ဒီကနေ့မနက် ၈ နာရီခန့်မှာ ကောလင်းမြို့နယ် အောက်ကျင်းရွာမှ တောင်ဘက်သို့ထွက်လာတဲ့ ကိုးတောင်ဘို့အထိုင် ခမရ-၃၆၃ စစ်ကောင်တပ်မှ တပ်သားတွေဟာ ကန့်ဘလူမြို့နယ်အတွင်းသို့ စစ်ကြောင်းထိုး ပြန်လည်ဝင်ရောက်လာခဲ့တယ်လို့ သိရပါတယ်။
အဲဒီစစ်ကြောင်းက မနက် ၈ နာရီ ၄၅ မိနစ်ခန့်မှာ ကန့်ဘလူမြို့နယ် အောက်တဲရွာဘက်မှာ နှမ်းအငှားရိတ်နေတဲ့ ပြည်သူ ၅ ဦးကို ဓားစာခံအဖြစ် ဖမ်းဆီးသွားတယ်လို့ သိရပါတယ်။
အခု အဖမ်းခံရတဲ့သူတွေက ကျပန်းအလုပ်လုပ်ကြတာ၊ ကြံချက်တဲ့အလုပ်လုပ် နေကြတာ၊ ဒီနေ့ ကြံချက်နားတော့၊ နှမ်းအငှားရိတ်တယ်၊ နှမ်းလှိုင်းတွေ လှည်းနဲ့တိုက်နေကြတာ စစ်ကြောင်းလာတာလဲမသိတော့ တည့်တည့်တိုးသလိုဖြစ်ပြီး အဖမ်းခံရတာ
လို့ ဒေသခံတစ်ဦးက ပြောပါတယ်။
အဲဒီ စစ်ကောင်စီစစ်ကြောင်းဟာ လက်ရှိမှာ ဝက်သအင်းရွာရဲ့ အရှေ့တောင်ဘက်သို့ ရောက်ရှိနေပြီး ချပ်သင်းအထိုင်ဘက်ဦးတည်နိုင်ချေရှိပြီး ပတ်ပတ်လည်ရှိ ရွာတွေမှ ဒေသခံပြည်သူတွေ ဘေးလွတ်ရာ ထွက်ပြေးတိမ်းရှောင်နေရတယ်လို့ သိရပါတယ်။
ဒါ့အပြင် ဒီကနေ့ မနက် ၁၁ နာရီမှာ စစ်ကိုင်းတိုင်း၊ ကန့်ဘလူခရိုင်နဲ့ မန္တလေးတိုင်း၊ သပိတ်ကျင်းမြို့နယ်အစပ်ရှိ ဇင်းချောင်းကျေးရွာ(မန္တလေးတိုင်း)ကို စစ်ကောင်စီတပ် ခမရ-၃၆၈နဲ့ နောက်လိုက် ပျူစောထီးတွေက လက်နက်ကြီးတွေနဲ့ ပစ်ခတ်ဝင်ရောက်ပြီး ပြည်သူပိုင်နေအိမ်တွေကို မီးရှို့ဖျက်ဆီးနေတယ်လို့လည်း ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ -ကန့်ဘလူခရိုင်က သတင်းထုတ်ပြန်ထားပါတယ်။