မဲခေါင်၊ ဖေဖော်ဝါရီ ၉
မွန်ပြည်နယ်၊ သထုံမြို့နယ်၊ သိမ်ဆိပ်တိုက်နယ်၊ မိုးကောင်းဘုရားနဲ့ ဖော်ဖကျေးရွာ အနီးမှာ ကင်းပုန်းဝပ်ဖို့ လာတဲ့ စစ်ကောင်စီတပ်ကို မိုင်းဆွဲ တိုက်ခိုက်ရာ စစ်သား ၄ ဦးသေဆုံးတယ်လို့ Hawk Revolutionary Squad (HRS) က မနေ့က ထုတ်ပြန်ပါတယ်။
ဖေဖော်ဝါရီ ၆ ရက် ည ၈ နာရီ ၁၅ မိနစ်က ကာကွယ်ရေးတပ်တွေ ကြိုတင် စောင့်ဆိုင်း မိုင်းဆွဲ တိုက်ခိုက်ခဲ့ပြီး ၄၀ မမ တွေနဲ့ ပစ်ခတ်ခဲ့တယ်လို့ သိရပါတယ်။
တိုက်ပွဲဖြစ်ပွားစဉ် စစ်ကောင်စီရဲ့ ဝင်းပ အခြေစိုက် ခမရ (၉) မှ လက်နက်ကြီး တွေနဲ့ ပစ်ခတ်ခဲ့ပြီး ရန်ကုန်-မော်လမြိုင် အဝေးပြေး လမ်းမကြီးပေါ် မိုးကောင်းလမ်းဆုံရှိ စစ်သားတွေကလည်း လက်နက်ငယ်တွေနဲ့ ပစ်ခတ်တာကြောင့် အပြန်အလှန် ပစ်ခတ်မှု မိနစ် ၅၀ ခန့် ကြာမြင့်ခဲ့တယ်လို့ သိရပါတယ်။
ည ၁၀ နာရီ ၁၅ မိနစ်မှာ ရန်ကုန်-မော်လမြိုင် အဝေးပြေး လမ်းမပေါ်မှာ မောင်းနှင်လာတဲ့ စစ်ကောင်စီ ကားကို ကမာစိုင်ကျေးရွာ အနီးမှာ ၄၀ မမနဲ့ ပစ်ခတ် တိုက်ခိုက်ခဲ့ရာ ကားတစ်စီး ထိမှန် ပျက်စီးခဲ့တယ်လို့ သိရပါတယ်။
အဲဒီ တိုက်ခိုက်မှုတွေကို Hawk Revolutionary Squad-HRS၊ KNLA တပ်ရင်း (၂) တပ်ခွဲ (၃) နဲ့ PDF တပ်ရင်း (၂) တပ်ခွဲ (၃) ပူးပေါင်းတပ်ဖွဲ့မှ လုပ်ဆောင်ခဲ့တာ ဖြစ်ပြီး တိုက်ခိုက်မှု အတွင်း စစ်ကောင်စီတပ်သား ၄ ဦး သေဆုံးကာ ပူးပေါင်းတပ်ဘက်က အထိအခိုက်မရှိ ပြန်လည်ဆုတ်ခွာ နိုင်ခဲ့တယ်လို့ သိရပါတယ်။
ကရင်အမျိုးသား အစည်းအရုံး-KNU/KNLA သထုံခရိုင်၊ သထုံမြို့နယ်အတွင်း မနက် ၆ နာရီမှ ည ၆ နာရီ အထိသာ သွားလာခွင့် ပြုထားလို့ ပြည်သူတွေ အနေနဲ့ သတ်မှတ်ချိန် ကျော်လွန်ကာ ခရီးသွားလာတာ မပြုကြဖို့ တရားဝင် အသိပေး ထုတ်ပြန်ထားတယ်လို့ သိရပါတယ်။
ဒါကြောင့် ပြည်သူတွေ အနေနဲ့ ထုတ်ပြန်ထားတဲ့ စည်းမျဉ်းစည်းကမ်းတွေကို အထူးဂရုပြု လိုက်နာပေးကြဖို့ Hawk Revolutionary Squad-HRS က မေတ္တာရပ်ခံ ထားပါတယ်။
ပုံစာ-ရှေ့တန်းတစ်နေရာမှာ တိုက်ပွဲဝင်နေတဲ့ HRS တပ်ဖွဲ့ဝင်များ။
MK-003
#MeKongNews
#သထုံမြို့နယ်
#HawkRevolutionarySquad
#KNU/KNLA
