မဲခေါင်၊ ဖေဖော်ဝါရီ ၁
ရှမ်း-ကယား အထူးစစ်ဆင်ရေးမှူး ဒုတိယဗိုလ်ချုပ်ကြီး အောင်အောင်ကို ရှမ်းပြည်နယ်ဝန်ကြီးချုပ်အဖြစ် ခန့်အပ်လိုက်တယ်လို့ မနေ့က ဇန်နဝါရီ ၃၁ ရက်မှာ စစ်ကောင်စီက ထုတ်ပြန်ပါတယ်။
စစ်ကောင်စီထုတ်ပြန်ချက်တွင် ဒုတိယဗိုလ်ချုပ်ကြီးအောင်အောင်ကို အရပ်သား ဦးအောင်အောင်အဖြစ်ဖော်ပြပြီး ဝန်ကြီးချုပ် ဦးအောင်ဇော်အေး နေရာမှာ အစားထိုးခန့်အပ်တာလို့ ဖော်ပြထားပါတယ်။
စစ်အာဏာသိမ်း ၃ နှစ်ပြည့်မှာ ဦးအောင်ဇော်အေးကို အနားပေးလိုက်ပြီး ဦးအောင်အောင်ကို စစ်ယူနီဖောင်းကနေ အရပ်ဝတ်ပြောင်းပြီး ရာထူးအပြောင်းအလဲလုပ်လိုက်တာ ဖြစ်ပါတယ်။
ဒုတိယဗိုလ်ချုပ်ကြီးအောင်အောင်ဟာ ကစထ ၂ လို့ခေါ်တဲ့ အမှတ်(၂) စစ်ဆင်ရေး အထူးအဖွဲ့မှူးလို့ခေါ်တဲ့ တောင်ကြီးအခြေစိုက် အရှေ့ပိုင်းတိုင်းစစ်ဌာနချုပ်၊ ကျိုင်းတုံအခြေစိုက် တြိဂံဒေသတိုင်းစစ်ဌာနချုပ်၊ လားရှိုးအခြေစိုက် အရှေ့မြောက်ပိုင်းတိုင်းစစ်ဌာနချုပ်နဲ့ ခိုလန်အခြေစိုက် အရှေ့အလယ်ပိုင်းတိုင်း စစ်ဌာနချုပ်တို့ကို ဦးစီးရတဲ့ တိုင်းမှူးချုပ်ရာထူးကနေ ရှမ်းပြည်နယ်ဝန်ကြီးချုပ် ဖြစ်လာတာပါ။
ဦးအောင်ဇော်အေးကလည်း ဒုတိယဗိုလ်ချုပ်ကြီး ကစထ(၂) မှူးကနေ ရှမ်းဝန်ကြီးချုပ် ဖြစ်လာခဲ့ပြီး ပင်လောင်းမြို့နယ်၊ နမ့်နိန်းရွာက အစုအပြုံလိုက်အသတ်ခံရမှုမှာ အဓိကတာဝန်ရှိသူဖြစ်ပြီး နောက်တစ်ဦးကတော့ ယခင် အရှေ့ပိုင်းတိုင်းစစ်ဌာနချုပ်တိုင်းမှူး ယခု ရဲချုပ်ဖြစ်နေသည့် ဒုတိယဗိုလ်ချုပ်ကြီး နီလင်းမောင် ဖြစ်ပါတယ်။
ရှမ်းဝန်ကြီးချုပ် ဦးအောင်ဇော်အေးကို အနားပေးတာမဟုတ်ဘဲ အထက်ပိုင်းရာထူးတစ်ခုခုကို ပေးဖို့ ဖြစ်နိုင်တယ်လို့ နိုင်ငံရေးလေ့လာသုံးသပ်သူတွေက ခန့်မှန်းကြပါတယ်။
သူက သူ့ဆရာ အကြိုက်လူယုံလေ၊ အခြားနေရာပေးဖို့များမယ်၊ ဒါပေမယ့် ရှမ်းဝန်ချုပ်အနေနဲ့ စားတာလဲများတော့ ဖြုတ်တာလဲဖြစ်နိုင်တယ်၊ ရှေ့မှာက လူရင်းတွေတောင် ဖြုတ်ထုတ်ချနေသေးတာ လို့ အထက်မြန်မာနိုင်ငံ နိုင်ငံရေးအကျဉ်းသားများကွန်ရက်က နိုင်ကျဉ်းတစ်ဦးကပြောပါတယ်။
ယခုခန့်လိုက်တဲ့ ရှမ်းပြည်နယ်ဝန်ကြီးချုပ်သစ် ဦးအောင်အောင်ဟာ DSA ကျောင်းအုပ်၊ တပ်မ ၃၃ တပ်မမှူး၊ အနောက်ပိုင်းတိုင်း စစ်ဌာနချုပ် ကနေ ကစထ ၂ မှူး၊ အခု ရှမ်းဝန်ကြီးချုပ်တို့ ဖြစ်လာတာလာပါ။
ရခိုင်မှာ တပ်မမှူးအနေနဲ့တာဝန်ယူစဉ်မှာ လူ့အခွင့်အရေးချိုးဖောက်မှု၊ ရက်စက်ကြမ်းကြုတ်မှုတွေကြောင့် အမေရိကန်က ဘဏ္ဏာရေးထိန်းချုပ်မှုဆိုင်ရာ နာမည်ပျက် စာရင်းသွင်းခံထားရသူ တစ်ဦးဖြစ်သလို ကစထမှူးအနေနဲ့လည်း ကရင်နီပြည်နယ်က စစ်ရာဇဝတ်မှုတွေကို ကျုးလွန်ရာမှာအဓိက တာဝန်ရှိသူ တစ်ဦးလို့ စုံစမ်းသိရှိရပါတယ်။
MK-012
#MeKongNews
#အောင်အောင်
#ဒုဗိုလ်ချုပ်ကြီး
#ရှမ်းဝန်ကြီးချုပ်
#ကထစ
#အစားထိုး
