မဲခေါင်၊ ဇူလိုင် ၁၄
ကရင်နီပြည်နယ်၊ ထိုင်း-မြန်မာနယ်စပ်ရှိ ဒေါနိုးကူ စစ်ရှောင်စခန်းကို လေကြောင်း တိုက်ခိုက်မှုကြောင့် ထိုင်းဘက် ထွက်ပြေး တိမ်းရှောင်ခဲ့ရတဲ့ စစ်ရှောင် ၅,၀၀၀ ဝန်းကျင်ဟာ ထိုင်းနယ်စပ်မှာ အရေးပေါ် အကူအညီတွေ လိုအပ်နေတယ်လို့ စစ်ရှောင် ကူညီနေသူတွေထံက သိရပါတယ်။
ဇူလိုင်လ ၁၃ ရက်၊ မနက် ၁ နာရီ ဝန်းကျင်မှာ စစ်ကောင်စီက ဒေါနိုးကူစခန်းကို အကြောင်းမဲ့ လေယာဉ်နဲ့ ၂ ကြိမ် ဗုံးကြဲ တိုက်ခိုက်ခဲ့တာ ဖြစ်ပါတယ်။
အဆိုပါ တိုက်ခိုက်မှုကြောင့် ကရင်နီဘက်ခြမ်း နယ်စပ်မှာရှိတဲ့ ဒေါနိုးကူ စခန်းက စစ်ရှောင်တွေဟာ တစ် နာရီခွဲ ဝန်းကျင် လမ်းလျှောက်ရတဲ့ ထိုင်းဘက်ခြမ်း နယ်စပ်က ကရင်နီ အမှတ် (၁) ဒုက္ခသည်စခန်းကို ထွက်ပြေး တိမ်းရှောင်ခဲ့ရတယ်လို့ သိရပါတယ်။
“အဲဒီညချိန်မှာပဲ စစ်ရှောင်တွေက ထိုင်းဖက်မှာရှိတဲ့ ဒုက္ခသည်စခန်းကို ပြေးဆင်းလာကြပါတယ်။ ဒေါနိုးကူမှာ ကျန်ခဲ့တာ ဆိုလို့ လူငယ်ပိုင်း နည်းနည်းပဲ ကျန်ပါတယ်။ ၁၀ ပုံမှာ ၉ ပုံလောက်က ပြေးဆင်းလာပါတယ်။ လတ်တလော စားရေးသောက်ရေးတွေ လိုအပ်ပါတယ်။ ယာယီ ခိုလှုံဖို့ အမိုးအကာတွေလည်း လိုအပ်နေပါ သေးတယ်” လို့ စစ်ရှောင်တွေကို ကူညီပေးနေတဲ့ Karenni Civil Society Network – KCSN ပြန်ကြားရေး တာဝန်ရှိသူက မဲခေါင်သတင်းဌာနကို ပြောပြပါတယ်။
လက်ရှိအချိန်မှာတော့ နယ်စပ်က စစ်ရှောင်တွေရဲ့ စားဝတ်နေရေးနဲ့ အရေးပေ ါ်အကူအညီတွေကို ထိုင်း-ကရင်နီ နယ်စပ် အခြေပြု အဖွဲ့အစည်းတွေက အဓိက ကူညီပေးနေတာဖြစ်ပြီး ရေရှည်မှာ ပြင်ပ နိုင်ငံတကာ အဖွဲ့တွေရဲ့ အကူအညီ လိုအပ်လာနိုင်တယ်လို့ KSCN က ဆိုပါတယ်။
ထိုင်း-မြန်မာနယ်စပ် တစ်လျှောက်မှာ ဒုက္ခသည်စခန်း ၉ ခုရှိနေပြီး ၇ ခုက ကရင်ဒုက္ခသည်စခန်း ဖြစ်ကာ ကျန် ၂ ခုကတော့ ကရင်နီဒုက္ခသည်စခန်း ဖြစ်တယ်လို့ သိရပါတယ်။
ကရင်နီပြည်နယ် ဖားဆောင်း၊ ဘောလခဲ၊ ရှားတောစတဲ့ မြို့နယ်တွေက စစ်ရှောင် အများစုဟာ ထိုင်းနယ်စပ်က စစ်ရှောင်စခန်းတွေ အပါအဝင် နယ်စပ်မှာရှိတဲ့ တောတောင်တွေထဲ သွားရောက် နေထိုင်ကြတယ်လို့ စစ်ရှောင် ကူညီသူတွေက ပြောပြကြပါတယ်။
“ထိုင်းအစိုးရက ဒုက္ခသည်လက်ခံရေးမူ မရှိတာကြောင့် လက်မခံချင်ပါဘူး။ ခုလိုမျိုး အခြေအနေအရသာ မတတ်သာလို့ ယာယီခိုလှုံခွင့် ပေးထားပါတယ်။ အခြေအနေ တည်ငြိမ်ရင် သူတို့နေရင်း စခန်းဆီ ပြန်ခိုင်းမှာပါ” လို့ KCSN တာဝန်ရှိသူက ဆက်ပြောခဲ့ပါတယ်။
ပြီးခဲ့တဲ့ ဇွန်လကစပြီး မယ်စဲ့၊ ဖားဆောင်း၊ ရှားတော အပါအဝင် ကရင်နီတွင်းက စစ်ရှောင်စခန်းနေရာတွေကို စစ်ကောင်စီတပ်က လေကြောင်း တိုက်ခိုက်မှုတွေ၊ လက်နက်ကြီး ပစ်ခတ်မှုတွေ လုပ်နေတာကြောင့် ဒေသခံတွေ အနေနဲ့ ပြည်နယ်တွင်း ဘေးလွတ်ရာ ထွက်ပြေး တိမ်းရှောင်နေရတဲ့အပြင် အခုလို ထိုင်းနိုင်ငံထဲ အထိ ထောင်နဲ့ချီ ထွက်ပြေးနေရတာ ဖြစ်ပါတယ်။
စစ်တပ်အာဏာသိမ်းထားတဲ့ ၂ နှစ်ကျော်ကာလမှာ ဒီးမော့ဆို၊ ဖရူဆို၊ ဖားဆောင်း၊ ဘောလခဲ၊ မယ်စဲ့ စတဲ့မြို့နယ် အပါအဝင် မိုးဗြဲ၊ ဖယ်ခုံမြို့နယ်တွေမှာ တိုက်ပွဲတွေ ပိုမိုပြင်းထန်လျက်ရှိရာ တစ်ပြည်နယ်လုံးမှာ စစ်ရှောင် ၃ သိန်း ဝန်းကျင်ထိရှိလာပြီလို့ ကရင်နီ အရပ်ဖက် အဖွဲ့အစည်းတွေထံက သိရပါတယ်။
MK-009
#MekongNews
#ထိုင်းနယ်စပ်
#ဒေါနိုးကူ
#ဒုက္ခသည်