မဲခေါင်၊ စက်တင်ဘာ ၁၂
ကရင်နီပြည်နယ်၊ ဒီးမော့ဆိုမြို့နယ် အနောက်ဘက်ခြမ်းမှာရှိတဲ့ စစ်ရှောင်စခန်း ၂ ခုကို စက်တင်ဘာလ ၉ ရက်နဲ့ ၁၀ ရက်နေ့က ရိက္ခာ၊ အဝတ်ထည်တွေနဲ့ လိုအပ်တာတွေ ကူညီပေးခဲ့တယ်လို့ Jobs for Kayah အဖွဲ့ တာဝန်ရှိသူ တစ်ဦးက ပြောပါတယ်။
စစ်ရှောင်စခန်း တစ်ခုမှာ ကြက်ဥ၊ ငါးသေတ္တာ၊ ဆန်၊ အမျိုးသမီး အမျိုးသား အတွင်းဝတ် အထည်တွေ၊ မုန့်နဲ့ မုန့်ဖိုးတွေ သွားရောက် ကူညီပေးခဲ့တယ်လို့ သူက ပြောပါတယ်။
“ ရိက္ခာတွေ ပြတ်တောက်လာတဲ့ အတွက် ကျွန်တော့်ကို အကူညီတောင်းလို့ အရေးပေါ် ကူညီပေးဖြစ်တာပါ။ ပြီးတော့ ကလေး ၁၀၀ ကျော်အတွက် တစ်ဦးကို ၁,၀၀၀ နှုန်း မုန့်ဖိုးနဲ့ မုန့်တွေ ပေးခဲ့ပါတယ်” လို့ သူက ဆက်ပြောပါတယ်။
နောက်ထပ် စစ်ရှောင်စခန်း တစ်ခုမှာတော့ စာရေးကိရိယာတွေ၊ သင်ထောက်ကူ၊ ကလေး အဝတ်ထည်၊ လူကြီး အတွင်း အဝတ်အထည်တွေ သွားရောက် ကူညီပံ့ပိုးပေး ခဲ့တယ်လို့ ဆိုပါတယ်။
စစ်ရှောင်စခန်းက စာသင်ကျောင်း တစ်ခုက Jobs for Kayah အဖွဲ့က ဆောက်လုပ်ပေးခဲ့တာ ၆ လကျော် ကြာသွားပြီ ဖြစ်လို့ မိုးကာတွေ ဆွေးမြေ့နေတာကြောင့် မိုးကာ သို့မဟုတ် သွပ်ပြား လိုအပ်နေတယ်လို့ ဆိုပါတယ်။
စစ်ရှောင်စခန်းတွေမှာ အိမ်ခြေ ၅၀ ဝန်းကျင်ရှိပြီး လူဦးရေ ၂၄၀ ကျော် နေထိုင်ကာ ရိက္ခာနဲ့ တခြား အသုံးအဆောင်တွေ လိုအပ်နေပြီး အခက်အခဲများစွာ ကြုံတွေ့နေရတယ်လို့ သိရပါတယ်။
ကရင်နီပြည်နယ်မှာ စစ်ဘေးရှောင် ပြည်သူ ၂ သိန်းခွဲကျော်ရှိနေပြီး ကာလကြာမြင့်လာတာနဲ့အမျှ ရိက္ခာ၊ ဆေးဝါး၊ မိုးကာနဲ့ အသုံးအဆောင်တွေ လိုအပ်နေတယ်လို့ စစ်ရှောင်အရေး ကူညီပေးသူတွေက ပြောပါတယ်။
CJ-004
#MeKongNews
#ဒီးမော့ဆို
#စစ်ဘေးရှောင်
#Jobs_for_Kayah