မဲခေါင်၊ အောက်တိုဘာ ၁၀
ကချင်ပြည်နယ်၊ လိုင်ဇာမြို့ အနီးက မုန်လိုင်ခက် စစ်ရှောင်စခန်းကို စစ်ကောင်စီ ဗုံးကြဲ တိုက်ခိုက်တာဟာ လက်မခံနိုင်တဲ့ လုပ်ရပ်ဖြစ်လို့ ပြင်းပြင်းထန်ထန် ရှုတ်ချတယ်လို့ ကရင်နီပြည်နယ် အတိုင်ပင်ခံ ကောင်စီ-KSCC က ဒီကနေ့ ထုတ်ပြန် လိုက်ပါတယ်။
စစ်ကောင်စီက မနေ့ ည ၁၁ နာရီ ဝန်းကျင်မှာ မုန်လိုင်ခက် စစ်ရှောင်စခန်းကို ဗုံးကြဲခဲ့လို့ အမျိုးသမီးနဲ့ ကလေး အပါအဝင် ပြည်သူ ၃၀ ဦး ထက်မနည်း သေဆုံးပြီး လူ ၅၀ ကျော် ဒါဏ်ရာ ရရှိခဲ့ပါတယ်။
အပြစ်မဲ့ မွေးကင်းစ ကလေးသူငယ်မှအစ သက်ကြီရွယ်အိုနဲ့ အမျိုးသမီးများ ခိုလှုံနေတဲ့ စစ်ဘေးရှောင် စခန်းကို လူမဆန်စွာ ဗုံးကြဲ သတ်ဖြတ်တာဟာ စစ်ကောင်စီက နိုင်ငံတကာ ဥပဒေများနဲ့ လူ့အခွင့်အရေး ပြဌာန်းချက် များကို ပြောင်ပြောင်တင်းတင်း ကျူးလွန် ချိုးဖေါက်နေတာလို့ KSCC က ပြောပါတယ်။
စစ်ကောင်စီရဲ့ အခုလုပ်ရပ်ဟာ စစ်မှန်တဲ့ ငြိမ်းချမ်းရေးနဲ့ ဖက်ဒရယ် ဒီမိုကရေစီရရှိဖို့ ကြိုးပမ်းနေသူများ အတွက် လက်မခံနိုင်တဲ့ လုပ်ရပ်ဖြစ်လို့ KSCC အနေနဲ့ ပြင်းထန်စွာ ရှုတ်ချတယ်လို့ ထုတ်ပြန်ချက်မှာ ဖော်ပြပါတယ်။
ဒါကြောင့် ကရင်နီပြည်နယ် အတိုင်ပင်ခံကောင်စီ အနေနဲ့ အပြစ်မဲ့ ပြည်သူများရဲ့ အသက်ကို အာဏာ တည်မြဲဖို့ သတ်ဖြတ်နေတဲ့ စစ်အာဏာရှင်များနဲ့ အာဏာရှင်ဟူသမျှ ကျရှုံးတဲ့ အထိ ပြည်သူလူထုနဲ့အတူ ဆုံးခန်းတိုင်အောင် တိုက်ပွဲဝင်သွားမယ်လို့ ပြောပါတယ်။
မုန်လိုင်ခက် စစ်ရှောင်စခန်းမှ စစ်ဘေးရှောင် အမျိုးသမီးများနဲ့ ကလေးသူငယ်များ အပါအဝင် ပြည်သူလူထုရဲ့ အသက် ဆုံးရှုံးမှုများနဲ့ နစ်နာမှုများအတွက် ထပ်တူ ဝမ်းနည်း ကြေကွဲရတယ်လို့ ထုတ်ပြန်ချက်မှာ ဖော်ပြတယ်။
စစ်ကောင်စီဟာ ၂၀၂၃ ခုနှစ်အတွင်း စစ်ဘေးရှောင် ပြည်သူများ၊ ဆေးရုံ ဆေးခန်းများနဲ့ စာသင်ကျောင်းများကို လေကြောင်းနဲ့ အရှိန်တိုးမြှင့် တိုက်ခိုက်ပြီး ပြည်သူတွေရဲ့ လုံခြုံရေးကို နေ့စဉ် ခြိမ်းခြောက်ကာ အစုလိုက် အပြုံလိုက် သတ်ဖြတ်မှုများ နိုင်ငံ အနှံ့အပြားမှာ ကျူးလွန်နေတာ တွေ့ရတယ်လို့ KSCC ရဲ့ ထုတ်ပြန်ချက်မှာ ဖော်ပြထားပါတယ်။
CJ-002
#MekongNews
#ကရင်နီပြည်နယ်_အတိုင်ပင်ခံကောင်စီ
#မုန်လိုင်ခက်_စစ်ရှောင်စခန်း
#ဗုံးကြဲ