မဲခေါင်၊ ဩဂုတ် ၂၉
ရှမ်းပြည်နယ် တောင်ပိုင်း၊ ပင်လောင်းမြို့နယ်၊ နမ်းတုတ်ကျေးရွာမှာ နေထိုင်တဲ့ စစ်ကောင်စီ လက်အောက်ခံ PNO ပြည်သူ့စစ် တိုက်နယ် ခေါင်းဆောင် ဆိုသူကို မနေ့ညက ဝင်ရောက် ဖမ်းဆီးရာ ပြန်လည် ခုခံမှုကြောင့် ပစ်ခတ်မှုဖြစ်ပြီး သေဆုံးသွားတယ်လို့ ဖယ်ခုံ PDF (၁၀၀၆) တပ်ရင်း တာဝန်ရှိသူ တစ်ဦးက ပြောပါတယ်။
ဝင်ရောက် ဖမ်းဆီးစဉ် သေဆုံးသူ ပြည်သူ့စစ် ခေါင်းဆောင်ထံမှ ပစ္စတိုသေနတ် တစ်လက်၊ ၉ မမ ကျည်ဆံ၊ လက်ပစ်ဗုံးနဲ့ ယာဘ ဆေးပြားတွေ သိမ်းဆည်းရမိ ခဲ့တယ်လို့ သူကပြောပါတယ်။
“လူမျိုးရေးကြောင့် မဟုတ်ဘဲ စစ်ရေးပစ်မှတ်တစ်ခု အနေနဲ့ ရှင်းရတာပါ။ အသာတကြည် မခုခံရင်တော့ ခေါ်ယူ ထိန်းသိမ်းတဲ့ အဆင့်နဲ့ ပြီးသွားမှာပါ။ ပြောချင်တာက ပြည်သူကို ဒုက္ခပေးရင်၊ တော်လှန်ရေးကို ထိခိုက်စေရင် ပြည်သူ့အားနဲ့ အရိပ်လို လိုက်နေတဲ့လူတွေ အမြဲရှိနေတယ်။ ပြေးမလွတ်စေရဘူး” လို့ ဖယ်ခုံ PDF တာဝန်ရှိသူ တစ်ဦးက ပြောပါတယ်။
သေးဆုံးသွားတဲ့ PNO ပြည်သူ့စစ်ဟာ ပြည်သူလူထုကို အနိုင်ကျင့်တာ၊ ဒေသတွင်း ယာဘ ဆေးပြားတွေ ရောင်းချတာတွေကြောင့် ဖမ်းဆီး ထိန်းသိမ်းဖို့ သွားတာဖြစ်ပေမယ့် ရဲဘော်တွေကို ပြန်လည်ခုခံ ပစ်ခတ်လို့ ပစ်ခတ်မှုဖြစ်ပြီး သေဆုံးခဲ့ရတာ ဖြစ်တယ်လို့ သူကပြောပါတယ်။
“PNO အဖွဲ့ဝင် တစ်ဦးဖြစ်ပြီး PNOကို လူသစ်စုပေးတာတွေ၊ လက်နက်ဝယ်ဖို့ လူထုထံ ငွေကောက်တာတွေ အပြင် PNOမှာ လက်နက်ကိုင်ရတာကို အခွင့်ကောင်းယူပြီး မူးယစ်ဆေး ရောင်းချတာ အပါအဝင် စကစ ဒေါက်တိုင် လုပ်ပြီး လူထုကို အနိုင်ကျင့်နေသူ ဖြစ်တယ်။ ဒါအပြင် ၂၀၂၂ က ဖယ်ခုံမြို့နယ်၊ လွယ်ပေါကျေးရွာအုပ်စု အတွင်း စစ်ကြောင်းထိုးစဥ် စစ်ကြောင်းထိုးပြီးနောက် ကျေးရွာပြည်သူပိုင် ယိုးဒယားကိုင်းရှည်ခေါ် ထွန်စက်ငယ်များကို အစီးရေ အမြောက်အများကို အယ်ဝေးတို့ အဖွဲ့က ကားကြီး ကားငယ်များဖြင့် တိုက်ယူ သယ်ဆောင်ခဲ့ပါတယ်” လို့ ဖယ်ခုံ PDF တာဝန်ရှိသူက ဆက်ပြောပါတယ်။
သူဟာ ပင်လောင်းမြို့နယ်တောင်ပိုင်း၊ PNO ပြည်သူ့စစ် တိုက်နယ် ခေါင်းဆောင် အဆင့်ရှိတဲ့ မောင်ဝင်း ဆိုသူရဲ့ တပည့် လက်ထောက် တစ်ဦးလည်း ဖြစ်တယ်လို့ ဆိုပါတယ်။
မောင်ဝင်း ဆိုသူရဲ့ နေအိမ်ကိုလည်း ဖယ်ခုံ PDF က ပြီးခဲ့တဲ့ သြဂုတ်လ ၂၁ ရက်နေ့မှာ ဝင်ရောက်စီးနင်းခဲ့ရာ အစည်းအဝေးသွားနေတာကြောင့် လူကိုမဖမ်းမိဘဲ လက်နက်ခဲယမ်းတွေကိုသာ သိမ်းဆည်းရမိခဲ့ပါတယ်။
မနေ့ညက နမ်းတုတ်ရွာမှာရှိတဲ့ နေအိမ် စီးနင်းခံရချိန် ပစ်ခတ်မှုဖြစ်လို့ ပြည်သူ့စစ် ခေါင်းဆောင် သေဆုံးသွားတယ်လို့ ဒေသခံတွေက အတည်ပြုပါတယ်။
“ဘယ်အဖွဲ့က လုပ်သွားလဲတော့ မသိဘူးပေါ့နော်။ မနေ့ည ၈ နာရီအချိန်လောက်မှာ ဖြစ်သွားတာ။ သူက ပြောရရင် နာမည်တအားဆိုးတဲ့လူပဲ။ ဒေသတွင်းမှာလည်း စကစနဲ့ပေါင်းပြီး လောင်းကစားဝိုင်းတွေ ဖွင့်စားတယ်။ ပိုက်ဆံတွေ ကောက်တယ်။ လူထုကို အနိုင်ကျင့်တော့ ဝဋ်လည်တယ်လို့ ပြောရမှာပေါ့” လို့ ပင်လောင်းမြို့နယ် ဒေသခံ တစ်ဦးက ပြောပါတယ်။
ဒီစွပ်စွဲမှုတွေနဲ့ ပတ်သက်ပြီး မဲခေါင်သတင်းဌာန အနေနဲ့ သီးခြား အတည်ပြုနိုင်တာ မရှိသေးပါဘူး။
ပစ်ခတ်မှုအတွင်း သေဆုံးသွားတဲ့ PNO ပြည်သူ့စစ်ရဲ့ ရုပ်အလောင်းကိုတော့ ဒီကနေ့ မနက်မှာ PNO ပြည်သူ့စစ်နဲ့ စစ်ကောင်စီအင်အား ၃၀ ခန့်က လာရောက် သယ်ယူသွားတယ်လို့ စုံစမ်းသိရှိရပါတယ်။
CJ-002
#MeKongNews
#ပင်လောင်းမြို့နယ်
#ဖယ်ခုံ_PDF
#PNO_ပြည်သူ့