မဲခေါင်၊ ဇူလိုင် ၁၁
ကရင်နီ နယ်စပ်၊ မိုးဗြဲမြို့ကနေ လွိုင်ကော်မြို့ကို ဒီနေ့ ဇူလိုင်လ ၁၁ ရက်၊ မနက်က စစ်ကား ၁၅ စီးပါ စစ်ယာဉ်တန်းကို တော်လှန်ရေးတပ်ဖွဲ့က ကြားဖြတ် တိုက်ခိုက်စဉ် စစ်ကောင်စီတပ်ဘက် ရမ်းသန်း ပစ်ခတ်တာကြောင့် ပြည်သူ ၃ ဦး သေဆုံးခဲ့ရတယ်လို့ ဒေသခံ သတင်းရင်းမြစ်က ပြောပါတယ်။
လွိုင်ကော်မြို့နယ်၊ ကုန်းသာရွာ မရောက်မီ တစ်နေရာမှာ စစ်ကောင်စီယာဉ်တန်းကို တော်လှန်ရေးတပ်တွေ ကြားဖြတ်တိုက်ခိုက်ခဲ့လို့ အထိနာသွားတဲ့ စစ်တပ်က ရမ်းသန်း ပစ်ခတ်တာလို့ ဆိုပါတယ်။
“ ကုန်းသာရွာလည်း ရောက်တော့ ခွေး (စစ်ကောင်စီ) တွေက လမ်းမှာရှိတဲ့ ပြည်သူတွေကို ကားပေါ်က တွေ့သမျှ အကုန်ပစ်တာ။ အသက် ၁၇ နှစ်အရွယ် အမျိုးသား တစ်ဦး ထိမှန်ပြီး နေရာမှာတင် သေဆုံးသွားတယ်” လို့ သူကပြောပါတယ်။
ဒါ့အပြင် နွားလဝိုးကျေးရွာ ရောက်ချိန် ရွာထဲကို ပစ်ခတ်တာကြောင့် ပြည်သူ ၂ ဦး ထပ်မံ သေဆုံးခဲ့ရတယ်လို့ သိရပါတယ်။
လက်ရှိ စစ်ကောင်စီယာဉ်တန်း ၁၅ စီးအနက် ၈ စီးက နွားလဝိုးကျေးရွာ အနီးတဝိုက်ကို စစ်ဆေးနေပြီး ကျန် ၇ စီးကတော့ ထိခိုက်သေဆုံးတဲ့ စစ်သားတွေကိုတင်ပြီး လွိုင်ကော်မြို့ထဲ ဝင်သွားတယ်လို့ သိရပါတယ်။
လက်ရှိ အခြေအနေတွေကြောင့် လွိုင်ကော်-မိုးဗြဲ -ကယန်းသာယာ လမ်းပိုင်းကို ပြည်သူတွေ အနေနဲ့ ဖြတ်သန်းသွားလာတာ မပြုလုပ်ကြဖို့ တော်လှန်ရေးတပ်ဖွဲ့က မေတ္တာရပ်ခံထားပါတယ်။
ကရင်နီပြည်နယ်မှာ ထိခိုက်သေဆုံးမှုများနေတဲ့ စစ်ကောင်စီက ရခိုင်ပြည်နယ်က တပ်ရင်းတွေ၊ ရှမ်းအခြေစိုက် တပ်ရင်းတွေနဲ့ ပင်လောင်း-ဖယ်ခုံက တပ်ရင်း တစ်ချို့ကို လွိုင်ကော်မြို့သို့ ကားလမ်း၊ လေကြောင်းလိုင်းတွေနဲ့ ဆက်တိုက်ပို့ဆောင်နေပြီး လွိုင်ကော်မြို့ကနေ လိုအပ်တဲ့ နေရာတွေကို စစ်အင်အားဖြည့်တင်း နေတယ်လို့ လွိုင်ကော် PDF သတင်းရင်းမြစ်က ပြောပါတယ်။
CJ-004
#MekongNews
#လွိုင်ကော်
#စစ်ယာဉ်တန်း
