မဲခေါင်၊ ဧပြီ ၉
လွိုင်ကော်အကျဥ်းထောင်မှာရှိတဲ့ အကျဥ်းသားတွေအတွက် ဆေးဝါးတွေပြတ်လပ်နေပြီး ဆေးဝါးကုသပေးမှုတွေလည်း မရှိတော့ဘူးလို့ ကရင်နီနိုင်ငံရေးအကျဥ်းသားများအစည်းအရုံး (KPPA)ရဲ့ တာဝန်ရှိသူ ထားဖိုးက ဧပြီလ ၉ ရက်နေ့က ပြောပါတယ်။
“ အခု အကျဥ်းထောင်မှာက ဆေးဝါးပြတ်လပ်တာတွေကြုံတွေ့နေရတယ်။ နောက်တချက်က ကျန်းမာရေးဝန်ဆောင်မှုပိုင်းမရှိတော့ဘူး။ နေမကောင်း မကျန်းမာတဲ့အချိန်မှာ ဆရာဝန်တွေရဲ့ ကြည့်ရှူစောင့်ရှောက်မှုက မရှိတော့ဘူး။ အကျဥ်းသားတွေရဲ့ ရပိုင်ခွင့်တွေဆုံးရှုံးနေရတယ်ပေါ့နော်။ “
၁၁၁၁ စစ်ဆင်ရေးစပြီးတဲ့နောက် ထောင်ဝင်စာပေးပို့မှုကို ပိတ်ပင်တားမြစ်ခဲ့ပြီး ထောင်တွင်းမှာ သဲ၊ခဲ ရောနေတဲ့ဆန်နဲ့ ငါးပိစိမ်း၊ အရည်ကြည်ဖြစ်နေတဲ့ကုလားပဲဟင်းရည်တို့နဲ့ပဲ ကျွေးနေတယ်လို့ သိရပါတယ်။
စစ်ဆင်ရေးကာလထဲမှာ အကျဥ်းသားတွေကို အခန်းအပြင်ကို ပေးမထွက်တာကြောင့် ခန္ဓာကိုယ် အောက်ပိုင်းချိနဲ့တာတွေနဲ့ အမျိုးသမီးတွေမှာ ဝမ်းဗိုက်နဲ့ပတ်သတ်တဲ့ ဝေဒနါတွေခံစားနေရတယ်လို့ဆိုပါတယ်။
“ ၁၁၁၁ စစ်ဆင်ရေးအတောအတွင်းမှာပဲ ကျန်းမာရေးအခြေအနေကြောင့် သေဆုံးသွားရတဲ့ အကျဥ်းသားတဦးလည်း ထပ်ပြီးတိုးလာတာပေါ့”
လွိုင်ကော်အကျဥ်းထောင်မှာ နိုင်ငံရေးအကျဥ်းသား ၁၀၀ ကျော်ရှိပြီး အကျဥ်းသားတွေထဲမှာမှ နိုင်ငံရေးအကျဥ်းသားတွေက ဖိနှိပ်ခံရတာတွေ၊ ခြိမ်းခြောက်မှုတွေ၊ ချုပ်ချယ်မှုတွေ၊ စောင့်ကြည့်ခံရတာတွေပိုရှိတယ်လို့ သိရပါတယ်။
စစ်တပ်က အာဏာသိမ်းပြီးတဲ့နောက် မြန်မာနိုင်ငံအနှံ့က အကျဥ်းထောင်တွေမှာ နိုင်ငံရေးအကျဥ်းသားပေါင်း ၂၀၀၀၀ ကျော်အထိ ဖမ်းဆီးထံထားရပြီး လူ့အခွင့်အရေးချိုးဖောက်မှုတွေလည်း ရှိနေတယ်လို့ AAPPရဲ့ ထုတ်ပြန်ချက်အရ သိရပါတယ်။
CJ-004
