မဲခေါင်၊ စက်တင်ဘာ ၂၆
ရှမ်းပြည်နယ်ရဲ့ မြို့တော်၊ တောင်ကြီးမြို့၊ တောင်ကြီး တက္ကသိုလ်မှာ စာမေးပွဲ ကာလ ရဲနဲ့ စစ်သားတွေ ချထားပြီး လုံခြုံရေး တင်းကျပ်ထားတဲ့ကြားက ဆိုင်ကယ် ၃ စီးနဲ့ ဖုန်း ၂ လုံး ခိုးယူခံရခဲ့တယ်လို့ ကျောင်းသားတွေက ပြောပါတယ်။
စာမေးပွဲ ကျင်းပတဲ့ စက်တင်ဘာလ ၁၈ ရက်ကနေ ၂၅ ရက်အတွင်း ဆိုင်ကယ်ရပ်ဖို့ သတ်မှတ်ထားတဲ့နေရာနဲ့ စာမေးပွဲခန်း အနီးတစ်ဝိုက်မှာ ပျောက်ဆုံးခဲ့တာလို့ ဆိုပါတယ်။
ဆိုင်ကယ်ပျောက်ဆုံးသူ Non-CDM ကျောင်းသား တစ်ဦးက “ကျနော်ကတော့ စာမေးပွဲခန်းရှေ့မှာ ရပ်ထားတာကို ပျောက်တာ။ ဆိုင်ကယ်စတန်းမှာ ရပ်ထားလည်း ပျောက်ရင် တာဝန်မယူမယ့် အတူတူ မျက်စိရှေ့မှာပဲ ရပ်ခဲ့တာကို ပျောက်တာ။ ဆိုင်ကယ်စတန်းမှာလည်း ရဲတွေရော အစောင့်တွေရော ရှိတာကို ပျောက်တယ်ဆိုတော့ စဉ်းစားလို့ မရတော့ဘူး” လို့ ပြောပါတယ်။
ပျောက်ဆုံးတဲ့ ဆိုင်ကယ်တွေဟာ Hoda Dream 125 တစ်စီးနဲ့ Hoda Click 125 ၂ စီးဖြစ်ပြီး ဖုန်းတွေကတော့ Iphone 14 promax နဲ့ Redmi Note 11 pro တို့ ဖြစ်တယ်လို့ ဆိုပါတယ်။
ဆိုင်ကယ် ပျောက်ဆုံးမှုတွေနဲ့ ပတ်သက်ပြီး သက်ဆိုင်ရာ မေဂျာတွေနဲ့ ကျောင်းသားရေးရာကို တိုင်ကြားပေမယ့် အခုချိန်အထိ အရေးယူ ဆောင်ရွက်တာ မရှိသေးဘူးလို့ သိရပါတယ်။
ဖုန်းပျောက်ဆုံးသူ Non-CDM ကျောင်းသား တစ်ဦးက “ဆိုင်ကယ် ဘောက်ထဲမှာ ကျန်ခဲ့ပြီး ပျောက်တာ။ သတိရလို့ သွားကြည့်တော့ ဖုန်းက မရှိတော့ဘူး။ လူစိမ်းတွေ အများကြီးပဲ။ ကျောင်းသားကတ်လည်း မပါကြဘူး” လို့ ပြောပါတယ်။
တောင်ကြီး တက္ကသိုလ်မှာ စာမေးပွဲကာလ မတိုင်ခင်က ကျောင်းသားကတ်ပါမှသာ ဝင်ခွင့်ပြုခဲ့ပေမယ့် စာမေးပွဲကာလရောက်မှ ကျောင်းသားကတ်မပါတဲ့ လူစိမ်းတွေကို ဝင်ခွင့်ပြုခဲ့တာကြောင့် အခုလို ပျောက်ဆုံးရတာလို့ Non-CDM ကျောင်းသားတွေက ဝေဖန် ပြောဆိုထားပါတယ်။
ပြီးခဲ့တဲ့ ၂၀၂၂ ခုနှစ်ကလည်း တောင်ကြီးတက္ကသိုလ် ဆိုင်ကယ်စတန်းမှာ ရပ်ထားတဲ့ ဆိုင်ကယ် ၁၀ စီးနဲ့အထက် ပျောက်ဆုံးခဲ့ပြီး ကျောင်းသားရေးရာက အရေးယူ ဆောင်ရွက်တာ မရှိခဲ့ဘူးလို့ စုံစမ်း သိရှိရပါတယ်။
CJ-007
