မဲခေါင်၊ အောက်တိုဘာ ၁၀
စံချိန်တင် ရေကြီးမှုနဲ့ ကြုံတွေ့နေရတဲ့ ပဲခူးမြို့မှာ အောက်တိုဘာလ ၁၀ရက် ညနေပိုင်းအထိ သိသိသာသာ ရေကျဆင်းခြင်းမရှိသေးဘူးလို့ မြို့ခံတွေထံကနေ သိရပါတယ်။
အောက်တိုဘာလ ၈ရက်ညနေပိုင်းကစပြီး တက်လာတဲ့ရေဟာ ဒီနေ့မနက်ပိုင်းမှာတော့ တန့်နေခဲ့ပြီး နေ့လည်ပိုင်းမှာ အနည်းငယ်သာ ကျဆင်းသေးတယ်လို့ ရှင်စောပုရပ်ကွက်နေပြည်သူတစ်ဦးက ပြောပါတယ်။
“မနက်ပိုင်းလောက်ကနဲ့ယှဉ်ရင် တမိုက်လောက်(၅လက်မခန့်) လောက်ပဲကျသေးတယ်။ တန့်နေတယ်လို့ပဲပြောရမယ်။ မိုးကလည်း အုံ့နေတုန်းပဲ” လို့ သူက ပြောပါတယ်။
ဒါ့အပြင် ရွှေမော်ဓောဘုရား တောင်ဘက်မုဒ် ရပ်ကွက်တွေဖြစ်တဲ့ ဆံတော်တွင်းရပ်ကွက်နဲ့ အနီးတဝိုက်မှာလည်း ရေမကျသေးသလို ပုံမှန်ရေကြီးလေ့ရှိတဲ့ ကလျာဏီရပ်ကွက်ထဲမှာလည်း ရေအကျနှေးနေတယ်လို့ ဒေသခံတွေထံက သိရပါတယ်။
“တစ်နေကုန်မှ တစ်လက်မခွဲလောက်ပဲကျတယ်။ မိုးကလည်း နည်းနည်းရွာသေးတယ်။ ရေကများတုန်းပဲ။ အရင်တစ်ခါက ရေကျမြန်တယ်။ အခုက ရေကျနှေးတယ်” လို့ ကလျာဏီရပ်ကွက်အတွင်း နေထိုင်သူတစ်ဦးက ပြောပါတယ်။
ရေကြီးနစ်မြုပ်မှုကြောင့် သေဆုံးသူလည်း ရှိလာပြီး ပုဏ္ဏားစုရပ်ကွက်၊ မှော်ကန် (၂၄)လမ်းမှာ အမျိုးသားအလောင်းတစ်ဦး တွေ့ရတယ်လို့ ပဲခူးမြို့ခံ လူမှုကွန်ယက်သုံးစွဲသူတွေက ရေးသားထားပါတယ်။
ရေကြီးနစ်မြုပ်မှုကြောင့် ဒုက္ခရောက်နေသူတွေကို ဝိုင်းဝန်းကူညီသူတွေရှိနေသလို ကုန်ဈေးနှုန်း မြှင့်တင်ရောင်းချသူတွေလည်းရှိနေပြီး ကန်စွန်းရွက်တစ်စီးကို ကျပ်တစ်ထောင်၊ ချဉ်ပေါင်ရွက်တစ်စီးကို ကျပ် ၅၀၀ ပေးဝယ်ရတာတွေရှိတယ်လို့ ဒေသခံတွေက ပြောပါတယ်။
ပဲခူးမြို့ဟာ နှစ်ပေါင်း ၁၀၀ နီးပါးအတွင်း အဆိုးရွားဆုံး ရေကြီးနစ်မြုပ်မှုနဲ့ ရင်ဆိုင်နေရတာ ဖြစ်ပါတယ်။
MK – 004
