မဲခေါင်၊ ဖေဖော်ဝါရီ ၂၅
တာချီလိတ်မြို့က လူပေါင်း ၇၀၀ နီးပါးဖမ်းဆီးခံရတဲ့ အွန်လိုင်းလောင်းကစားလုပ်ငန်းဖမ်းဆီးခံရမှုမှာ လောင်းကစားရုံတာဝန်ခံတွေက တာချီလိတ်မြို့နယ်နဲ့ ခရိုင်က ရဲတွေကို တလဘတ်သိန်းနဲ့ချီပြီး လိုင်ကြေးပေးထားရတယ်လို့ လောင်းကစားရုံတာဝန်ခံနဲ့ နီးစပ်သူတွေက မဲခေါင်ကို ပြောပါတယ်။
အဓိကလိုင်ကြေးကို တာချီလိတ် ဒနတပ်ဖွဲ့ခေါင်းဆောင် ရဲအုပ်ကိုကိုဦးက လက်ခံရယူပြီး တခြားအဖွဲ့တွေကိုလည်းပေးရတယ်လို့ လောင်းကစားရုံတာဝန်ခံနဲ့ နီးစပ်တဲ့ သတင်းရင်းမြစ်က မဲခေါင်ကို ပြောပါတယ်။
“ဒနခေါင်းဆောင် ရဲအုပ်ကိုကိုဦးက အွန်လိုင်းဂိမ်းနဲ့ ကျားဖြန့်ကုမ္ပဏီကြီးတွေ ဆီကနေ လစဉ်ကြေးယူထားတယ်။ သူက တာချီလိတ်ခရိုင်ရဲက ရဲအုပ်လေ၊ ကျွန်တော်တို့ကတော့လကုန်ပြီဆို ခရိုင်ရုံးကိုသွားပြီး လိုင်းကြေးသွားပေးရတယ်။ အခုလဲစစ်တပ်က Online Game တွေ ဝင်ဖမ်းတယ် ဘာမှလဲ တာဝန်ယူပြီးမရှင်းပေးဘူး” လို့ သူက ပြောပါတယ်။
လိုင်းကြေးအနေနဲ့ တာချီလိတ်ရဲတွေကို ဘတ်သိန်းနဲ့ချီပေးရပြီး ပေးရတဲ့ပမာဏကိုတော့ ထုတ်ဖော်ပြောဆိုခြင်းမရှိပါဘူး။ မဲခေါင်သတင်းဌာနက စုံစမ်းရရှိတဲ့ အချက်အလက်တွေအရ အွန်လိုင်းလောင်းကစားနဲ့ ကျားဖြန့်လုပ်ငန်းတွေဟာ တလကို ဘတ် ၁သိန်းခွဲကနေ ၄သိန်းအထိ တာချီလိတ်ရဲတွေကို ပေးရတယ်လို့ သိရပါတယ်။
ဖေဖော်ဝါရီလ ၂၃ရက် ညသန်းခေါင်ကျော်က တာချီလိတ်မြို့နယ်၊ ဆန်ဆိုင်း(က)ရပ်ကွက်ထဲက အွန်လိုင်းလောင်းကစားလုပ်ငန်းတစ်ခု စစ်တပ်ကဝင်ဖမ်းခဲ့တာဖြစ်ပြီး မြန်မာနိုင်ငံသား ၅၄၀ဦး၊ ထိုင်းနိုင်ငံသား ၁၄၈ ဦးနဲ့ တရုတ်နိုင်ငံသား ၁ဦး စုစုပေါင်း ၆၈၉ ဦးကို ဖမ်းဆီးရမိခဲ့တာဖြစ်ပါတယ်။
ဒါ့အပြင်ကွန်ပျူတာ ၄၀၀ လုံး၊ မီးခံသေတ္တာ မဖွင့်ရသေး ၁၀ လုံး၊ ဖုန်းမျိုးစုံ ၂၇၀ လုံး၊ ကားမျိုးစုံ ၃၀ စီးနဲ့ ဆိုင်ကယ်မျိုးစုံ ၁၇၀ စီးကိုလည်း စစ်တပ်က သိမ်းဆည်းသွားပါတယ်။
ဒီလိုဝင်ရောက်ဖမ်းဆီးတာကို တြိဂံဒေသတိုင်းစစ်ဌာနချုပ်က ဝင်ရောက်ဖမ်းဆီးခဲ့တာဖြစ်တယ်လို့ သတင်းတွေထွက်ပေါ်နေပြီး ဒေသခံရဲတွေ သိတောင်မသိလိုက်ဘူးလို့ ဆိုပါတယ်။
တာချီလိတ်မြို့မှာ အွန်လိုင်းလောင်းကစားလုပ်ငန်းနဲ့ ကျားဖြန့်လုပ်ငန်းတွေ အများအပြားရှိပေမယ့် တစ်ခုထဲကိုသာ ကွက်ဖမ်းတဲ့အပေါ် ဝေဖန်မှုတွေရှိနေပါတယ်။
MK – 004