မဲခေါင်၊ ဧပြီ ၉

လာအိုနိုင်ငံဘက် သွားရောက်အလုပ်လုပ်ကိုင်နေတဲ့ မြန်မာအလုပ်သမားတွေထဲက အထောက်အထားမရှိတဲ့ အလုပ်သမား ၁ ထောင်ကျော်ကို လာအိုရဲက မနေ့ ဧပြီလ ၈ရက်က ဖမ်းဆီးလိုက်တယ်လို့ လာအိုရောက် ရွှေ့ပြောင်းအလုပ်သမားတွေထံက သိရပါတယ်။

လာအိုအစိုးရက ရွှေ့ပြောင်းအလုပ်သမားတွေအတွက် ပြုလုပ်ပေးတဲ့ အထောက်အထားစာအုပ်နဲ့ စမတ်ကတ်မရှိတဲ့လူတွေကို ဖမ်းဆီးတာဖြစ်ပြီး ဆင်နှစ်ကောင်၊ ခြောက်လုံးပြိုင်၊ အုန်းတောနဲ့ ကျွန်းတောစတဲ့ နေရာတွေမှာ ဖမ်းဆီးသွားတာဖြစ်တယ်လို့ လာအိုရောက် ရွှေ့ပြောင်းအလုပ်သမား အမျိုးသမီး ၁ဦးက မဲခေါင်ကို ပြောပါတယ်။

“အားလုံးထောင်ကျော်တယ်။ စာအုပ်နဲ့ စမတ်ကတ်ကလည်း ၆လစာကို မြန်မာငွေကျပ် ၆သိန်းလောက်ကျတော့ အလုပ်က မရှိကြတာနဲ့ မလုပ်နိုင်တဲ့လူများပါတယ်” လို့ သူက ပြောပါတယ်။

ဖမ်းဆီးသွားတဲ့ မြန်မာလုပ်သားတွေကို မြန်မာနိုင်ငံကို ပြန်ပို့မလား၊ ဒဏ်ငွေရိုက်ပြီး ပြန်လွှတ်ပေးမလား မသိရသေးဘူးလို့ ဖမ်းဆီးခံရသူတစ်ဦးရဲ့ မိသားစုဝင်ထံက သိရပါတယ်။

အခုလို အထောက်အထားမရှိတဲ့ ရွှေ့ပြောင်းလုပ်သားတွေကို ဖမ်းဆီးမယ်လို့ လွန်ခဲ့တဲ့ ၅ရက်လောက်ကတည်းက ကြေညာထားတာဖြစ်ပြီး အခုလို ဖမ်းဆီးတာဟာ ပထမဆုံးအကြိမ်ဖြစ်တယ်လို့ သူက ပြောပါတယ်။

တာချီလိတ်မြို့နယ်၊ မိုင်းဖုန်း (က) ကျေးရွာအုပ်စုမှာရှိတဲ့ ဝမ်ပုံဆိပ်ကမ်းကနေ မဲခေါင်မြစ်ကိုကူးပြီး လာအိုနိုင်ငံထဲ​သွားရောက် အလုပ်လုပ်ကိုင်နေကြတဲ့ မြန်မာရွှေ့ပြောင်းလုပ်သားတွေဟာ ကာစီနို၊ အွန်လိုင်းဂိမ်း၊ ဈေးဆိုင်အလုပ်နဲ့ ဆောက်လုပ်ရေးအလုပ်တွေကို အများဆုံးလုပ်ကိုင်ကြပြီး တရုတ်စကားတတ်သူက ကျပ် ၁၅သိန်းကနေ သိန်း ၂၀၊ တရုတ်စကားမတတ်သူက ၈သိန်းကနေ ၁၀ သိန်းကြား ရကြတယ်လို့ ရွှေ့ပြောင်းအလုပ်သမား အသိုင်းအဝိုင်းက သိရပါတယ်။

တာချီလိတ်နဲ့ကပ်လျက် လာအိုနိုင်ငံ၊ ဘော်ကီယိုခရိုင်မှာ တရုတ်အထူးစီးပွားရေးဇုန်ရှိပြီး ကာစီနိုရုံအများအပြားရှိကာ အများစုက တရုတ်လုပ်ငန်းရှင်တွေ ပိုင်ဆိုင်ကြတာ ဖြစ်ပါတယ်။

MK – 004

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)