မဲခေါင်၊ ဩဂုတ် ၄
ရှမ်းပြည်နယ် မြောက်ပိုင်း၊ မူဆယ်မြို့နယ်၊ စယ်လန့်ကျေးရွာအုပ်စု၊ နားထမ်နဲ့ ဂေါရာရွာအနီး တိုက်ပွဲမှာ စစ်ကောင်စီတပ်သား ၁၀ ဦး သေဆုံးပြီး လက်နက်ခဲယမ်းများစွာ သိမ်းဆည်း ရရှိခဲ့တယ်လို့ တအာင်း အမျိုးသား လွတ်မြောက်ရေး တပ်မတော်-TNLA က ထုတ်ပြန်ပါတယ်။
ဩဂုတ်လ ၂ ရက်၊ မနက်ပိုင်းက စတင်ခဲ့တဲ့ တိုက်ပွဲဟာ ညနေပိုင်းအထိ ပြင်းထန်ခဲ့သလို ထိုးစစ်ဆင်လာတဲ့ စစ်တပ်နဲ့ လက်အောက်ခံ ပြည်သူ့စစ်ပူးပေါင်းအဖွဲ့က သေဆုံးမှုများပြီး ပြန်လည် ဆုတ်ခွာသွားကြောင်း ဆိုပါတယ်။
TNLA ရဲ့ တိုက်ခိုက်မှုကြောင့် စစ်တပ်ဘက်က ၁၀ ဦးသေဆုံးကာ ၁၃ ဦး ဒဏ်ရာရခဲ့ပြီး လက်နက်ခဲယမ်းနဲ့ ကျည်တွေ၊ စစ်အသုံးအဆောင် ပစ္စည်းတွေ သိမ်းဆည်းရမိခဲ့ကြောင်း ဓာတ်ပုံမှတ်တမ်းနဲ့တကွ ထုတ်ပြန်ပါတယ်။
သိမ်းဆည်း ရရှိတာတွေကတော့ RPG တစ်လက်၊ RPG-7 ဗုံးသီး ၂၀ လုံး၊ MA-1 တစ်လက်၊ AK-81 တစ်လက်၊ ၆၀ မမ ထောင့် တစ်ခု၊ ၈၁ မမ ထောင့် တစ်ခု၊ ၈၁ မမ ဗုံးသီး ၄၀ လုံး၊ စက်လတ် တစ်လက်၊ ကျည်ဆံ ၅၀၀၀ တောင့်၊ ဆက်သွယ်ရေးစက်ကြီး တစ်လုံးနဲ့ အခြား စစ်အသုံးအဆောင်များ ဖြစ်တယ်လို့ ဖော်ပြထားပါတယ်။
TNLA နဲ့ စစ်ကောင်စီစစ်တပ်တို့ဟာ ဇူလိုင်လ ၂၃ ရက်ကနေ ဩဂုတ် ၂ ရက်အတွင်း တိုက်ပွဲ ၉ ကြိမ် ဖြစ်ပွားခဲ့ပြီး စစ်တပ်ဘက်မှ ၂၅ ဦးသေဆုံးကာ ၂၇ ဦး ဒဏ်ရာရခဲ့ပြီး စစ်ကောင်စီတပ်ဖွဲ့ဝင် တစ်ဦးကို အရှင်မိခဲ့တယ်လို့ TNLA ရဲ့ ထုတ်ပြန်ချက်မှာ ဖော်ပြထားပါတယ်။
MK-005
#MeKongNews
#မူဆယ်
#TNLA
#RPG
