မဲခေါင်၊ မေ ၂၆
စစ်ကိုင်းတိုင်း၊ ဗန်းမောက်မြို့နယ်ထဲက တိုက်ပွဲဖြစ်ပွားမှု မရှိတဲ့ နောင်ကန်ရွာကို စစ်တပ်က မနေ့ မေလ ၂၅ ရက်နေ့၊ ည ၉ နာရီကျော်မှာ တိုက်လေယာဉ် ၂ စင်းနဲ့ ဗုံးကြဲ တိုက်ခိုက်ခဲ့တယ်လို့ ဒေသခံတွေက ပြောပါတယ်။
အဆိုပါ တိုက်ခိုက်မှုကြောင့် ရွာအတွင်းရှိ နေအိမ် ၆ လုံး ပျက်စီးခဲ့ပြီး အသက် ၆၆ နှစ်အရွယ် အမျိုးသား တစ်ဦးနဲ့ အသက် ၃၃ နှစ်အရွယ် အမျိုးသမီး တစ်ဦး သေဆုံးခဲ့တယ်လို့ Banmauk Revolution-BR က ဒီကနေ့ ထုတ်ပြန်ပါတယ်။
ပြီးခဲ့တဲ့ မေလ ၂၀ ရက်နေ့ကစပြီး ဗန်းမောက်မြို့နယ်၊ ကြောင်လည်၊ မံထွန်ရွာ အနီးမှာ စစ်ကောင်စီတပ်နဲ့ ကာကွယ်ရေးတပ်တို့ တိုက်ပွဲ ဖြစ်ပွားခဲ့ရာ မေလ ၂၄ ရက်နေ့ တိုက်ပွဲက အပြင်းထန်ဆုံးဖြစ်ပြီး စစ်ကောင်စီတပ် ထိခိုက် သေဆုံးမှု များပြားပြီး ကြောင်လည်ရွာကနေ ပြန်ဆုတ်သွားခဲ့တယ်လို့ သိရပါတယ်။
“အဲ့ဒီတိုက်ပွဲမှာ ၂၀ ကျော် သေတယ်လို့တော့ ပြောပါတယ်။ ဖြစ်နေတာကတော့ ဧပြီလထဲကပါ။ တချို့ဆို အလောင်း မကောက်ဘဲ ထားထားလို့ သင်္ဂြိုဟ်ပေးရတာတွေတောင် ရှိပါတယ်” လို့ BR အဖွဲ့ တာဝန်ရှိသူက ဆိုပါတယ်။
ကြောင်လည်ရွာတိုက်ပွဲမှာ စစ်ကောင်စီဘက်က ဗိုလ်အဆင့်ရှိသူ တစ်ဦး သေဆုံးခဲ့ရာ အဆိုပါ ဗိုလ်ဖြစ်သူကို ဆွဲထုတ်ဖို့ ကြိုးစားရင်း စစ်ကောင်စီတပ်သား အယောက် ၂၀ ဝန်းကျင် ပစ်ကွင်းထဲမှာ သေဆုံးခဲ့တယ်လို့ BR အဖွဲ့က ထုတ်ပြန်ထားပါတယ်။
တိုက်ပွဲ ဖြစ်ပွားနေစဉ် စစ်ကောင်စီဘက်က လေကြောင်း တိုက်ခိုက်မှုတွေ အကြိမ်ကြိမ် ပြုလုပ်ခဲ့ပြီး လူနေ ရပ်ကွက်တွေကို လက်နက်ကြီးနဲ့ ပစ်ခတ်တာတွေ ပြုလုပ်ခဲ့တယ်လို့ ဒေသခံတွေက ဆိုပါတယ်။
ဗန်းမောက်မြို့နယ်မှာ ဖြစ်ပွားနေတဲ့ စစ်ကောင်စီတပ်နဲ့ ပြည်သူ့ကာကွယ်ရေးတပ် တိုက်ပွဲတွေကြောင့် ကြောင်လည်၊ မံထွန်၊ မံစီကြီး၊ မံလူ၊ ကံကြီးကုန်းရွာ တဝိုက်က ဒေသခံတွေ နေရပ်စွန့်ခွာ ထွက်ပြေး တိမ်းရှောင် နေရတယ်လို့ ဒေသခံတွေထံက သိရပါတယ်။
စစ်အာဏာသိမ်းပြီးနောက်ပိုင်း စစ်ရေးပဋိပက္ခတွေကြောင့် စစ်ကိုင်းတိုင်းမှာ ဒေသခံ ၇ သိန်းခွဲကျော် နေရပ်စွန့်ခွာ ထွက်ပြေးတိမ်းရှောင် နေရတယ်လို့ ကုလသမဂ္ဂ လူသားချင်း စာနာမှုဆိုင်ရာ ညှိနှိုင်းရေးရုံး UNOCHA က ထုတ်ပြန်ထားပါတယ်။
MK-009
#MeKongNews
#ဗန်းမောက်မြို့နယ်
#တိုက်လေယာဉ်
#UNOCHA