မဲခေါင်၊ မတ် ၂၂
ရန်ကုန်မြို့၊ စမ်းချောင်းမြို့နယ်၊ ဆီဆုံလမ်းမှာ နေထိုင်တဲ့ စစ်ကောင်စီရဲ့ စီးပွားကူးသန်း ဒုညွှန်ချုပ်သားဖြစ်သူ ဝင့်မိုးအောင် ဆိုသူ ပစ်သတ်ခံရပြီးနောက် ပြည်သူအချို့ကို ဖမ်းဆီးပြီး နေအိမ်တိုက်ခန်း ချိတ်ပိတ်မှုတွေ ပြုလုပ်နေတယ်လို့ ဒေသခံတွေက မဲခေါင်သတင်းကို ပြောပါတယ်။
မတ်လ ၂၀ ရက်နေ့ ညနေ ၅ နာရီကျော်က နေအိမ်ရှေ့မှာ ဆေးကျောင်းသား ဖြစ်သူ ဝင့်မိုးအောင်ကို ပစ်ခတ်တဲ့ အတွက် အဒေါ်ဖြစ်သူပါ သေနတ်ဒဏ်ရာတွေ ရရှိခဲ့ပြီး ဝင့်မိုးအောင် ကတော့ ညနေ ၆ နာရီကျော်မှာ သေဆုံးခဲ့ပါတယ်။
“ ကြည့်မြင်တိုင် ဈေးကြီးလမ်းမှာရှိတဲ့ တိုက်အမှတ် ၄၆၊ ၃ လွှာက မိသားစုတွေကို လာဖမ်းသွားတယ်။ အဲ့အခန်းမှာ CDM ဆေးကျောင်း တက်နေတဲ့သူ ရှိတယ်လို့ ပြောတယ်။ သေသွားတဲ့ ကောင်လေး ဖုန်းကနေ နံပါတ်တွေ ရှာတွေ့ပြီး လာဖမ်းတာလို့ ကြားတယ်။ ပစ်သတ်ခံရတဲ့နေ့ ည ၁၀ နာရီ ခွဲလောက်မှာ လာပြီး ဖမ်းသွားတာပါ” လို့ သူကပြောပါတယ်။
စစ်ကောင်စီတပ်က အဲဒီ မိသားစုကို ဖမ်းဆီးသွားပြီးနောက် တိုက်ခန်းကို မတ်၂၁ ရက်က လာရောက် ချိတ်ပိတ်သွားတယ်လို့ ဒေသခံတွေက ပြောပါတယ်။
သေနတ်နဲ့ ပစ်သတ်ခံရသူ ဝင့်မိုးအောင် ဟာ အငယ်ဆုံးသားဖြစ်ပြီး ဆေးကျောင်းတက်နေကာ CDM ကျောင်းသား ကျောင်းသူများနဲ့ ဆရာ ဆရာမများကို ဖမ်းဆီးရာမှာ သတင်းပေးခဲ့သူ ဖြစ်တယ်လို့ သတင်းတွေ ထွက်ပေါ်နေတာပါ။
ဒီသတင်းတွေနဲ့ ပတ်သက်ပြီး မဲခေါင်သတင်း အနေနဲ့ သီးခြား အတည်ပြုနိုင်တာ မရှိသေးဘဲ သေဆုံးချိန်မှာ အသက် ၂၀ ဝန်းကျင်သာ ရှိသေးတယ် ဆိုတာကိုတော့ နာရေး ဖိတ်စာမှာ တွေ့ရပါတယ်။
MK-005
