မဲခေါင်၊ မတ် ၂၂
ရန်ကုန်တိုင်း၊ သာကေတမြို့နယ်၊ အမှတ် (၉) ရပ်ကွက်ရှိ မိတ္တူဆိုင်မှာ မတ်လ ၁၇ ရက်နေ့က ရဲ ၃ ယောက် သေနတ်နဲ့ ပစ်သတ်ခံရပြီးနောက် အဆိုပါလမ်း အတွင်းက ဈေးသည်တွေ ခရီးမထွက်ဖို့ စစ်ကောင်စီက ခြိမ်းခြောက်ထားတယ်လို့ ဒေသခံတွေက မဲခေါင်သတင်းကို ပြောပါတယ်။
စစ်ကောင်စီဟာ ရဲ ၃ ဦး အသတ်ခံရတဲ့ အမှုနဲ့ ပတ်သက်ပြီး ကျေနပ်မှုမရှိလို့ အရင်ထက် လုံခြုံရေးတွေ တင်းကြပ် စစ်ဆေးနေကာ အဲဒီ ပတ်ဝန်းကျင်က ဈေးသည်တွေ မဖြစ်မနေ ခရီးသွားရမယ်ဆိုရင် ရဲစခန်း လာရောက် အကြောင်းကြားဖို့ ပြောဆိုထားတယ်လို့ ဆိုပါတယ်။
“ ဈေးရောင်းတဲ့သူတွေ အားလုံးကို မျက်မြင်သက်သေအဖြစ် ထားထားတယ်။ ဒီအတွက် ခေါ်စစ်တဲ့အခါ အချိန်မရွေး ရှိဖို့လိုတယ်။ ဈေးသည်တွေ ခရီးသွားမယ်ဆို သူတို့ ရဲစခန်းကို လာပြောဖို့ ပြောထားတယ်။ ပစ်သတ်ခံရပြီးတော့ ဈေးဆိုင်တွေက CCTV တောင်းတယ်၊ လိုက်မေးတာတွေ ရှိတယ်။ ဈေးသည်တွေက မသိဘူး ဖြေကြတော့ ပြန်ပြီးညစ်တဲ့ သဘောပါ” လို့ ဒေသခံ တစ်ဦးက ပြောပါတယ်။
ဒါပေမယ့်လည်း မတ်လ ၁၉ ရက်နေ့၊ ညက သာကေတ (၈) ရပ်ကွက်၊ သာသနာ့ရိက္ခတ ဓမ္မာရုံဘေး ဖွင့်လှစ်ထားတဲ့ အအေးဆိုင်ပိုင်ရှင်နဲ့ အမျိုးသား တစ်ဦးကို ပျူစောထီး တင်လင်းထိုက် (ခေါ်) လင်းလင်း ရဲ့ တပည့်တွေ ပစ်သတ်ခဲ့ပေမယ့် စစ်ဆေး မေးမြန်းတာတွေ မရှိဘူးလို့ ဒေသခံ တစ်ဦးက ပြောပါတယ်။
“ အအေးဆိုင်ပိုင်ရှင် ကိုညိုကြီးနဲ့ သင်္ဘောသား ကိုဝေဖြိုးအောင် အသတ်ခံရတာကိုကြတော့ မစစ်ဘူး။ သူတို့ထဲက ခွေး ၃ ကောင် သေတော့ ဓာတ်ပုံတင်တဲ့ သူတွေတောင် အကုန်လျှောက်ဖမ်းတယ်။ ခုထိ မလွတ်သေးတဲ့ သူတွေ ရှိသေးတယ်။ ဘာမှ လုပ်တဲ့သူတွေ မဟုတ်ဘူး။ ပျူစောထီးနဲ့ မဘသ တွေနဲ့ မတည့်ရင် အမှုဆင်ပြီး ဖမ်းနေတာ။ ခုလည်း ညတိုင်း မူးရူးပြီး သူတို့ မကျေနပ်တဲ့ အိမ်တွေကို ဝင်ပြီး စစ်နေတာတွေ ရှိတယ်” လို့ သူကပြောပါတယ်။
ဒီကနေ့ မနက်ပိုင်း သာကေတမြို့နယ် တစ်နေရာမှာ ပစ်ခတ်သံတွေ ကြားရပြီးနောက် ရဲကားတွေ ဗေလုဝကွေ့နဲ့ သာကေတ အဝိုင်း (၁၀) ဈေး၊ သာကေတ ကျောက်တိုင် ရွှေပုဇွန် ရှေ့တွေမှာ အစစ်အဆေးကြမ်း နေတယ်လို့ သိရပါတယ်။
MK-005
