မဲခေါင်၊ ဇူလိုင် ၁၈

လက်ရှိ ရင်ဆိုင် ကြုံတွေ့နေရတဲ့ နိုင်ငံရေး အကြပ်အတည်းတွေကို အဖြေရှာ ကျော်လွှားနိုင်ရေးနဲ့ အနာဂတ် ပြည်ထောင်စုသစ် တည်ဆောက်ရေးဟာ လူတစ်စု လူတမျိုးတည်းရဲ့ မူပိုင်အရေး မဟုတ်ဘူးလို့ ရှမ်းပြည်တိုးတက်ရေးပါတီ SSPP က ဒီကနေ့မှာ ထုတ်ပြန် ကြေညာလိုက်ပါတယ်။

ဇူလိုင်လ ၁၆ ရက် ရက်စွဲနဲ့ ဒီကနေ့ ထုတ်ပြန်ခဲ့တဲ့ SSPP ရဲ့ ၆ လပတ်အစည်းအဝေး ထုတ်ပြန်ချက်မှာ အဲ့ဒီလို ဖော်ပြထားတာ ဖြစ်ပါတယ်။

“လက်ရှိ နိုင်ငံရေး အကြပ်အတည်းတွေကို အဖြေရှာကျော်လွှားနိုင်ဖို့နဲ့ အနာဂတ်ပြည်ထောင်စု တည်ဆောက်နိုင်ရေးဟာ လူတစ်စု လူမျိုးတစ်မျိုးတည်းရဲ့ မူပိုင်အရေးမဟုတ်ဘဲ ပြည်ထောင်စုသား တိုင်းရင်းသား လူမျိုးတိုင်းရဲ့ သမိုင်းပေး တာဝန်ဖြစ်တဲ့အတွက် စုပေါင်း တာဝန်ယူဖြေရှင်းကြရမယ်” လို့ SSPP က ၎င်းတို့သဘောထားကို ထုတ်ပြန်ချက်မှာ ဖော်ပြထားပါတယ်။

ဒါ့အပြင် ဖက်ဒရယ် ဒီမိုကရေစီ ပြည်ထောင်စု တည်ဆောက်ရန်အတွက် ဖက်ဒရယ်နဲ့ ဒီမိုကရေစီ လိုလားတဲ့ အင်အားစုများနဲ့ လက်တွဲကြိုးပမ်းဆောက်ရွက်သွားမယ်လို့လည်း ရှမ်းပြည်တိုးတက်ရေးပါတီ SSPP က ဆိုပါတယ်။

SSPP ရဲ့ ထုတ်ပြန်ချက်ဟာ လက်ရှိ နိုင်ငံရေးအကြပ်အတည်းကို အားလုံးနဲ့ ဆိုင်တယ်ဆိုတဲ့ သူတို့ရဲ့ အမြင်ကို ပြသတာဖြစ်တယ်လို့ ရှမ်းပြည်အရေး လေ့လာသူ တစ်ဦးကပြောပါတယ်။

“အခြား အဖွဲ့အစည်းတွေက လက်ရှိ အကြပ်အတည်းကို ဗမာချင်း ပြဿနာလို့ မြင်သော်လည်း SSPP က လက်ရှိ အကြပ်အတည်းဟာ အားလုံးနဲ့ဆိုင်တယ်လို့ မြင်တယ်ဆိုတာကို ပြတာဖြစ်တယ်” လို့ သူကပြောပါတယ်။

နိုင်ငံအတွင်း အလိုအပ်ဆုံး အရာဖြစ်တဲ့ အမျိုးသားစည်းလုံးညီညွတ်ရေးနဲ့ ရေရှည်တည်တံ့ခိုင်မြဲတဲ့ ငြိမ်းချမ်းရေး တည်ဆောက်နိုင်ရန်အတွက် တန်းတူရေးနဲ့ ကိုယ်ပိုင်ပြဌာန်းခွင့်ကို အာမခံနိုင်တဲ့ ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးက အဖြေဖြစ်တယ်လို့ SSPP ကပြောပါတယ်။

ဒါ့အပြင် ကလေးတိုင်း အခြေခံ ပညာတတ်မြောက်ရေးအတွက် ပညာရေးမူဝါဒသစ် ချမှတ်ပြီး ဆောင်ရွက်သွားမယ်လို့လည်း SSPP က ပြောပါတယ်။

SSPP ရဲ့ ၆ လပတ်အစည်းအဝေးမှာ မူးယစ်ဆေးဝါး ပပျောက်ရေးအတွက် ပိုမို တိုက်ဖျက်နှိမ်နှင်းရန်နဲ့ လူထုအကျိုးပြု ဘက်စုံဖွံ့ဖြိုးတိုးတက်ရေး လုပ်ငန်းများ ဆင်းရဲမွဲတေမှု ပပျောက်ရေးလုပ်ငန်းများကို ဆက်လက်ဆောင်ရွက်သွားမယ်လို့လည်း ထုတ်ပြန်ထားပါတယ်။

SSPP ရဲ့ ထုတ်ပြန်ချက်နဲ့ ပတ်သက်ပြီး ထုတ်ပြန်ထားတဲ့ ဆက်သွယ်ရန် ဖုန်းနံပါတ်တွေကို ဆက်သွယ်မေးမြန်း ပေမယ့် ဖုန်းလက်ခံ ဖြေဆိုခြင်းမရှိပါဘူး။

ဒီ ၆ လပတ်အစည်းအဝေးမှာ SSPP တာဝန်ရှိသူ ၄၄ ဦးတက်ရောက်ခဲ့ပြီး ၆ လအတွင်း ဆောင်ရွက်ချက်များ၊ စစ်ရေး၊ နိုင်ငံရေး၊ အုပ်ချုပ်ရေး၊ စီးပွားရေး၊ လူမှုရေး စတဲ့ အခြေအနေအရပ်ရပ်ကို ဆွေးနွေးခဲ့တယ်လို့လည်း ထုတ်ပြန်ချက်မှာ ဖော်ပြထားပါတယ်။

CJ-002

#MekongNews

#SSPP

#ဖက်ဒရယ်

#မူးယစ်ဆေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)