မဲခေါင်၊ ဒီဇင်ဘာ ၁၄

တော်လှန်ရေးပူးပေါင်းအဖွဲ့တွေ သိမ်းပိုက်ထားတဲ့ စစ်ကိုင်းတိုင်း၊ အင်းတော်မြို့နယ်၊ မော်လူးမြို့အတွင်းမှ စစ်ကောင်စီဝန်ထမ်းတွေအနေနဲ့ လက်နက်ချအလင်းဝင်ကြဖို့ တော်လှန်ရေးအဖွဲ့တွေက အသိပေးထားပါတယ်။

သိမ်းပိုက်ထားတဲ့ မော်လူးမြို့ကို တော်လှန်ရေးအဖွဲ့တွေက ဒီနေ့ ဒီဇင်ဘာ ၁၄ ရက်နေ့မှာ နယ်မြေရှင်းလင်းနေပြီး လက်နက်ငယ် ၃ လက်ကို သိမ်းမိခဲ့တယ်လို့ မြောက်ပိုင်း ABSDF အဖွဲ့က အသိပေးထုတ်ပြန်ပါတယ်။

စစ်ကိုင်းနဲ့ကချင်နယ်စပ် မော်လူးမြို့ကို အမှတ် (၁) စစ်ဒေသကွပ်ကဲမှုနဲ့ ABSDF၊ KIA၊ KPDF၊ ပကဖ၊ ပအဖ၊ ပလဖ ပူးပေါင်းအဖွဲ့တွေက မနေ့ ဒီဇင်ဘာ ၁၃ မှာ တိုက်ခိုက်ခဲ့ပြီး သိမ်းပိုက်ထိန်းချုပ်ထားတယ်လို့ ကြေညာထားတာပါ။

အင်အား ၃၀ ခန့်နဲ့ တပ်စွဲထားတဲ့ မော်လူးမြို့မရဲစခန်းကို တော်လှန်ရေးပူးပေါင်းအဖွဲ့တွေက အပြင်းအထန်တိုက်ခိုက်ခဲ့ပြီး မနက်ပိုင်းမှာ အလုံးစုံသိမ်းပိုက်နိုင်ခဲ့ပါတယ်။ မော်လူးရဲစခန်းကို တိုက်ခိုက်နေစဉ်မှာ မိုညှင်းမြို့နယ်၊ ညောင်ကိုင်းကျေးရွာမှာရှိတဲ့ စစ်ကောင်စီအမြောက်တပ် အမတ-၉၀၄ က လက်နက်ကြီးတွေနဲ့ ပစ်ခတ်ခဲ့ပါတယ်။

နာရီပိုင်းသာ တိုက်ခိုက်ပြီး သိမ်းပိုက်လိုက်တဲ့ မော်လူးမြို့ကို စစ်ကောင်စီက လေကြောင်းကနေ ဗုံးကြဲပြီး စက်သေနတ်တွေနဲ့ ပစ်ခတ်ခဲ့ပါတယ်။

စစ်ကောင်စီတပ် လေကြောင်းက ဗုံးကြဲတာကြောင့် မြို့နေပြည်သူ ၁ သောင်းနီးပါး စစ်ဘေးရှောင်နေရတယ်လို့ ABSDF ထုတ်ပြန်ချက်ကဆိုပါတယ်။ ၂၀၁၄ သန်းခေါင်စာရင်းအရ လူဦးရေ သောင်းဂဏန်းခန့်သာနေထိုင်တဲ့ မော်လူးမြို့မှာ တမြို့လုံးနီးပါး စစ်ဘေးရှောင်နေရတဲ့ သဘောပါ။

မြို့သိမ်းတိုက်ပွဲအတွင်း စစ်ကောင်စီအလောင်း ၁၇ လောင်းနဲ့ သုံ့ပန်း ၇ ယောက်ကို ဖမ်းမိခဲ့ပါတယ်။ လက်နက်ခဲယမ်းအများအပြား တော်လှန်ရေးအဖွဲ့တွေက သိမ်းပိုက်နိုင်ခဲ့ပြီး ရဲဘော် ၂ ဦးကျဆုံးခဲ့တယ်လို့ ABSDF က အသိပေးထုတ်ပြန်ပါတယ်။

စစ်ကိုင်းတိုင်းအတွင်းမှာ ကောလင်း၊ ခါမ်းပတ်၊ ရွှေပြည်အေးနဲ့ အခု မော်လူးမြို့အပါအဝင် တော်လှန်ရေးအဖွဲ့တွေက ၄ မြို့ထိ သိမ်းပိုက်ထိန်းချုပ်ထားပါတယ်။

#MeKongNews

#မော်လူး

#သိမ်းပိုက်

#အလင်းဝင်

#လက်နက်ချ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)