မဲခေါင်၊​ ဧပြီ ၄

တာချီလိတ်မြို့မှ နာမည်ကြီးဟိုတယ်တစ်ခုဖြစ်သည့် ရဂျီးနားဟိုတယ်ရှိ အွန်လိုင်းလောင်းကစားရုံကို ဖမ်းဆီးရာတွင် ယင်းအွန်လိုင်းလောင်းကစားလုပ်ငန်း ပိုင်ရှင်ဖြစ်သူ ထိုင်းနိုင်ငံသား၏ ညီကိုပါ ဖမ်းမိကြောင်း ရဂျီးနားနှင့် နီးစပ်သည့် သတင်းရင်းမြစ်များထံမှ သိရသည်။

ဧပြီလ ၂ရက်က ရဂျီးနား အွန်လိုင်းလောင်းကစားရုံကို စစ်ကောင်စီအဖွဲ့စုံဖြင့် ဝင်ရောက်ဖမ်းဆီးရာ ထိုင်းနိုင်ငံသား အမျိုးသား ၂၉ဦး၊ အမျိုးသမီး ၂၁ဦးကို ဖမ်းမိပြီး ယင်းထဲတွင် ပိုင်ရှင်၏ ညီဖြစ်သူ ပါဝင်ကြောင်း သတင်းရင်းမြစ်တစ်ဦးက ပြောသည်။

“ပိုင်ရှင်ရဲ့ညီပါလို့ အသည်းအသန်လိုက်ထုတ်နေတယ်လို့ သိရတယ်။ ထိုင်နိုင်ငံသားတစ်ယောက်ကို ဘတ် ၃သိန်းနဲ့ ညှိပြီး ထုတ်တာ မရလို့ အခု တစ်ယောက်ကို ဘတ် ၅သိန်းနဲ့ ဝင်ညှိနေတယ် ကြားတယ်။ အခုထိတော့ ညှိမရဘူး၊ ဖမ်းထားတုန်းပဲ” ၎င်းကပြောသည်။

ဖမ်းမိသည့် ထိုင်းနိုင်ငံသား အယောက် ၅၀ ထဲတွင် ပိုင်ရှင်၏ ညီဖြစ်သူပါဝင်ကြောင်း နောက်ထပ်သတင်းရင်းမြစ်တစ်ဦးကလည်း အတည်ပြုသည်။

ယင်းအွန်လိုင်းလောင်းကစားရုံကို ဖမ်းဆီးရာ၌ မူလက ဘတ်ငွေ ၆၅သိန်း ဖမ်းမိပြီး နောက်ပိုင်းတွင် အခြားမီးခံသေတ္တာတစ်ခုထဲမှ ဘတ်ငွေ သိန်း ၁၅၀ ထပ်မံသိမ်းဆည်းရမိကြောင်းလည်း သတင်းရင်းမြစ်များထံမှ သိရသည်။

ရဂျီးနားဟိုတယ်ရှိ အွန်လိုင်းလောာင်းကစားရုံကို ဖမ်းဆီးပြီးနောက် တာချီလိတ်မြို့ပေါ်မှ နာမည်ကြီး ဟိုတယ်များဖြစ်သည့် ရွှေဗူးသီးဟိုတယ်နှင့် ဇန်းမွန်အာခါ ဟိုတယ်တို့ကိုပါ ထပ်မံစစ်ဆေးခဲ့ကြောင်း၊ သို့သော် ဖမ်းဆီးရမိမှု တစ်စုံတစ်ရာမရှိကြောင်း ဒေသခံများထံမှ သိရသည်။

ယခုကဲ့သို့ အွန်လိုင်းလောင်းကစား လုပ်ငန်းများကို ဖမ်းဆီးခြင်းမှာ ထိုင်းနှင့် မြန်မာအာဏာပိုင်များ သဘောတူညီမှုဖြင့် ပူးပေါင်းလုပ်ဆောင်နေခြင်းဖြစ်ပြီး အွန်လိုင်းလောင်းကစားလုပ်ငန်းများ၏ တည်နေရာနှင့် အချက်အလက်များကို ထိုင်းနိုင်ငံဘက်မှ အတိအကျပေးကာ ဖမ်းဆီးခိုင်းခြင်းဖြစ်ကြောင်း လုံခြုံရေးတပ်ဖွဲ့များနှင့် နီးစပ်သည့် သတင်းရင်းမြစ်က ပြောသည်။

“ထိုင်းက Location (တည်နေရာ) အတိအကျပေးတာ။ အွန်လိုင်းဂိမ်းတွေ နှိမ်နင်းဖို့ ထိုင်းနဲ့ မြန်မာ သဘောတူထားပုံရတယ်။ ဒါကြောင့် အတင်းဖိအားပေးနေတာ အွန်လိုင်းတွေ ဖမ်းဖို့ကို။ နောက်ထပ်လည်း ဖမ်းဖို့ရှိသေးတယ်လို့ သတင်းကြားတယ်” ဟု ၎င်းကပြောသည်။

ထိုင်းနိုင်ငံမှာ အွန်လိုင်းလောင်းကစားလုပ်ငန်းများကြောင့် ပြည်သူများထိခိုက်ပြီး နှစ်စဉ် ဘတ်ငွေ ဘီလီယံနှင့်ချီ ဆုံးရှုံးနေသည့်အတွက် ယင်းလုပ်ငန်းများကို နှိမ်နင်းရန် အားထုတ်နေခြင်းဖြစ်သည်။

စစ်တမ်းများအရ အွန်လိုင်းငွေလိမ်လုပ်ငန်းနှင့် အွန်လိုင်းလောင်းကစားလုပ်ငန်းများကြောင့် ၂၀၂၅ ခုနှစ်အတွင်း ထိုင်းပြည်သူများ၏ ဆုံးရှုံးငွေမှာ ဘတ် ၁၁၅ ဒသမ ၃ ဘီလီယံရှိကြောင်း သိရသည်။

#MeKongNews
#တာချီလိတ်
#အွန်လိုင်းလောင်းကစား
#ထိုင်းနိုင်ငံသား
#ထိုင်းနိုင်ငံ
#ရဂျီးနားဟိုတယ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)