မဲခေါင်၊ ဇန်နဝါရီ ၃၀
စစ်ကောင်စီက ဖွင့်လှစ်ထားတဲ့ အခြေခံပညာ ကျောင်းတွေမှာ မီးရှို့ခံထားရတဲ့ ဒေသတွေကို လှူဖို့ ဆိုတဲ့ ခေါင်းစဉ်နဲ့ ဆရာ၊ ဆရာမတွေက အလှူခံနေတယ်လို့ ကျောင်းသားမိဘတွေဆီကနေ သိရပါတယ်။
ရန်ကုန်တိုင်း စမ်းချောင်း၊ အလုံ၊ ကြည်မြင်တိုင် မြို့နယ်အပါအဝင် ကရင်ပြည်နယ် မြဝတီ မြို့နဲ့ ရှမ်းပြည်နယ် လားရှိုးမြို့အတွင်းရှိ အခြေခံကျောင်းတွေမှာ အလှူခံနေတာလို့ သိရပါတယ်။
လားရှိုးမြို့က ကျောင်းသားမိဘ တစ်ဦးက “အခု အလှူငွေထပ်မံကောက်ခံတာက မီးရှို့ခံထားရတဲ့ ဒေသကိုလှုဖို့ဆိုပြီး ကောက်တယ်။ ဘယ်နေရာကို လှုမယ်ဆိုတာတော့ မပြောဘူး”လို့ ဆိုပါတယ်။
အထက်က ခိုင်းလို့ အလှူငွေ ကောက်ခံရတာလို့ စစ်ကောင်စီလက်အောက်ခံ NonCDM ဆရာ၊ ဆရာမတွေက ကျောင်းသားမိဘတွေကို ရှင်းပြနေတယ်လို့လည်း စုံစမ်းသိရပါတယ်။
အာဏာသိမ်းပြီး ၂ နှစ်အတွင်းမှာ စစ်ကောင်စီဟာ နိုင်ငံတဝှမ်းက မြို့နယ်အသီးသီးက အရပ်သားနေအိမ် ၅၀၀၀၀ ဝန်းကျင်ကို မီးရှို့ ဖျက်ဆီးထားတာ ဖြစ်ပါတယ်။
စစ်ကောင်စီ ဩဇာခံကျောင်းတွေမှာ ကျောင်းသားတွေကို မီးရှို့ခံရတဲ့ ဒေသတွေအတွက် အလှူငွေကောက် တယ်ဆိုတာဟာ ဒီမီးရှို့မှုတွေကို PDF တွေက ကျူးလွန်တယ်ဆိုပြီး ဝါဒဖြန့်ဖို့အတွက် ရည်ရွယ်ထားတာ ဖြစ်မယ်လို့ CDM ကျောင်းဆရာမတစ်ဦးက သုံးသပ်ပါတယ်။
“မီးဘေးသင့် နေရာကိုလှူဖို့ဆိုတာတော့ အကြောင်းရှာတာြဖစ်မယ်။ ကလေးတွေကို ဉီးနှောက်ထဲ ရိုက်ထည့်ချင်လို့ PDF တွေလုပ်လို့ မီးဘေးသင့်ရတယ်ဆိုတဲ့ပုံစံနဲ့ ကျောင်းသားတွေကို ဝါဒဖြန့်တဲ့ သဘောမှာ ရှိတယ်” လို့ သူကဆိုပါတယ်။
တကယ်တမ်းမှာ စစ်ကောင်စီလက်အောက်ခံ အခြေခံပညာကျောင်းများမှာ ဆရာ၊ ဆရာမတွေက ခေါင်းစဉ်အမျိုးမျိုးတပ်ကာ တစ်လ ၄ ကြိမ် နီးပါး ကျောင်းသား၊ ကျောင်းသူတွေဆီက အလှူငွေတွေ ကောက်ခံနေတာလို့ ကျောင်းသားမိဘတွေက ဆိုပါတယ်။
“တစ်လကို ၄ ကြိမ်လောက်ရှိမယ်။ မေးခွန်းကြေး၊ နှုတ်ဆက်ပွဲ၊ လပတ် စာမေးပွဲမအောင်လည်း ပိုက်ဆံကောက်နေတော့တာဘဲ” လို့ ကျောင်းသားမိဘတစ်ဦးက ပြောပါတယ်။
စာသင်ကျောင်းတွေမှာ မီးရှို့ခံနေရသူတွေအတွက် အလှူခံခိုင်းထားတဲ့ စစ်ကောင်စီရဲ့ တပ်တွေဟာ ပြီးခဲ့တဲ့နှစ်ကုန်ပိုင်းက ၅ နှစ်အရွယ် လူမမယ် မူကြိုကလေးများပါ ရှိနေတဲ့ စစ်ကိုင်းတိုင်းအတွင်းက စာသင်ကျောင်းတစ်ကျောင်းကို စစ်သုံးရဟတ်ယာဉ်နဲ့ ပစ်ခတ်တိုက်ခိုက်ခဲ့ပါသေးတယ်။
ဒီပဲယင်းမြို့နယ် လက်ယက်ကုန်းရွာမှာ ဖြစ်ပွားခဲ့တဲ့ ဒီဖြစ်စဉ်မှာ စစ်ကောင်စီတိုက်ခိုက်ရေး ရဟတ်ယာဉ်ရဲ့ စက်သေနတ်နဲ့ ပစ်ခတ်မှုကြောင့် စာသင်ကျောင်းဟာ မွမွကြေလုနီးပါး ဖြစ်ပြီး ကလေးငယ်များအပါအဝင် လူ ၁၂ ဦး သေဆုံးခဲ့ပါသေးတယ်။
MK-010
