံခွန်
#စေတီ
#SSPP/SSA