မဲခေါင်၊ မတ် ၂၂
မန္တလေးမြို့၊ အောင်မြေသာစံမြို့နယ်မှာ ဒီကနေ့ မနက်ပိုင်းက လက်ဖက်ရည်ထိုင် သောက်နေတဲ့ ရာအိမ်မှူး ၂ ဦးကို အမည်မသိ သေနတ်သမား ၃ ဦးက ပစ်သွားလို့ တစ်ဦးသေကာ နောက်တစ်ဦး ဒဏ်ရာပြင်းထန်ပြီး စိုးရိမ်ရတယ်လို့ ဒေသခံတွေက ပြောပါတယ်။
အောင်မြေသာစံမြို့နယ်၊ အမရဌာနီ အရှေ့ရပ်ကွက်၊ အကွက်အမှတ် (၁၉) ရာအိမ်မှူးစိုးနိုင် နဲ့ ၁၉ (က) ရာအိမ်မှူးဝင်းကို ဆိုသူတို့ လမ်း ၈၀၊ ၇ လမ်းနဲ့ ၈ လမ်းကြားမှာ လက်ဖက်ရည် သောက်နေစဉ် ဆိုင်ထဲဝင် ပစ်သွားတာလို့ ဒေသခံ တစ်ဦးက ဆိုပါတယ်။
လက်ရှိ ဒဏ်ရာပြင်းထန်တဲ့ ရာအိမ်မှူး ဆေးရုံရောက်နေပြီး နောက်ဆုံး အခြေအနေကိုတော့ မဲခေါင်သတင်း အနေနဲ့ စုံစမ်းနေဆဲ ဖြစ်ပါတယ်။
ပစ်ခတ်ခံရသူ ၂ ဦးဟာ NLD အစိုးရ လက်ထက် ကတည်းက ရာအိမ်မှူးတွေဖြစ်ပြီး အာဏာသိမ်းပြီး နောက်ပိုင်း စစ်တပ် ဆန့်ကျင်သူတွေကို စုံစမ်း စစ်ကောင်စီထံ သတင်းပေးနေတယ်လို့ ဒေသခံတွေက ပြောပါတယ်။
အဆိုပါ ပစ်ခတ်မှုကို ဘယ်အဖွဲ့က လုပ်ဆောင်လဲ ဆိုတာ မသိရသေး သလို မြို့ပြပြောက်ကျားတွေ ဘက်က တစ်စုံတစ်ရာ ထုတ်ပြန်ထားတာ မရှိသေးပါဘူး။
မန္တလေးမှာ စစ်ကောင်စီ လက်ပါးစေ ဒေါက်တိုင်တွေ တောက်လျှောက် ရှင်းလင်းခံနေရတာကြောင့် ကာကွယ်ပေးဖို့ စစ်ကောင်စီကို တောင်းဆိုတာတွေ ကျယ်ကျယ်ပြန့်ပြန့် ဖြစ်နေပါတယ်။
MK-007
