မဲခေါင်၊ ဧပြီ ၇
ရှမ်းပြည်နယ် မြောက်ပိုင်း၊ လားရှိုးမြို့နယ်၊ နောင်မွန်ကျေးရွာ အနီးက တောထဲမှာ ဒီကနေ့ တိုက်ပွဲတွေ ဖြစ်နေပြီး စစ်ရဟတ်ယာဉ်နဲ့ လာပစ်တာကြောင့် မိသားစုဝင် ၃ ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။
ဒီကနေ့ ဧပြီလ ၇ ရက်၊ မနက်ပိုင်းက နောင်မွန်ကျေးရွာအုပ်စု၊ နောင်ကွဲကျေးရွာ တောထဲမှာ တိုက်ပွဲတွေ ဖြစ်ပြီး စစ်တပ်က စစ်ရဟတ်ယာဉ်နဲ့ ပစ်တာလို့ ဒေသခံ တစ်ဦးက မဲခေါင်သတင်းကို ပြောပါတယ်။
“တိုက်ပွဲက မနက်က ၉ နာရီ ဝန်းကျင်လောက်က ဖြစ်တာပဲ။ ဘယ်သူတွေ ဖြစ်လဲတော့ ရေရေရာရာ မသိဘူး။ တိုက်ပွဲ ဖြစ်နေချိန် စစ်ရဟတ်ယာဉ်နဲ့ လာပစ်တာဆိုတော့ သေချာတာတော့ တစ်ဖက်က စစ်တပ်ပဲ။ ဒီလို စစ်ရဟတ်ယာဉ်နဲ့ လာပစ်လို့ ကျေးရွာထဲက မိသားစု တစ်စု အမျိုးသား၊ အမျိုးသမီးနဲ့ ကလေးတစ်ဦး ဒဏ်ရာ ရသွားတယ်။ အမျိုးသားက ဝမ်းဗိုက်နဲ့ ခြေထောက်မှန်တယ်။ အမျိုးသမီး ကတော့ ခြေသလုံးနား မှန်တယ်။ သူတို့က ထမင်းချက်နေတဲ့ချိန် လေကြောင်းက လာပစ်တော့ ထိသွားတာ’’ လို့ သူကပြောပါတယ်။
ဒဏ်ရာရရှိတဲ့ ပြည်သူ ၃ ဦးကို လူမှုကယ်ဆယ်ရေးအသင်း တစ်ခုက လာရောက် သယ်ဆောင် ဆေးရုံ ပို့ပေးခဲ့ရာ အသက်အန္တရာယ် စိုးရိမ်စရာ မရှိဘူးလို့ ကူညီကယ်ဆယ်ခဲ့သူနဲ့ နီးစပ်သူ တစ်ဦးက ပြောပါတယ်။
လက်ရှိ တိုက်ပွဲတွေ ပြန်ငြိမ်သွားပြီလို့ သိရပြီး တိုက်ပွဲ အခြေအနေ အသေးစိတ်ကိုတော့ မဲခေါင်သတင်း အနေနဲ့ စုံစမ်းနေဆဲ ဖြစ်ပါတယ်။
MK-007