မဲခေါင်၊ နို၀င်ဘာ ၂၅
မြို့တွင်း တိုက်ပွဲတွေ ပြင်းထန်နေတဲ့ ကရင်နီပြည်၊ လွိုင်ကော်မြို့နဲ့ ရှမ်းပြည်နယ် တောင်ပိုင်း၊ မိုးဗြဲမြို့မှာ စစ်ကောင်စီက လူမှုကူညီရေးအသင်းတွေ ကူညီကယ်ဆယ်ခွင့် ပိတ်ပင်ထားတယ်လို့ ကူညီကယ်ဆယ်နေတဲ့ အဖွဲ့အစည်းတွေက ဒီကနေ့ ပြောပါတယ်။
မြို့တွင်း တိုက်ပွဲတွေ ပြင်းထန်နေစဥ် တော်လှန်ရေး အင်အားစုတွေ စစ်ဘေးရှောင် အသွင်ယူပြီး လူမှုကူညီရေးအသင်း လူနာတင် ကားတွေနဲ့ လိုက်ပါလာမှာ စစ်ကောင်စီက စိုးရိမ်နေတယ်လို့ ဆိုပါတယ်။
“ကျနော်တို့ အသင်းက တိုက်ပွဲထိတဲ့ သူတွေကို ကယ်ထုတ်တယ်။ ပြီးတော့ စစ်ရှောင်တွေကို ကယ်ထုတ်တော့ သူတို့ (စစ်ကောင်စီက) က ကယ်လို့ မရဘူး ဆိုတဲ့ အမိန့်ကို ထုတ်လိုက်တာ။ အဲလို ကယ်ထုတ်လို့ ဆိုပြီးတော့ ကားကိုလည်း သိမ်းသွားတာ။ ဘယ်အသင်းအဖွဲ့မှ အဲလို ကူညီပိုင်ခွင့် မရှိအောင် အမိန့်ထုတ်လိုက်တာ” လို့ ဒေသတွင်း လူမှုကူညီရေးအသင်း တာဝန်ရှိသူ တစ်ဦးက ပြောပါတယ်။
“၁၁၁၁ စစ်ဆင်ရေး” စတင်တဲ့ နိုဝင်ဘာလ ၁၁ ရက်နေ့ကစပြီး ဒီနေ့ နိုဝင်ဘာ ၂၅ အထိ ဒေသတွင်း ပိတ်ပင်ခံရတဲ့ ကူညီရေးအသင်း ၅ ခုကျော် အပါအဝင် ကားအစီး ၂၀ ကျော် အသိမ်းခံထားရတယ်လို့ သူက ဆက်ပြောပါတယ်။
အခုလို တရားဝင် လူမှုကူညီရေးအသင်းတွေ ပိတ်ပင်ခံရပြီးနောက် မြို့တွင်း လက်နက်ကြီး ထိမှန်သူတွေနဲ့ ပိတ်မိနေတဲ့ ပြည်သူတွေ အကူအညီရဖို့ ခက်ခဲလာပြီး တော်လှန်ရေးတပ်ဖွဲ့ရဲ့ မြေပြင်ကယ်ဆယ်ရေးအဖွဲ့တွေကို အားကိုးနေရတယ်လို့ သိရပါတယ်။
“ကျနော်တို့လည်း ကြားရတာပေါ့နော်။ ကားအသိမ်း ခံရသူတွေလည်း ရှိတာပေါ့နော်။ ပြီးတော့ သူတို့ တရားဝင် မြို့ပေါ်မှာ Register လုပ်ထားတဲ့ အတွက်ကြောင့် ကျနော်တို့လိုမျိုး Register လုပ်မထားတဲ့ အဖွဲ့တွေလိုမျိုးတော့ လွတ်လွတ်လပ်လပ် ပေးမသွားတော့ဘူးပေါ့။ မြို့ထဲမှာ ပြည်သူတွေက တအားကြီး အရေးပေါ် ဖြစ်နေတယ်။ ပြည်သူတွေက ဒဏ်ရာရလို့ တချို့က ဘယ်လို ပြောမလဲ ဆူလည်း ဆူပါစေ၊ ဆဲလည်း ဆဲပါစေ။ လုပ်ရဲရင် ခံရဲမယ်ဆိုတဲ့ တကယ်ကို လုပ်ပေးနေတဲ့ ပရဟိတ အဖွဲ့လောက်ပဲ တစ်ယောက်၊ နှစ်ယောက် လောက်ကပဲ လူနာ သွားသယ်ပြီးမှ ဆေးရုံပို့တာ အဲလောက်အထိပဲ လုပ်ပေးတာ ရှိတော့တယ်။ သိရသလောက်က တရားဝင် ပေါ်ပေါ်တင်တင် လုပ်ပေးလို့ မရတော့ဘူး။ စစ်ကောင်စီက သူတို့ကို ပိတ်လိုက်ပြီ” လို့ လွိုင်ကော်မြို့ခံ တစ်ဦးက ပြောပါတယ်။
အခုလို ပိတ်ပင်ထားတာကြောင့် မြို့ခံ ပြည်သူတွေ အနေနဲ့ တော်လှန်ရေးတပ်ဖွဲ့တွေရဲ့ မြေပြင်ဆေးအဖွဲ့တွေကို အားကိုးနေရလို့ ဆေးရုံပို့ရမယ့် လူနာတွေအတွက် အသက်အန္တရာယ် စိုးရိမ်ရတာနဲ့ ဆေး၀ါးမလုံလောက်မှုတွေ ကြုံတွေ့ရမှာ စိုးရိမ်ပူန် နေကြတယ်လို့ ဆိုပါတယ်။
လက်ရှိ လွိုင်ကော်မြို့ထဲမှာ တော်လှန်ရေး အင်အားစုတွေနဲ့ စစ်ကောင်စီတပ် တစ်ခြမ်းစီ နေရာယူထားပြီး “၁၁၁၁ စစ်ဆင်ရေး” ၁၄ ရက်အတွင်း လေကြောင်းနဲ့ လက်နက်ကြီး၊ လက်နက်ငယ် ပစ်ခတ်မှုတွေကြောင့် အရပ်သား ၇၀ နီးပါး သေဆုံးခဲ့တယ်လို့ သိရပါတယ်။
CJ-007
#MeKongNews
#လွိုင်ကော်မြို့
#လူမှုကူညီရေးအသင်း
#စစ်ဘေးရှောင်