မဲခေါင်၊ ဖေဖော်ဝါရီ ၁၀
ကရင်နီပြည်နယ်၊ ဒီးမော့ဆိုမြို့နယ် အနောက်ဘက်ခြမ်းမှာရှိတဲ့ စစ်ရှောင်စခန်းတခုမှာ ဒီနေ့ ဖေဖော်ဝါရီ ၁၀ ရက်မှာ ဆန်ပြတ်လပ်နေပြီလို့ စစ်ရှောင်စခန်းတာဝန်ခံတစ်ဦးက မဲခေါင်သတင်းဌာနကို ပြောပါတယ်။
“ ကျွန်တော်တို့ စခန်းမှာ နောက်နှစ်ရက်လောက်ဆို ရိက္ခာပြတ်လပ်ပြီပေါ့နော်။ တချို့အိမ်တွေဆို တအိမ်ကို လူ ၇ ယောက်လောက်ရှိတယ်။လူဦးရေများတဲ့အိမ်ဆိုရင် ဆန်ပြတ်လပ်နေပြီပေါ့နော်။ မိုးကာကတော့ စုတ်တော့စုတ်နေပေမယ့် ဆန်ကတော့ အဓိကပေါ့” လို့ စစ်ရှောင်ကော်မတီဝင်အမျိုးသားက ပြောပါတယ်။
ခါနန်စစ်ရှောင်စခန်းက အိမ်ခြေ ၃၃ အိမ်မှာ အသက် ၁၈ နှစ်အောက်ကလေး အယောက် ၆၀ ကျော်၊ သက်ကြီးရွယ်အို ၈ ယောက်၊ ကျန်းမာရေးချို့ယွင်းသူ ၇ အပါအဝင် လူဦးရေ ၁၄၀ ကျော်နေထိုင်နေကြတယ်လို့ သိရပါတယ်။
ဒီးမော့ဆိုနယ်အရှေ့ဘက်ခြမ်းကနေ ၂ နှစ်ကျော်စစ်ရှောင်နေရသူတွေ၊ လွိုင်ကော်မြို့ကနေ ၃ လကျော်ကြာစစ်ရှောင်နေရသူတွေ စုပေါင်းနေထိုင်နေကြတယ်လို့ဆိုပါတယ်။
ကရင်နီပြည်နယ်က စစ်ဘေးရှောင်ပြည်သူတွေဟာ ဒီးမော့ဆိုမြို့နယ် အနောက်ဘက်ခြမ်းကို အဓိက စစ်ဘေးရှောင်နေကြရပြီး ရှမ်းပြည်နယ်တောင်ပိုင်းက မြို့နယ်တွေနဲ့ နီးစပ်ရာ ဆွေမျိုးသားချင်းတွေရဲ့ နေအိမ်တွေမှာ စုပေါင်းနေထိုင်တာတွေလည်းရှိတယ်လို့ သိရပါတယ်။
ဒီးမော့ဆိုမြို့နယ် အနောက်ဘက်ခြမ်းမှာ စစ်ဘေးရှောင်ပြည်သူ ၁ သိန်းကျော်အထိရှိပြီး စားနပ်ရိက္ခာတွေ၊ ဆေးဝါးတွေ၊ သောက်သုံးရေနဲ့ မိုးကာတွေလည်း လိုအပ်နေပြီး စစ်ရှောင်ကာလ ကြာလာတာနဲ့အမျှ အခက်အခဲအများကြီးနဲ့ ရင်ဆိုင်နေရတယ်လို့ စစ်ဘေးရှောင်ပြည်သူတွေက ပြောပါတယ်။
Cj 004
#MeKongNews
#ဒီမော့ဆို
#စစ်ရှောင်
#ဆန်ပြတ်
#ရိက္ခာ