မဲခေါင်၊ ဇူလိုင် ၂၂

ရှမ်းပြည်နယ်အရှေ့ပိုင်း၊ ကျိုင်းတုံမြို့မှာ အခြေစိုက်တဲ့ တြိဂံဒေသတိုင်း စစ်ဌာနချုပ်ရဲ့ တိုင်းမှူး ဗိုလ်ချုပ် နီလင်းအောင် ကို ရဲချုပ်တာဝန်ထမ်းဆောင်ဖို့ အာဏာသိမ်းစစ်ခေါင်းဆောင် မင်းအောင်လှိုင်က မနေ့ ဇူလိုင် ၂၁ ရက်မှာ ခန့်အပ်လိုက်တယ်လို့ သိရပါတယ်။

အာဏာသိမ်းပြီးမှ ခန့်အပ်ထားတဲ့ လက်ရှိရဲချုပ် ဗိုလ်ချုပ် ဇင်မင်းထက် ကိုတော့ စစ်ဘက်ဆိုင်ရာတာဝန်တွေကနေ အနားပေးလိုက်ပြီး အားကစားနဲ့ လူငယ်ရေးရာဝန်ကြီးဌာန ဒုတိယဝန်ကြီးအဖြစ် ခန့်လိုက်ပါတယ်။

အာဏာသိမ်းခေါင်းဆောင် မင်းအောင်လှိုင်နဲ့ ရင်းနှီးတဲ့ဆက်ဆံရေးရှိတဲ့ ဒုတိယဗိုလ်ချုပ်ကြီး နီလင်းအောင်ဟာ တြိဂံဒေသတိုင်းမှူးအဖြစ် တာဝန်ထမ်းဆောင်စဉ်မှာ ဗိုလ်ချုပ်အဆင့်သာ ရှိပါသေးတယ်။

ရဲချုပ်ရာထူး ထမ်းဆောင်ဖို့ မနေ့က တာဝန်ပေးအပ်ချိန်မှာတော့ တဆင့်မြင့်ရာထူးဖြစ်တဲ့ ဒုတိယဗိုလ်ချုပ်ကြီး နီလင်းအောင်လို့ သုံးနှုန်းသွားတာကြောင့် တဆင့်မြင့်ရာထူးနဲ့ ရဲချုပ်ခန့်တာလို့ ယူဆဖွယ်ရှိပါတယ်။

စစ်တက္ကသိုလ် အပတ်စဉ် ၃၇ ကျောင်းဆင်း ဒုတိယဗိုလ်ချုပ်ကြီး နီလင်းအောင်ဟာ တြိဂံဒေသတိုင်းမှူးအဖြစ် တာဝန်မယူခင်တုန်းက အရှေ့ပိုင်းတိုင်း စစ်ဌာနချုပ်ရဲ့ တိုင်းမှူးတာဝန်ယူခဲ့သူပါ။

ရှမ်းပြည်နယ်၊ တောင်ကြီးမြို့မှာ အခြေစိုက်တဲ့ အရှေ့ပိုင်းတိုင်း စစ်ဌာနချုပ် (ရပခ) လက်အောက်မှာရှိတဲ့ တပ်မ ၆၆ နဲ့ ခြေမြန်တပ်ရင်း (ခမရ) ၅၃၁ တို့ဟာ ၂၀၂၁ ခုနှစ်၊ ဒီဇင်ဘာ ၂၄ ရက်မှာ နယ်မြေချင်းထိစပ်နေတဲ့ ကရင်နီပြည်နယ်၊ ဖရူဆိုမြို့နယ်အတွင်းမှာ ပြည်သူ ၃၀ ကျော်ကို အရှင်လတ်လတ်ဖမ်းဆီး မီးရှို့သတ်ဖြတ်ခဲ့ပါတယ်။

ရက်ရက်စက်စက် သတ်ဖြတ်ခဲ့တဲ့ အဲ့ဒီဖြစ်စဉ်မှာ တပ်မ ၆၆ နဲ့ ခမရ ၅၃၁ တို့ကို ကြီးကြပ်ကွပ်ကဲရသူဟာ ယခု ဒုတိယဗိုလ်ချုပ်ကြီးရာထူးနဲ့ ရဲချုပ်ရာထူးတာဝန်ပေးခံရတဲ့ နီလင်းအောင် ဖြစ်ပါတယ်။

ရှမ်းပြည်နယ်တောင်ပိုင်း၊ ရွာငံမြို့နယ်အတွင်းမှာ ပြီးခဲ့တဲ့နှစ် ဧပြီလပိုင်းက ရွာသူရွာသား ၉ ဦးကို ဖမ်းဆီးသတ်ဖြတ်ခဲ့ပါသေးတယ်။ အဲ့ဒီအချိန်တုန်းကလည်း ရှမ်းပြည်နယ်တောင်ပိုင်းက စစ်ကောင်စီတပ်တွေကို ကြီးကြိပ်ကွပ်ကဲရသူဟာလည်း ဗိုလ်ချုပ် နီလင်းအောင်ပဲဖြစ်ပါတယ်။

စစ်တပ်အာဏာသိမ်း ၂ နှစ်ကျော်မှာ ရဲချုပ်ရာထူးကို ဒုတိယဗိုလ်ချုပ်ကြီး သန်းလှိုင်၊ ဒုတိယဗိုလ်ချုပ်ကြီး ဇင်မင်းထက်နဲ့ အခု ဒုတိယဗိုလ်ချုပ်ကြီး နီလင်းအောင် ၃ ယောက်တို့ကို မင်းအောင်လှိုင်က ပြောင်းလဲခန့်အပ်ခဲ့တာပါ။

လက်ရှိ တြိဂံဒေသတိုင်း စစ်ဌာနချုပ်တိုင်းမှူးရာထူးကိုတော့ ဗိုလ်ချုပ် အောင်ခိုင်ဝင်း က တာဝန်ယူထားပါတယ်။

#MeKongNews

#ရဲချုပ်

#တြိဂံတိုင်း

#အရှေ့ပိုင်းတိုင်း

#နီလင်းအောင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)