မဲခေါင်၊ ဇန်နဝါရီ ၂၀
ရှမ်းပြည်နယ်မြောက်ပိုင်း၊ မူဆယ်မြို့မှာ တရုတ်နိုင်ငံသို့သွားဖို့ တုံကင်လာလုပ်သူတွေ များလွန်းတာကြောင့် ဒီနေ့ ဇန်နဝါရီ ၂၀ ရက်မှာ လူ ၃၀ ကျော်မူးလဲခဲ့တယ်လို့ ဒေသခံတွေထံမှ သိရပါတယ်။
တရုတ်နိုင်ငံသို့ သွားရောက်ရန်အတွက် ခွင့်ပြုချက်တုံကင်ကို တစ်ပတ် နှစ်ကြိမ်ပြုလုပ်ပေးပြီး ဒီနေ့မှာတော့ မူဆယ်ဘောလုံးကွင်းမှာ မနက် ၇ နာရီကနေ စတင်ပြုလုပ်ပေးတာ လူများလွန်း နေပူတာကြောင့် မူးလဲသွားကြတာဖြစ်တယ်လို့ သိရပါတယ်။
“မေ့လဲတဲ့သူတွေတစ်ချို့ ဆေးရုံပို့ကြတယ်။ လူအရမ်းများလို့၊ တစ်ချို့ဆိုမနက်အစောကြီး လာစောင့်နေကြတယ်။ ဘောလုံကွင်းထဲမှာတောင် လူပြည့်နေပြီ ဘောလုံးကွင်းအပြင်မှာလည်း အများကြီး ရှိတယ် တစ်ချို့ကြတော့လဲ ပြန်ကြတာပေါ့” မူဆယ်ဒေသခံတစ်ဦးက ပြောပါတယ်။
တရုတ်နိုင်ငံအတွင်း အလုပ်လုပ်ရန်သွားသူများမှာ စစ်ဖြစ်နေတဲ့ ရှမ်းမြောက်အတွင်းမှ ပြည်သူအများစုဖြစ်ကြပြီး ယခုတုံကင်လာလုပ်သူများမှာ စစ်ရှောင်တွေအများစုဖြစ်တယ်လို့ သိရပါတယ်။
ပြီးခဲ့တဲ့ ဇန်နဝါရီ ၈ ရက်နေ့မှာလည်း မူဆယ်ဆန်စပါး ကုန်စည်ဒိုင်အနီးမှာ လူ ၈ ထောင်ခန့် တုံကင်လာလုပ်ကြပြီးလူ ၁၅ ဦးမူလဲခဲ့ပါသေးတယ်။ တုံကင်လုပ်ပေးမယ်ဆိုပြီး ပိုက်ဆံလိမ်တဲ့သူတွေလည်း ရှိနေတယ်လို့ ဒေသခံတွေက ပြောပါတယ်။
MK-011
#MeKongNews
#မူဆယ်
#တရုတ်
#တုံကင်
#မူးလဲ
#ရှမ်းမြောက်
