မဲခေါင်၊ ဧပြီ ၆
ရှမ်းပြည်နယ် တောင်ပိုင်း၊ အင်းလေးဒေသ ညောင်ရွှေမြို့ပေါ်က မိသားစု ၃ ဦးကို စစ်ကောင်စီတပ်က နေအိမ်ပေါ် သေနတ် ပစ်ဖောက် ဝင်ရောက် ဖမ်းဆီး သွားတယ်လို့ ဒေသခံတွေက ပြောပါတယ်။
ညောင်ရွှေမြို့မှာ နေထိုင်တဲ့ ကိုမျိုး ဆိုသူနဲ့ မိသားစုကို စစ်ကောင်စီ ကား ၃ စီးနဲ့ ဧပြီလ ၅ ရက်၊ မနက် ၁၁ နာရီခန့်မှာ ဝင်ရောက် ဖမ်းဆီးတာဖြစ်ပြီး ဖမ်းဆီးစဉ် သေနတ်နဲ့ ပစ်လို့ ကိုမျိုး သေနတ်ထိမှန် ခဲ့တယ်လို့ ဒေသခံ တစ်ဦးက ပြောပါတယ်။
“စစ်ခွေးတွေ အိမ်ပေါ်အထိ တက်လာပြီး ရိုက်နှက် ဖမ်းဆီးသွားကြတယ်။ သေနတ်လည်း ပစ်ဖောက်ကြတယ်။ သေနတ်နဲ့ ပစ်တော့ ကိုမျိုးက ခွေလဲသွားတယ်လို့လည်း သိရတယ်။ ခြေထောက် ထိသွားတာလို့ ပြောတယ်။ ကိုမျိုး ရဲ့ အမျိုးသမီးကိုလည်း အပြစ်မရှိ ဖမ်းဆီးသွားကြတယ်။ စစ်အာဏာသိမ်းပြီး ကတည်းက စစ်ခွေးတွေ မတရား ဖမ်းဆီး၊ မတရား သတ်ဖြတ်နေကြတာ ခုချိန်ထိ မပြီးနိုင်သေးဘူး။ လူဖမ်းဖို့ လူသတ်ဖို့ အာဏာ လုယူထားတာ လုံးဝသေချာနေပြီ” လို့ ညောင်ရွှေမြို့ခံ တစ်ဦးက ပြောပါတယ်။
လာဖမ်းဆီးချိန် နေအိမ်ပေါ်ရှိနေတဲ့ ကိုမျိုး ရဲ့ဇနီးနဲ့ အစ်မ ဖြစ်သူကိုပါ ဖမ်းသွားတာဖြစ်ပြီး ကိုမျိုး ဟာ ဂိမ်းဆိုင်ဖွင့်ထားသူ ဖြစ်တယ်လို့ နောက်ထပ် ဒေသခံ တစ်ဦးက ပြောပါတယ်။
“လာဖမ်းတဲ့ အချိန်က PDF နဲ့ အဆက်သွယ်ရှိတယ် ဘာညာဆိုပြီး ဒလန်က ချွန်လိုက်လို့ ဖမ်းတာလို့ သိရတာ ပေါ့နော်။ အမှန်က ကိုမျိုးက အေးအေးဆေးဆေးနဲ့ ဂိမ်းဆိုင်ဖွင့်ပြီး လုပ်ကိုင်စားသောက် နေတာပါ” လို့ အဲ့ဒီ ဒေသခံက ပြောပါတယ်။
လက်ရှိ သူတို့ ၃ ယောက်ကို ညောင်ရွှေ ရဲစခန်းမှာ ချုပ်နှောင်ထားတယ်လို့ သိရပါတယ်။
စစ်ကောင်စီတပ်ဖွဲ့တွေဟာ အင်းလေးဒေသမှာ လူငယ်တွေကို မကြာခဏ ဖမ်းဆီး ငွေညှစ်တာတွေ ပြုလုပ်နေတယ်လို့ ဒေသခံ တစ်ဦးက ပြောပါတယ်။
“PDF တွေနဲ့ ဆက်သွယ်ဖူးတယ် ဆိုရင်လည်း လိုက်ဖမ်းတယ်။ ရှာဖမ်းတယ်။ PDF ကို ထောက်ပံ့တယ်လို့ ဒလန်က တိုင်ရင်လည်း လိုက်ဖမ်းတယ်။ ခိုးမှု လုယက်မှု ဓားပြမှုတွေ ကျတော့ တစ်ခါမှ မဖမ်းမိဘူး” လို့ အင်းလေး ဒေသခံ တစ်ဦးက ပြောပါတယ်။
စစ်တပ် အာဏာသိမ်းပြီးနောက် မြန်မာနိုင်ငံမှာ ဖမ်းဆီးခံရသူ ၂၁,၂၂၂ ဦး၊ သတ်ဖြတ်ခံရသူ ၃,၂၁၂ ဦး ရှိတယ်လို့ နိုင်ငံရေး အကျဉ်းသားများ ကူညီစောင့်ရှောက်ရေးအဖွဲ့ AAPP က ဧပြီလ ၅ ရက်မှာ ထုတ်ပြန်ထားပါတယ်။
CJ -002
#MeKongNews
#ညောင်ရွှေမြို့
#ပစ်ခတ်
