မဲခေါင်၊ စက်တင်ဘာ ၃၀
မွန်ပြည်နယ်၊ ရေးမြို့နယ်အခြေစိုက် စစ်ကောင်စီခြေမြန်တပ်ရင်း (ခမရ – ၅၉၁)ရဲ့ ဒုတပ်ရင်းမှူးကို ဒီနေ့ စက်တင်ဘာ ၃၀ ရက်နေ့ နေ့လယ်ပိုင်းက အမှတ် (၃) စစ်ဒေသခွဲ၊ တောင်ပိုင်းတိုင်း J.O.C လက်အောက်ခံ ရေးဘီလူးအဖွဲ့က ပစ်ခတ်ရှင်းလင်းခဲ့တယ်လို့ သိရပါတယ်။
ပစ်ခတ်ခံရတဲ့ ဒုတပ်ရင်းမှူးဟာ ကားနဲ့ထွက်လာစဉ် တပ်ရင်းအပြင် ကိုက် ၅၀၀ အကွာခန့် ကျောင်းရွာအရောက်မှာ ရေးဘီလူးအဖွဲ့ ပစ်ခတ်ရှင်းလင်းခဲ့တာဖြစ်တယ်လို့ သိရပါတယ်။
ဒုတပ်ရင်းမှူးနဲ့အတူ ပါလာတဲ့ စစ်သား ၂ ယောက်အပါ စုစုပေါင်း ၃ ယောက်သေဆုံးတယ်လို့ အမှတ် ၃ စစ်ဒေသခွဲက မြေပြင်သတင်းတွေကို အခြေခံပြီး ထုတ်ပြန်ပါတယ်။
ပစ်ခတ်ရှင်းလင်းတဲ့နေရာဟာ စစ်ကောင်စီတပ်ရင်း ခမရ ၅၉၁ နဲ့ နီးကပ်လွန်းတာကြောင့် လက်နက်နဲ့ အသုံးအဆောင်ပစ္စည်းတွေ ရယူနိုင်ခြင်းမရှိခဲ့သလို ရေးဘီလူးအဖွဲ့ဘက်ကလည်း ထိခိုက်မှုမရှိခဲ့ဘူးလို့ သိရပါတယ်။
မွန်ပြည်နယ်အတွင်းမှာ တာဝန်ထမ်းဆောင်နေကြတဲ့ စစ်ကောင်စီဝန်ထမ်း၊ စစ်သားနဲ့ စစ်ကောင်စီဘက်တော်သားတွေ ၄၈ နာရီအတွင်း နှုတ်ထွက်ကြဖို့ ရေးဘီလူးအဖွဲ့က စက်တင်ဘာ ၂၈ ရက်နေ့မှာ အွန်လိုင်းကတဆင့် သတိပေးခဲ့ပါတယ်။
အခုလို ဒုတပ်ရင်းမှူးအပါ စစ်ကောင်စီ ၃ ယောက်ကို ပစ်ခတ်ရှင်းလင်းခဲ့တာဟာ သတိပေးမှုအပြီး ၄၈ နာရီအတွင်းမှာ ပစ်ခတ်ရှင်းလင်းခဲ့တာဖြစ်တယ်လို့ ရေးဘီလူးအဖွဲ့က ထုတ်ပြန်အသိပေးထားပါတယ်။
မွန်ပြည်နယ်၊ ရေးမြို့နယ်အတွင်းမှာ စစ်ကောင်စီရဲ့ ခမရ – ၅၉၁၊ ခမရ – ၅၈၇ နဲ့ ခမရ – ၅၈၈ တို့ အခြေစိုက်ကြပြီး အဲ့ဒီတပ်ရင်းတွေကို KNLA နဲ့ PDF ပူးပေါင်းအဖွဲ့တွေက မကြာခဏတိုက်ခိုက်လေ့ရှိပါတယ်။
မော်လမြိုင်-ရေး-ထားဝယ် အမှတ် ၈ ပြည်ထောင်စုကားလမ်းမပေါ်မှာ KNLA နဲ့ PDF ပူးပေါင်းအဖွဲ့တွေဟာ လုံခြုံရေးအတွက် စစ်ဆေးမှုတွေနေ့စဉ်ပြုလုပ်နေပါတယ်။
မော်လမြိုင်၊ မုဒုံ၊ ရေး၊ သံဖြူဇရပ်၊ ထားဝယ်၊ မြိတ်လမ်းမှာ သွားလာနေတဲ့ မော်တော်ယာဉ်တွေအနေနဲ့ KNLA၊ PDF ပူးပေါင်းတပ်ဖွဲ့ဝင်တွေ စစ်ဆေးတဲ့အခါမှာ ကြည်ဖြူစွာ လက်ခံဖို့၊ စစ်ကောင်စီနဲ့ ပတ်သက်တဲ့လူတွေ၊ ပစ္စည်းတွေတင်ဆောင်တာမျိုးမပြုလုပ်ဖို့၊ ပြည်သူတွေအနေနဲ့ စစ်ကောင်စီတပ်ယာဉ်တွေနဲ့ လိုက်ပါစီးနင်းတာမျိုးမပြုလုပ်ကြဖို့နဲ့ အခြားတိုင်းရင်းသားလက်နက်ကိုင်အဖွဲ့တွေက အသုံးပြုတဲ့ယာဉ်တွေကလည်း ကြည်ဖြူစွာအစစ်ဆေးခံဖို့ သတိပေးထားပါတယ်။
