မဲခေါင်၊ မတ် ၂၁
ကရင်နီပြည်၊ ဒီးမော့ဆိုအနောက်ဘက် စစ်ရှောင်စခန်းတစ်ခုမှာ လူငယ်စွမ်းရည်မြှင့်တင်ဖို့ နွေရာသီသင်တန်း ၃ရက်တာ ပြုလုပ်ခဲ့တယ်လို့ ကရင်နီပြည်စစ်ရှောင်ကူညီစောင့်ရှောက်ရေးကွန်ရက်ထံကနေ သိရပါတယ်။
မတ်လ ၁၇ ရက်နေ့ကနေ ၁၉ ရက်နေ့ထိ သုံးရက်တာ သင်တန်းမှာ လူ့အခွင့်အရေး၊ မူးယစ်ဆေးဝါးအသိပညာပေး၊ လူငယ်စိတ်ဓာတ်မြှင့်တင်ပေးရေး၊ ကတ်သလစ်လူငယ်တွေအများစုရှိတာကြောင့် ယုံကြည်ခြင်းနဲ့ ဆုတောင်းခြင်းစတဲ့ ခေါင်းစဉ်တွေနဲ့ ဆက်စပ်တဲ့ အကြောင်းအရာတွေကို နယ်ပယ်အသီးသီးက သင်တန်းဆရာတွေ လာရောက်ပို့ချပေးခဲ့တယ်လို့ ကွန်ယက်ပြန်ကြားရေး တာဝန်ခံက မဲခေါင်ကို ပြောပါတယ်။
ကရင်နီပြည်နယ်တွင်းမှာ လူငယ်အချင်းချင်း ပိုမိုသင့်မြတ်ရင်းနှီးဖို့နဲ့ စစ်ရှောင်ပြည်သူအချင်းချင်း လူတန်းစားမေတ္တာ ပိုမိုတိုးပွားနိုင်ဖို့၊ အချင်းချင်းအပြန်အလှန် ဖေးမကူညီမျှဝေဖို့၊ လူငယ်တွေက အနာဂတ်အတွက် အကျိုးပြုနိုင်စေဖို့ ရည်ရွယ်ပြီး သင်တန်းကိုကြိုးစားပြုလုပ်ခဲ့တယ်လို့ သူက ဆိုပါတယ်။
“လက်ရှိလူငယ်တွေက အရမ်းကို သူတို့ရဲ့ ရည်ရွယ်ချက်၊ အိပ်မက်တွေက ပျောက်သွားတယ်။ မရှိတော့သလောက်ရှိတယ်။ စိတ်အတိုင်း စိတ်လိုရာအတိုင်းလိုက်သွားကြတယ်။ စိတ်လေကြတဲ့အခါကျတော့ ဒီလိုလုပ်တာက လူငယ်တွေကို ပြန်ပြီးစုစည်းချင်တာလည်းပါတယ်။ စိတ်ဓာတ်ကျတဲ့လူငယ်တွေ ပိုပြီးတော့မြှင့်တင်ဖို့အတွက်ဖြစ်တယ်“ လို့ ကရင်နီပြည်စစ်ရှောင်ကူညီစောင့်ရှောက်ရေးကွန်ရက် ပြန်ကြားရေးတာဝန်ရှိသူက မဲခေါင်သတင်းကိုပြောပါတယ်။
သင်တန်းပြုလုပ်ခဲ့တဲ့ စစ်ရှောင်စခန်းမှာ လွန်ခဲ့တဲ့ တစ်နှစ်ခွဲကျော်ကစပြီး ပြည်သူ ၁,၀၀၀ ကျော် လာရောက်စစ်ရှောင်နေကြရတာဖြစ်ပြီး လူငယ် ၁၅၀ ဝန်းကျင်ရှိရာမှာ ၁၂၅ ဦး တက်ရောက်ခဲ့တယ်လို့သိရပါတယ်။
ကရင်နီမှာ ကိုဗစ်ကာလကနေစပြီး အခုချိန်ထိ လူငယ်သင်တန်းတွေမကျင်းပဖြစ်တာ လေးနှစ်ဝန်းကျင်ရှိနေတာကြောင့် လူငယ်တွေက စိတ်ပါဝင်စားစွာနဲ့ တက်ရောက်ခဲ့ကြပြီး နောက်ထပ်သင်တန်းတွေပြုလုပ်ပေးဖို့ တောင်းဆိုခဲ့ကြတယ်လို့ ဆိုပါတယ်။
ကရင်နီပြည်နယ်တွင်းမှာ စစ်တပ်နဲ့ KNDF၊ PDF ပူးပေါင်းတပ်ဖွဲ့တွေ တိုက်ပွဲပြင်းထန်စွာဖြစ်ပွားလျက်ရှိပြီး ဒေသခံပြည်သူ နှစ်သိန်းကျော် နေရပ်စွန့်ခွာထွက်ပြေးတိမ်းရှောင်နေကြရတယ်လို့ စစ်ဘေးရှောင်ကူညီနေသူတွေထံက သိရပါတယ်။
MK – 009
