မဲခေါင်၊ စက်တင်ဘာ ၃၀
ရှမ်းပြည်တောင်ပိုင်း၊ ကလောမြို့နယ်၊ လွန်းထိုးကျေးရွာ (သဖန်းစိတ်) မှာ ရေကြီး မြေပြိုမှုတွေကြောင့် အိမ်ခြေ ၈၅၀ အတွက် အရေးပေါ်အကူအညီတွေ လိုအပ်နေတယ်လို့ ဒေသတွင်း သတင်းအရင်းအမြစ်တွေက ပြောပါတယ်။
ကလောမြို့ပေါ်မှာ ပြန်လည်ထူထောင်ရေးအတွက် စတင်နေပြီဖြစ်ပေမယ့် လယ်ပြင်ကျေးရွာအုပ်စု၊ လွန်းထိုးကျေးရွာမှာတော့ ရေကျပြီးတဲ့လမ်းတွေနဲ့ လူနေအိမ်တွေမှာ ရွှံ့နွံတွေ မရှင်းလင်းရသေးသလို ရေကြီးနေတဲ့ နေရာတွေမှာလည်း စားနပ်ရိက္ခာနဲ့ နေရာထိုင်ခင်း အကူအညီ လိုအပ်နေသေးတယ်လို့ ဆိုပါတယ်။
“ကျနော်တို့သွားတုန်းက ဘယ်သူမှ ကူတဲ့သူမရှိဘူး။ ကျနော်တို့ အုပ်စုပဲရှိတာ။ အခု အဆက်အသွယ်ရတော့ အဲ့နောက်ပိုင်းလည်း ဘယ်သူမှ မလာကြဘူး ပြောပါတယ်။ အဆင်ပြေတဲ့သူတွေကတော့ သွားပေးစေချင်ပါတယ်” လို့ လွန်းထိုးကျေးရွာကို ကယ်ဆယ်ရေးဆောင်ရွက်ပေးခဲ့သူတစ်ဦးက ပြောပါတယ်။
ကလောမြို့၊ ဗျူးပွိုင့်လမ်းအတိုင်း သွားရတဲ့ လွန်းထိုးကျေးရွာဟာ တောင်တက်လမ်းတစ်လျှောက် ရွှံ့နွံတွေ ထူထပ်နေပြီး မဲနယ်တောင်အတက်လမ်းထက်လည်း ဆိုးဝါးတာကြောင့် ကားအမြင့် ၄ ဘီးယက် ကားတွေနဲ့သာ သွားရောက်နိုင်တယ်လို့ သိရပါတယ်။
အလားတူ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ်၊ ယကြီးကျေးရွာအုပ်စုမှာလည်း ပြီးခဲ့တဲ့ ၂ ပတ်ကတည်းက ရေလွှမ်းမိုးနေဆဲဖြစ်ပြီး သက်ဆိုင်ရာ အာဏာပိုင်တွေနဲ့ လူမှုကယ်ဆယ်ရေး အသင်းအဖွဲ့တွေလည်း တစ်ကြိမ်တစ်ခါမှ လာရောက်တာမျိုး မရှိသေးဘူးလို့ ဒေသခံတွေက ပြောပါတယ်။
ယကြီးကျေးရွာအုပ်စုထဲက မင်းပလောင်၊ တဲ့လု၊ ဝါးရွက်၊ မြေနီကုန်း စတဲ့ကျေးရွာတွေထဲက နေအိမ် ၅၀ ကျော်ဟာ အိမ်ခေါင်မိုးအထိ ရေနစ်မြုပ်နေပြီး စားနပ်ရိက္ခာအကူအညီ လိုအပ်နေတယ်လို့ ဆိုပါတယ်။
“အချင်းချင်း မကူကြဘူး။ အရမ်းသိပ်မခက်ခဲတဲ့ တခြားဒေသကို သွားကူနေကြတာ။ တကယ်တမ်း ကိုယ့်ဒေသမှာတင် အများကြီးပဲ။ ထမင်း တစ်ရက်မှ တစ်နပ်ပဲ စားရတဲ့သူတွေ ရှိသေးတယ်။ ဒါတွေက အလှူရှင် သူဌေးတွေကို မြင်စေချင်ပါတယ်” လို့ ဒေသခံတစ်ဦးက ပြောပါတယ်။
အထက်ပါ ရေကြီးတဲ့ဒေသတွေမှာ ဖုန်းနဲ့ အင်တာနက်လိုင်းတွေ ပြတ်တောက်နေပြီး သောက်သုံးရေ မသန့်ရှင်းမှုကြောင့် ဝမ်းပျက်ဝမ်းလျှော ရောဂါတွေလည်း ဖြစ်ပွားနေကြတယ်လို့ သူက ဆက်ပြောပါတယ်။
စက်တင်ဘာလ ၁၁ ရက်နေ့က စတင်တဲ့ ရှမ်းပြည်တောင်ပိုင်း ရေကြီးရေလျှံမှုမှာ မြို့နယ်အများစုက ရေကျသွားပေမယ့် ဆီဆိုင်၊ ကလော၊ ညောင်ရွှေ၊ ဖယ်ခုံ စတဲ့ မြို့နယ်တွေမှာတော့ ရေကြီးရေလျှံမှု ဆက်လက်ဖြစ်ပွားနေပြီး အကူအညီတွေ လိုအပ်နေသေးတယ်လို့ သိရပါတယ်။
MK-014
