မဲခေါင်၊ ဇူလိုင်၂၇
ကေအဲန်ယူ−ကော်သူးလေ အုပ်ချုပ်နယ်မြေ၊ ဒူးသထူခရိုင် တပ်မဟာ (၁)၊ သထုံမြို့နယ် အတွင်း ဇူလိုင်လ ၂၅ ရက်နေ့မှ စတင်ကာ စစ်ကောင်စီတပ်များ စစ်ကြောင်းထိုးလာပြီး ပြည်သူများကို လူသားဒိုင်းအဖြစ် ဖမ်းဆီးတာ၊ လက်နက်ကြီးများနဲ့ ကျေးရွာကို ပစ်ခတ်တာတွေ လုပ်နေတယ်လို့ သတင်းရရှိပါတယ်။
စစ်ကောင်စီ တပ်မ (၄၄) လက်အောက်ခံတပ်တွေဟာ ရွှေရောင်ပြနယ်ဘက်သို့ စစ်ကြောင်းထိုးလာပြီး မရမ်းကုန်းရွာနေ အမျိုးသား တစ်ဦးနဲ့ ချောင်းစောင့်ရွာသား တစ်ဦးကို လူသားဒိုင်းကာအဖြစ် ဖမ်းဆီး ခေါ်ဆောင်သွားရာ အမျိုးသား တစ်ဦးကိုသာ ပြန်လွှတ်ပေးခဲ့တယ်လို့ သိရပါတယ်။
အဲဒီလို စစ်ကောင်စီတပ်တွေ စစ်ကြောင်းထိုးနေလို့ မိချောင်းအိုင်ရွာမှ လူဦးရေ ၁၀၀ နီးပါး၊ ခလောက်အင်း ကျေးရွာမှ လူဦးရေ ၅၅၆ ဦးနဲ့ မရမ်းကုန်းကျေးရွာမှ လူဦးရေ ၄၁၀ ဦး စုစုပေါင်း လူတစ်ထောင်ကျော် နေအိမ်များကို စွန့်ခွာပြီး အသက်ဘေး လွတ်ရာသို့ ထွက်ပြေး တိမ်းရှောင်နေရပါတယ်။
ဇူလိုင်လ ၂၇ ရက်နေ့၊ မနက် ၄ နာရီမှ ၈ နာရီကြား စစ်ကောင်စီ ဝီယော်စခန်းကို KNLA ပူးပေါင်းတပ်ဖွဲ့များ တိုက်ခိုက်ခဲ့ပြီးနောက် စစ်ကောင်စီ အမှတ် (၉ )စခန်းမှ ကျေးရွာများ အတွင်းသို့ လက်နက်ကြီးများနဲ့ ပစ်ခတ်တဲ့ အတွက် အရပ်သား တစ်ဦး သေဆုံးပြီး ၄ ဦး လက်နက်ကြီးကျည်စ ထိမှန် ဒဏ်ရာရခဲ့တယ်လို့ ဒူးသထူခရိုင် သတင်းနှင့် ပြန်ကြားရေးက ထုတ်ပြန်ထားပါတယ်။
စစ်ကောင်စီတပ် အမှတ် (၉) စခန်းမှ လက်နက်ကြီး ပစ်ခတ်မှုကြောင့် ထုံးဘိုလေးကျေးရွာမှ အသက် ၁၈ နှစ် အရွယ် စောအဲ့ကော့ရှီး ပွဲချင်းပြီး သေဆုံးခဲ့သလို အမျိုးသား ၃ ဦးနဲ့ အမျိုးသမီးငယ် တစ်ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။
MK-005
#MeKongNews
#သထုံမြို့နယ်
#လူသားဒိုင်း
#ကေအဲန်ယူ