မဲခေါင်၊ ဇူလိုင် ၆
ရှမ်းပြည်နယ်ရဲ့ မြို့တော်၊ တောင်ကြီးမြို့၊ ဗိုလ်ချုပ်အောင်ဆန်းလမ်းပေါ်မှာရှိတဲ့ မြန်မာနိုင်ငံကူးလက်မှတ် ထုတ်ပေးရေးအဖွဲ့ ရုံးခွဲမှာ နိုင်ငံကူး လက်မှတ်-Passport ပြုလုပ်သူတွေ ပွဲစားတွေက တစ်ဆင့် လုပ်နေရပြီး ကျပ် ၇ သိန်းကျော် ကုန်ကျနေတယ်လို့ ကိုယ်တိုင် ပြုလုပ်ခဲ့သူတွေက ပြောပါတယ်။
ပြီးခဲ့တဲ့ မတ်လက ပွဲစားနဲ့ ပြုလုပ်သူတွေဟာ စာအုပ်တစ်အုပ်ကို ငွေကျပ် ၂ သိန်းခွဲကနေ ၃ သိန်းအထိသာ ကုန်ကျပေမယ့် အခု ဇူလိုင်လကစပြီး ပွဲစားတွေဘက်က ဈေးပိုတောင်းလာတာလို့ ဆိုပါတယ်။
“အရင်ကဆို အဲလောက် မပေးရဘူးလေ။ အခုက တစ်ဝက်ကျော်ကို ဈေးတက်လာတာ။ ပွဲစားတွေက တစ်ယောက် ဈေးတက်ရင် ကျန်တဲ့ လူတွေလည်း အကုန် လိုက်တက်တာပဲ။ သူတို့နဲ့ မလုပ်လို့မှ အဆင်မပြေတာ” လို့ မလေးရှားနိုင်ငံမှာ အလုပ်သွားလုပ်ဖို့ စာအုပ်လုပ်နေသူ တစ်ဦးက ပြောပါတယ်။
စစ်ကောင်စီက ရန်ကုန်ရုံးမှာ ၂၀၂၂ ခုနှစ်၊ ဒီဇင်ဘာလ ၅ ရက်နေ့ကစပြီး ကြိုတင်တိုကင် စနစ်ကို ရပ်ခဲ့ပြီးနောက် ကျန်မြို့ကြီးတွေမှာ နိုင်ငံကူးလက်မှတ် ပြုလုပ်ရာမှာ နှေ့နှေးကြန့်ကြာမှုတွေ ရှိလာတာပါ။
အခုလို နှေ့နှေးကြန့်ကြာမှုတွေကြောင့် တောင်ကြီးမြို့မှာ ပွဲစားတွေကိုသာ အားကိုးနေရပြီး ရုံးဝန်ထမ်းတွေက ပွဲစားတွေနဲ့ ပေါင်းရိုက်နေတယ်လို့ ထိုင်းနိုင်ကို သွားရောက်ဖို့ စောင့်ဆိုင်းနေသူ တစ်ဦးက ပြောပါတယ်။
“ပွဲစားနဲ့ မလုပ်လို့ကို မရဘူး။ ဒီတိုင်း သွားလုပ်မယ်ဆို အနည်းဆုံး ၃ လစောင့်ရမယ်။ ဒါတောင် အနည်းဆုံးနဲ့ တွက်ပြထားတာနော်။ ရှေ့မှာ တိုကင်တွေက သောင်းချီတယ်။ အရေးပေါ် မလိုရင်တော့ ရတာပေါ့။ MOU နဲ့ သွားတဲ့ လူတွေကျတော့ ဟိုဘက် သူဌေးက ခေါ်နေပြီး ဒီဘက်က စာအုပ်မရသေးဘူး ဆိုလည်း မဟုတ်သေးဘူးလေ။ ဝန်ထမ်းတွေကလည်း ပွဲစားတွေဆို ချက်ချင်း လုပ်ပေးတာပဲ။ ကျနော့်ရှေ့မှာ ပိုက်ဆံ ပေါ်တင်ပေးတာတွေတောင် တွေ့နေတယ်” လို့ သူကပြောပါတယ်။
နိုင်ငံကူး လက်မှတ် ပြုလုပ်ရာမှာ ပွဲစားတွေကို ကျပ် ၇ သိန်းပေးပြီး လုပ်ခိုင်းပါက တစ်ပတ်အတွင်း စာအုပ် အမြန်ရတဲ့အပြင် တစ်ခြား ကိုယ်တတ်နိုင်တဲ့ ငွေပမာဏကိုလည်း ညှိနှိုင်းလို့ရပြီး ငွေကျပ် ၃ သိန်း ဆိုပါက ၆ လစောင့် လုပ်လို့ ရတယ်လို့ သူက ဆက်ပြောပါတယ်။
တောင်ကြီး ရုံးခွဲမှာ နိုင်ငံကူး လက်မှတ် တစ်ရက်ကို လူ ၁၀၀ သာ လုပ်ပေးပြီး တစ်ရက်တည်းနဲ့ လုပ်ငန်းစဉ် မပြီးပြတ်တာကြောင့် တစ်ခြားနယ်က လာလုပ်သူတွေဟာ ပွဲစားကိုသာ အားကိုးနေရတယ်လို့ ဆိုပါတယ်။
ရန်ကုန်မြို့မှာတော့ နိုင်ငံကူးလက်မှတ် ပြုလုပ်သူ တစ်ရက်ကို အယောက် ၂,၅၀၀ ရှိပြီး အားလုံးနီးပါး ပွဲစားတွေကိုသာ အားကိုးနေရတယ်လို့ ကိုယ်တိုင် ပြုလုပ်ခဲ့သူတွေက ပြောပါတယ်။
CJ-007
#MeKongNews
#တောင်ကြီး
#နိုင်ငံကူးလက်မှတ်
#ပွဲစား