မဲခေါင်၊ နိုဝင်ဘာ ၈
လောက်ကိုင်မြို့ကနေ တိုက်ပွဲတွေကြောင့် လားရှိုးပြန်မယ့် ပြည်သူတွေဟာ လောက်ကိုင်နဲ့ ချင်းရွှေဟော်မြို့ကြားက ပါစင်ကျော်ကျေးရွာအနီးမှာ ပိတ်မိနေပြီး သောက်သုံးရေနဲ့ အစားအသောက်တွေ ပြတ်လပ်နေတယ်လို့ သိရပါတယ်။
၁၀၂၇ စစ်ဆင်ရေးကြောင့် လမ်းအသုံးပြုခွင့် ပိတ်ထားတယ်လို့ ကြေညာထားပေမယ့် လောက်ကိုင်မှ လမ်းပွင့်နေပြီဆိုတဲ့ သတင်းအမှားများကြောင့် နိုဝင်ဘာ ၅ ရက်နေ့မှာ ထွက်လာတဲ့သူတွေဟာ ပါစင်ကျော်ကျေးရွာနားမှာ ၃ ရက်ကြာပိတ်မိနေတာပါ။
“လောက်ကိုင်ကနေ ကားနဲ့မိနစ်လေးဆယ်လောက် ဆင်းလာပြီး အခုပိတ်မိနေတဲ့ မန်လီရှူးဝါးနားရောက်တော့ ရှေ့ဆက်သွားလို့မရတော့ဘူး၊ ပါစင်ကျော်ရွာအကျော်မှာ လမ်းမကြီးကို တိုင်းရင်းသားလက်နက်ကိုင်အဖွဲ့တွေက သစ်ပင်တွေနဲ့ ကန့်ထားပြီးလမ်းကပိတ်ထားတယ်ဆိုလို့ လာလမ်းအတိုင်းနောက်ပြန်ဆုတ်ပြီး လောက်ကိုင်ပြန်မယ်ဆိုတော့လည်း ပြန်လှည့်ဝင်ဖို့ကို အစိုးရတာဝန်ရှိသူတွေက လက်မခံဘူး၊ အခုပါလာတဲ့ ရိက္ခာကလည်း မလောက်တော့ဘူး” လို့ ပါစင်ကျော် လမ်းမကြီးပေါ်တွင်ပိတ်မိနေသူတစ်ဦးက ပြောပြပါတယ်။
လောက်ကိုင်ကနေ လားရှိုးကို ပြန်ဖို့ရန်အတွက် ယာဉ်စီးခ လူတစ်ဦးကို တရုတ်ယွမ်ငွေ နှစ်ထောင့်ငါးရာအထိ ပေးရတယ်လို့ သိရပါတယ်။ ပိတ်မိနေတဲ့သူတွေ စုစုပေါင်းဟာ ၇၀၀ ခန့်ရှိတယ်လို့ သိရပါတယ်။
လောက်ကိုင်မှာ ဖုန်းလိုင်းတွေ ဖြတ်တောက်ထားတာကြောင့် ပိတ်မိနေတဲ့ ခရီးသွားတွေနဲ့ မိသားစုတွေ အဆက်အသွယ်ပြတ်တောက်မှုတွေရှိပါတယ်။
လောက်ကိုင်မြို့သို့ ဆက်သွယ်ရာ လမ်းကြောင်းများအား ညီနောင်မဟာမိတ်တပ်ဖွဲ့များက ထိန်းချုပ်ထားပြီး လောက်ကိုင်မြို့ပတ်ဝန်းကျင်တွင် တိုက်ပွဲဖြစ်ပွားနေပါတယ်။
“ပြည်တွင်းဖုန်းလိုင်းတွေ ပြတ်တောက်နေတယ် တရုတ်အင်တာနက် ဝိုင်ဖိုင်နဲ့ဘဲ ဆက်သွယ်အသုံးပြုနေရတယ်၊ လုပ်ငန်းတွေအများစုကလည်း ပိတ်သိမ်းလိုက်တယ်၊ ကုန်ဈေးနှုန်းကလည်း အရင်၅ ယွမ်လောက်ပေးကတဲ့ဟာက၊ အခု ၁၀ ယွမ်လောက်ဖြစ်နေတယ်၊ ဒါတောင်ပစ္စည်းတွေပြတ်မယ့်သဘောရှိတယ်၊ အဓိကဆန်တောင် တရုတ်ဘက်ကလာရောင်းပေးလို့ သူတို့ကလည်း နေ့စဉ်လာရောင်းမပေးနိုင်ဘူး၊အဲ့တော့ ကိုယ်ဒေသကိုယ်ပြန်တော့လည်း လမ်းမှာပိတ်မိဒုက္ခရောက်နေကြရတယ်” လို့ ဒေသခံတစ်ဦးက ပြောပါတယ်။
အဆိုပါ ပိတ်မိနေတဲ့ လူအများကို တာဝန်ရှိအဖွဲ့အစည်းများနှင့် တိုင်းရင်းသားလက်နက်ကိုင်အဖွဲ့များမှ ခွင့်ပြုပါက သွားရောက်ကူညီကယ်ဆယ်ရန်အသင့်ရှိတယ်လို့ လားရှိုးအခြေစိုက် ပရဟိတအသင်းတချို့မှလည်း သဘောထားထုတ်ပြန်ချက်များ ထုတ်ပြန်ထားပါတယ်။
MK-006
#MeKongNews
#လားရှိုး
#လောက်ကိုင်
#ပိတ်မိ
#တိုက်ပွဲ
#ပြည်သူ