မဲခေါင်၊ ဇွန် ၂၂
ရှမ်းပြည်နယ်၊ တောင်ကြီးမြို့၊ ကျောင်းကြီးစုရပ်ကွက်၊ နယ်မြေ-၁၃၊ နီလာလမ်းသွယ် ၂ ထဲက နေအိမ်တစ်လုံး ဇွန် ၂၂ ရက်က ဖောက်ထွင်းခံရလို့ ငွေကျပ် သိန်း ၁၀၀ ခန့် ပါသွားတယ်ကြောင်း ရပ်ကွက်နေ ပြည်သူတွေက ပြောပါတယ်။
အိမ်နီးနားချင်း တစ်ဦးက “သူတို့က အခုမှ ဒီရပ်ကွက်ထဲ ပြောင်းလာကြတာ တစ်လလောက်ပဲ ရှိဦးမယ်။ နေ့ဘက်လည်း အလုပ်သွားနေကြတော့ ဘယ်သူမှလည်း သူတို့ လင်မယားကို မမြင်ဖူးဘူး။ အမျိုးသားကတော့ ဆရာဝန်လို့ ပြောကြတာပဲ။ သူတို့ နေပြည်တော် ၁၀ ရက် ပြန်သွားပြီး မနက်ပြန်လာတော့မှ ခိုးသွားမှန်း သိတာ” လို့ ပြောပါတယ်။
ခိုးခံရတဲ့ ပစ္စည်းတွေထဲမှာ တီဗွီ TV၊ ရေခဲသေတ္တာ၊ အဝတ်လျှော်စက်၊ ရေတင်စက်၊ ဗီရို၊ ထမင်းပေါင်းအိုး၊ ဒယ်နီ၊ နာရီ စတဲ့ ပစ္စည်းတွေ ပါဝင်ပြီး အတွင်းပစ္စည်း တစ်ခုမကျန် အကုန်ယူသွားတယ်လို့ ဆိုပါတယ်။
“အတွင်းလူထဲကပဲ ဖြစ်မှာပေါ့။ သူတို့ လင်မယား အခုမှ ပြောင်းလာမှန်း သိတဲ့သူ၊ ခရီးသွားတာလည်း သိတဲ့လူထဲကပေါ့။ သူတို့က လူသစ်ဆိုတော့ အိမ်နီးနားချင်းတွေလည်း မမြင်ဖူးကြတော့ ပစ္စည်း သယ်ထုတ်သွားရင်တောင် အိမ်ရှင်လို့ပဲ ထင်ကြမှာလေ” လို့ အိမ်နီးနားချင်း တစ်ဦးက ဆက်ပြောပြပါတယ်။
ဒီနေ့ နေ့လည်ပိုင်းမှာတော့ ဖောက်ထွင်းခံရတဲ့ နေအိမ်ကို စစ်ကောင်စီ လက်အောက်ခံ ရဲတပ်ဖွဲ့တွေ လာရောက်စစ်ဆေးခဲ့ပြီး အမှုဖွင့်ခလည်း သပ်သပ်ထပ်ပေးခဲ့ရတယ်လို့ သိရပါတယ်။
ကျောင်းကြီးစုရပ်ကွက်၊ နီလာလာလမ်းနဲ့ နီလာလမ်းသွယ်တွေထဲမှာ အခုလို ဖောက်ထွင်းခံရတာဟာ ပထမဆုံး အကြိမ်ဖြစ်တာကြောင့် အတွင်းလူတွေထဲကပဲ ဖြစ်နိုင်တယ်လို့ ရပ်ကွက်နေပြည်သူတွေက သုံးသပ် ပြောဆိုထားပါတယ်။
ပြီးခဲ့တဲ့ ဇန္နဝါရီလ ၉ ရက်နေ့တုန်းကလည်း မြို့မဈေး အရှေ့ဘက်၊ City Square ရဲ့ မြေညီထပ်မှာ ဖွင့်လှစ်ထားတဲ့ NICE It ဖုန်းဆိုင် ဖောက်ထွင်းခံရပြီး ငွေကျပ်သိန်းထောင်ချီ ဆုံးရှုံးခဲ့ပါသေးတယ်။
CJ-007
#MeKongNews
#တောင်ကြီး
#ဖောက်ထွင်းမှု