မဲခေါင်၊ ဖေဖော်ဝါရီ ၁၁
ချင်းပြည်နယ်၊ မင်းတပ်မြို့မှာ ဖေဖော်ဝါရီ ၈ရက်က ဖြစ်ပွားတဲ့ တိုက်ပွဲမှာ ရဲတပ်သား ၂ဦး သေဆုံးပြီး စစ်ကောင်စီတပ်သား ၂ဦး ဒဏ်ရာရတယ်လို့ ချင်းကာကွယ်ရေးတပ်ဖွဲ့ (မင်းတပ်) CDF – Mindat က မနေ့က သတင်းထုတ်ပြန်ပါတယ်။
စစ်ကောင်စီတပ်နဲ့ CDF – Mindat တို့ မင်းတပ်မြို့ အရှေ့ပြင်ရပ်ကွက် မြို့အဝင်ဂိတ်အနီးမှာ တိုက်ပွဲဖြစ်ခဲ့တာပါ။
အဲဒီတိုက်ပွဲမှာ စစ်ကောင်စီတပ်သားတွေရဲ့ ရမ်းသမ်းပစ်ခတ်မှုကြောင့် တိုက်ပွဲနဲ့ မသက်ဆိုင်တဲ့ အသက် ၁၀နှစ်အရွယ်ကလေးတစ်ဦး ပြင်းထန်စွာဒဏ်ရာရရှိခဲ့ပြီး အသက်ဆုံးရှုံးခဲ့ရတယ်လို့ CDF – Mindatက ဆိုပါတယ်။
ဒါ့အပြင် သေဆုံးသွားတဲ့ ကလေးငယ်အတွက် ကျန်ရစ်တဲ့ မိသားစုဝင်တွေနဲ့ ထပ်တူထပ်မျှ ဝမ်းနည်းကြေကွဲရတယ်လို့လည်း ထုတ်ပြန်ထားပါတယ်။
တိုက်ပွဲအပြီး အထိနာခဲ့တဲ့ စစ်ကောင်စီတပ်သားတွေဟာ မင်းတပ်မြို့၊ အရှေ့ပြင်ရပ်ကွက်အတွင်းရှိ ပြည်သူပိုင်နေအိမ်တွေကို မီးရှို့ခဲ့တယ်လို့ သိရှိရပြီး ဆက်သွယ်ရေး အခက်အခဲတွေကြောင့် နေအိမ်အရေအတွက်ကို အတည်ပြုနိုင်တာမရှိသေးဘူးလို့ CDF – Mindat ထုတ်ပြန်ချက်မှာ ဖော်ပြထားပါတယ်။
မင်းတပ်မြို့နယ်မှာ ဇန်နဝါရီလအတွင်း ထိတွေ့ တိုက်ပွဲဖြစ်ပွားတာမရှိဘဲ စစ်ကောင်စီတပ်က လေကြောင်းမှ တိုက်ခိုက်မှု ၁၁ ကြိမ်ပြုလုပ်ခဲ့ပြီး ပြည်သူအချို့ဒဏ်ရာရရှိကာ ဘာသာရေးအဆောက်ဦး ၂လုံး ၊ ပြည်သူပိုင်အဆောက်အဦး ၁၉လုံး ၊ ဆေးရုံ/ ဆေးခန်း တစ်လုံး ၊ ဆိုင်ကယ် ၈စီး ၊ ကား ၂စီးနှင့် ဆောက်လုပ်ရေးသုံးစက်ပစ္စည်းတစ်ခု ပျက်စီးဆုံးရှုံးခဲ့ရတယ်လို့လည်း သိရပါတယ်။
MK-003
#MeKongNews
