မဲခေါင်၊ မေ ၆
ဘင်္ဂလား ပင်လယ်အော်မှာ ဖြစ်ပေါ်နေတဲ့ မိုချား မုန်တိုင်းဟာ မေလ ၉ ရက် ညပိုင်းမှသာ တည်ငြိမ်မှာဖြစ်လို့ မုန်တိုင်းရဲ့ ပြင်းအားနဲ့ ဖျက်ဆီးနိုင်စွမ်းကို အတည်ပြုနိုင်မယ်လို့ မိုးသေဝသ ပညာရှင် ဦးဝင်းနိုင်က ဒီကနေ့ မေလ ၆ ရက်မှာ မဲခေါင်သတင်းဌာနကို ပြောပါတယ်။
မိုးချား မုန်တိုင်းဟာ မြန်မာနိုင်ငံ ကမ်းရိုးတန်း တစ်လျှောက်ကို ဝင်လာနိုင်လို့ ပြည်သူတွေ ပြင်ဆင်ချိန်ရအောင် မိုးလေဝသ အခြေအနေတွေကို သုံးသပ် တင်ပြနေတာ ဖြစ်တယ်လို့ သူကဆိုပါတယ်။
“သေချာတာက မြန်မာနိုင်ငံ ကမ်းရိုးတန်း တစ်နေရာကို ဝင်မယ်။ ဒီလို ဝင်ရောက်လာမှုကြောင့် နိုင်ငံတစ်ဝန်း ထိခိုက်ဆုံးရှုံး မှုတွေကတော့ ရှိလာနိုင်တယ်။ မုန်တိုင်း လွတ်တဲ့ နေရာဆိုလို့ ကချင်ပြည်နယ် ဟိုးအဖျားလေးပဲ ရှိတယ်။ ကျန်တဲ့ နေရာတွေကတော့ အနည်းနဲ့ အများ သက်ရောက်မှုဒဏ်ကို ခံရပါမယ်။ လေဖိအားနည်း ရပ်ဝန်းဖြစ်ပြီး မုန်တိုင်းရဲ့ အရှိန်နဲ့ လမ်းကြောင်းက မေလ ၉ ရက် ည ၁၁ ကျော်လောက်မှ တည်ငြိမ်ပြီး မုန်တိုင်းရဲ့ အရှိန် ဝင်ရောက်နိုင်မှု လမ်းကြောင်းကို အတည်ပြုနိုင်မယ်။ ပြောမယ်ဆို ၁၀ ရက်နေ့လောက်မှ ပြည်သူတွေ သိရမှာ ဆိုတော့ အဲအချိန်ဆို ပြင်ဆင်ဖို့ကို အချိန်မရှိတော့ဘူး” လို့ သူကပြောပါတယ်။
ကြိုတင် ပြင်ဆင်ချိန်နည်းလို့ ပင်လယ်လုပ်သားတွေ၊ ကမ်းရိုးတန်းမှာ နေထိုင်သူတွေနဲ့ စစ်ရှောင် ပြည်သူတွေ ပြင်ဆင်လို့ရအောင် အချိန်နဲ့ တပြေးညီ မိုးလေဝသ ခန့်မှန်းချက်တွေ ထုတ်ပြန်ပေးနေတာ ဖြစ်တယ်လို့ ဦးဝင်းနိုင်က ဆိုပါတယ်။
“လက်ရှိမှာ ပင်လယ်ထဲမှာ လုပ်သားတွေက သောင်းသိန်းချီရှိတာ ဆိုတော့ သူတို့ကို အချိန်မီ ပြန်လာနိုင်အောင် မိုးလေဝသ ခန့်မှန်းချက်တွေ ထုတ်ပြန်ပေးနေတာပါ။ အခုလည်း ပင်လယ်ထဲကနေ တော်တော်များများ ပြန်လာနေကြပါပြီ။ နောက်တစ်ချက်က ကမ်းရိုးတန်းတွေမှာ နေထိုင်တဲ့သူတွေနဲ့ စစ်ရှောင် ပြည်သူတွေပေါ့။ မိုချား မုန်တိုင်းရဲ့ လမ်းကြောင်းကတော့ ကမ်းရိုးတန်း တစ်နေရာကို ဝင်ကိုဝင်မှာ ဆိုတော့ ကြိုပြီး ပြင်ဆင်လို့ရအောင်ပါ” လို့ သူကပြောပါတယ်။
မုန်တိုင်းဟာ မြန်မာ့ ကမ်းရိုးတန်း ဒေသတွေနဲ့ နီးစပ်တဲ့ မွန်၊ ကရင်၊ ပဲခူး၊ ရန်ကုန်နဲ့ ဧရာဝတီတိုင်းတွေမှာ သက်ရောက်မှု ရှိမှာဖြစ်ပြီး နိုင်ငံတစ်ဝန်း မိုးကြီးတာ၊ လေပြင်း တိုက်ခိုက်တာတွေ ဖြစ်လာနိုင်လို့ ပြည်သူတွေ အထူး ပြင်ဆင်ထားဖို့ လိုအပ်တယ်လို့ ဦးဝင်းနိုင်က သုံးသပ်ပြောဆိုပါတယ်။
MK-007
#MeKongNews
#မိုချား
#ဘင်္ဂလားပင်လယ်အော်
#မြန်မာ့ကမ်းရိုးတန်း