မဲခေါင်၊ အောက်တိုဘာ ၂၈
ရှမ်းပြည်နယ် မြောက်ပိုင်း၊ တအာင်းပြည်နယ်၊ တပ်မဟာ (၆) စစ်ဒေသထဲက စစ်ကောင်စီ တပ်စခန်း တစ်ခုကို တိုက်ခိုက် သိမ်းပိုက်နိုင်ခဲ့တယ်လို့ PSLF/ TNLA က ဒီကနေ့ မနက်ပိုင်းမှာ ထုတ်ပြန်ပါတယ်။
မနေ့က မနက် ၅ နာရီခွဲ ဝန်းကျင်မှာ လားရှိုးမြို့နယ် စစ်ကောင်စီရဲ့ မိုင်းကျက်တပ်စခန်းနဲ့ တိန်းတန် တပ်စခန်းတွေကို စတင် တိုက်ခိုက်ခဲ့ပြီး မွန်းတည့် ၁၂ နာရီမှာ တိန်းတန်စခန်းကို သိမ်းပိုက်နိုင်ခဲ့တာ ဖြစ်ပါတယ်။
အဆိုပါ စခန်းသိမ်း တိုက်ပွဲအတွင်း သေနတ် ၁၄ လက်၊ RPG တစ်လက်၊ ၆၀ မမ ၂ လက်၊ စက်လက်အကြီး တစ်လက်၊ လက်ပစ်ဗုံး ၂၀၀ လုံး၊ RPG ကျည် ၃၀ လုံး၊ ၆၀ မမကျည် ၅၀ လုံး အပါအဝင် မိုင်းနဲ့ ကျည်ဆန် အများအပြား၊ စစ်အသုံးအဆောင် ပစ္စည်းတွေ သိမ်းဆည်းရမိခဲ့တယ်လို့ PSLF/ TNLA ရဲ့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် မနေ့က မနက် ၄ နာရီမှာ တအာင်း တပ်မတော်ရဲ့ တပ်မဟာ (၁) စစ်ဒေသဖြစ်တဲ့ နမ့်ခမ်းမြို့နယ်တွင်းက နမ့်ခမ်း-နမ့်ဖတ်ကားလမ်း ၁၃ မိုင် တပ်စခန်း၊ ၁၂ မိုင်တပ်စခန်းနဲ့ မန်မိုင်တပ်စခန်း (မိုက်ခရိုဝိတ် တာဝါတိုင် တပ်စခန်း) ၃ ခုတို့ကို TNLA က တိုက်ခိုက် သိမ်းပိုက်ခဲ့သေးတယ်။
အဆိုပါ တိုက်ပွဲတွေ အတွင်း စစ်သား အလောင်း ၁၈ လောင်းနဲ့ လက်နက်ခဲယမ်း၊ စစ်အသုံးအဆောင်တွေကို သိမ်းဆည်းရမိခဲ့တယ်လို့ TNLA က ဆိုပါတယ်။
မနေ့က တစ်ရက်တာ အတွင်း စစ်ကောင်စီဘက်က လေကြောင်း တိုက်ခိုက်မှု ဂျက်ဖိုက်တာ ၇ ကြိမ်၊ Mi-25 တိုက်ခိုက်ရေး ရဟတ်ယာဥ်နဲ့ ၅ ကြိမ်နဲ့ ၁၂၀/၁၀၅ ဟောင်ဝစ်ဇာ အမြောက်နဲ့ ၁၂ ကြိမ် တိုက်ပွဲဖြစ်တဲ့ နေရာတွေကို ပစ်ခတ် တိုက်ခိုက်ခဲ့တယ်လို့ TNLA ရဲ့ ထုတ်ပြန်ချက်မှာ ဖော်ပြထားပါတယ်။
MK-009
#MekongNews
#တိန်းတန်_တပ်စခန်း
#TNLA
#ရဟတ်ယာဥ်
