မဲခေါင်၊ ဇူလိုင် ၁၃
စစ်ကောင်စီက ကိုယ်ပိုင်ကျောင်းတွေကို သတ်မှတ်စည်းကမ်းနဲ့ ညီညွတ်မှု ရှိ၊ မရှိ စစ်ဆေးကြပ်မတ်ပြီး ကိုက်ညီမှုမရှိရင် ကျောင်းဖွင့်လှစ်ခွင့်ပိတ်တဲ့ အထိအရေးယူသွားမယ်လို့ စစ်ကောင်စီက ခြိမ်းခြောက်ပြောဆိုပါတယ်။
ကိုယ်ပိုင်ကျောင်းအချို့ ငွေကြေးသတ်မှတ်ထားတဲ့ ဝန်ဆောင်မှုပေးတဲ့အပိုင်းမှာ ကိုက်ညီမှုမရှိဘဲ အားနည်းချက်တွေရှိတဲ့အတွက် ကျောင်းပိုင်ရှင်တွေ အနေနဲ့ ကြေညာထားတဲ့အတိုင်း ဝန်ဆောင်မှုပေးတာ၊ ကျောင်း သားတွေ အပေါ်မှာ အရည်အသွေး ပြည့်ဝတဲ့ ပညာရေးကိုပေးတာ ရှိ၊ မရှိ ကို စစ်ဆေးကြပ်မတ်တာတွေ လုပ်ဆောင်သွားမယ်လို့ ဆိုပါတယ်။
“အထက်ညွန်ကြားချက်လို့ပြောတယ်၊ အရင်သတ်မှတ်ချက် အတိုင်းလုပ်ဆောင်နေတာဘဲ၊ ဘယ်လိုညွန်ကြားချက်အသစ်တွေ ထပ်ထုတ်ပြန်မလဲ စိုးရိမ်တယ်၊ ကျောင်းပိတ်တဲ့ အထိအရေးယူမယ်ဆိုတော့ ကျောင်းပိုင်ရှင်တွေလည်း စိုးရိမ်နေတယ်” လို့ရန်ကုန်တိုင်း ပညာရေးမှူးရုံးရဲ့ နီးစပ်သူတစ်ဦးကပြောပါတယ်။
စစ်အာဏာသိမ်းမှုဖြစ်ပြီးနောက်ပိုင်း အစိုးရကျောင်းမတက်ဘဲ အခြေခံပညာရေး ဆက်လက်သင်ကြား လိုသည့် ကျောင်းသား၊ ကျောင်းသူများသည် Home Schooling ဟုခေါ်သည့် အွန်လိုင်းမှ သင်ကြားခြင်းနဲ့ ပုဂ္ဂလိက ကိုယ်ပိုင်ကျောင်းတွေကို ပြောင်းရွှေ့ပညာသင်ကြားခြင်းများ ပြုလုပ်လာတဲ့အပေါ် ဖိအားပေးထိန်းချူပ်မှုတွေ ရှိနေတယ်လို့ ကိုယ်ပိုင်ကျောင်းပိုင်ရှင်များက ဆိုပါတယ်။
“ကိုယ်ပိုင်ကျောင်း အရေအတွက်က စစ်အာဏာသိမ်းပြီးတဲအခါမှာ ကျောင်းတက်တဲ့ အရေအတွက်ပိုများလာတယ်၊ အခုအစိုးရကျောင်းထားပြီးမှ၊ ထပ်ပြောင်းလာတာတွေလည်းရှိတယ်၊ ကျောင်းတိုင်းလိုလို လူပြည့်နေတာ၊ တမင်ဖိအားထပ်ပေးတာမျိူးပေါ့၊ အခုကသူတို့သတ်မှတ်ချက်အတိုင်း မလုပ်ရဲတဲ့သူမရှိပါဘူး” လို့ အမည်မဖော်လိုတဲ့ ကိုယ်ပိုင်ကျောင်းပိုင်ရှင် ဆရာတစ်ဦးကပြောပါတယ်။
ကိုယ်ပိုင်ကျောင်းတွေက အရည်အသွေးမီ၊ စံချိန်မီအောင် တည်ဆောက်ထားတဲ့အပြင် အသိပညာရှင်၊ အတတ်ပညာရှင်တွေကို ဖိတ်ကြားပြီး ဆရာ၊ ဆရာမတွေရဲ့ သင်ကြားရေးပိုင်းဆိုင်ရာ ကိုယ်ရည်ကိုယ်သွေး၊ ကျောင်းစီမံခန့်ခွဲတဲ့ အရည်အသွေးတွေကို မြှင့်တင်နေတယ်လို့ ဆက်ပြောပါတယ်။
ကိုယ်ပိုင်ကျောင်းတွေကို ပညာရေးဝန်ကြီးဌာနက စိစစ်လက်ခံ ဖွင့်ခွင့်ပေးတာ ဖြစ်ပြီး အရည်အသွေးနဲ့ သင်ကြားရေးပိုင်းဆိုင်ရာတွေကို သတ်မှတ်ချက်တွေနဲ့ ညီညွတ်တာ ရှိ၊ မရှိ စစ်ဆေးခြင်းကိုတော့ တစ်နှစ်ကို ပျှမ်းမျှ နှစ်ကြိမ်လောက်ဘဲ ပြုလုပ်ပေမယ့် ၊ အခုလိုကြားဖြတ်အမိန့်တွေကို လိုက်နာနေရတယ်လို့ ဆိုပါတယ်။
“ပထမက အစိုးရကျောင်းထားတာ၊ တစ်ခန်းမှာ ကလေးအယောက်တစ်ရာလောက် ရှိတယ်၊ လူဦးရေများပြီး၊ ကလေးကိုအနိုင့်ကျင့်တာတွေကြောင့်၊ လစဉ်ကြေးပေးရတာတွေကြောင့် အပြင်ကျောင်းထားလိုက်တာ၊ ကလေးတွေပညာရေးလည်း အများကြီးကောင်းလာတယ်၊ ငွေပေးရပေမယ့် ၊ စိတ်ချမ်းသာမှုရတယ်” လို့ သင်္ကန်းကျွန်းမြို့နယ်မှ ကလေးမိဘတစ်ဦးကဆိုပါတယ်။
စစ်ကောင်စီသည် ကိုယ်ပိုင်ကျောင်းများသာမက ပညာရေးနယ်ပယ်တခုလုံးရှိ ဆရာ၊ ဆရာမနဲ့ ကျောင်းသူကျောင်းသားများကိုပါ ယခင် စစ်အစိုးရခေတ်ကကဲ့သို့ပင် ကန့်သတ်၊ တင်းကျပ်မှုတွေလုပ်ဆောင်နေတယ်လို့ ပြင်ပ ဆရာ၊ဆရာမ များကပြောဆိုမှုတွေ ရှိပါတယ်။
မြန်မာတစ်နိုင်ငံလုံးမှာ ကိုယ်ပိုင်ကျောင်း အရေအတွက် ၁၂၀၀ ကျော် ရှိနေပြီး၊ ကျောင်းသားမိဘတွေ အနေနဲ့ အစိုးရကျောင်းတွေထက် ကိုယ်ပိုင်ကျောင်းတွေကို ပိုမိုရွေးချယ်လာကြတယ်လို့ ကိုယ်ပိုင်ကျောင်း အသိုင်း အဝန်းက သိရပါတယ်။
MK-006
#MeKongNews
#စစ်ကောင်စီ
#ကိုယ်ပိုင်ကျောင်း
#ခြိမ်းခြောက်