မဲခေါင်၊ မတ် ၈
ရှမ်းပြည်အရှေ့ပိုင်းမြို့တွေဖြစ်တဲ့ ကျိုင်းတုံ၊ တာချီလိတ်၊ မိုင်းဆတ်၊ မိုင်းတုံမြို့နယ်တွေမှာ မီးခိုးငွေ့တွေကြောင့် လေထုညစ်ညမ်းမှု အနီရောင်အဆင့် အန္တရာယ်အမှတ်ရောက်နေတယ်လို့ သိရပါတယ်။
အဲဒီမြို့တွေမှာရှိတဲ့ လေထုအရည်အသွေးဟာ ကျန်းမာရေးနဲ့မညီညွတ်တဲ့အဆင့် အနီရောင်အဆင့်ကို ပြီးခဲ့တဲ့ ဖေဖော်ဝါရီ ၂၄ ရက်နေ့ကတည်းက ရောက်ရှိခဲ့တာမှာ ယခုအခါ ပိုမိုမြင့်မားလာတယ်လို့ တာချီလိတ်ခရိုင် ပတ်ဝန်းကျင်ထိန်းသိမ်းရေးဌာနရဲ့ လေထုအရည်အသွေးတိုင်းစက်နဲ့ တိုင်းတာချက်အရ သိရပါတယ်။
လေထုအရည်အသွေးတိုင်းတာစက်အရ Air Quality Index 151-200 အတွင်း အနီရောင်သတ်မှတ်တာဖြစ်ပြီး အဲဒီအနီရောင်အဆင့်မှာ ကြည်ရှည်စွာရှိနေပါက အသက်ရှူ လမ်းကြောင်းဆိုင်ရာ ရောဂါတွေ ပိုမိုဖြစ်ပွားမှု များပြားစေတယ်လို့သိရပါတယ်။
ထိခိုက်လွယ်အုပ်စုတွေဖြစ်တဲ့ ကလေးသူငယ်နဲ့သက်ကြီးရွယ်အိုတွေ၊ နာတာရှည်ရောဂါရှိသူတွေ ပန်းနာရင်ကြပ်၊ နှလုံးရောဂ်သည်တွေဟာ လေထုညစ်ညမ်းမှုဒဏ်ကို ပိုမိုထိခိုက်ခံစားရမှာ ဖြစ်တယ်လို့သိရပါတယ်။
မီးခိုးမြူငွေ့တွေဖြစ်ပေါ်ရတာဟာ တောမီးလောင်ခြင်း၊ ရွှေ့ပြောင်းတောင်ယာခုတ်ထွင် ရှင်းလင်းခြင်းတို့ကြောင့် အဓိကဖြစ်ပြီး သဘာဝအရလောင်ကျွမ်းတာ၊ မိုးကြိုးပစ်တာ၊ သစ်ပင်အချင်းချင်းပွတ်တိုက်ရာက မီးစမီးပွားဖြစ်တာ၊ မီးတောင်ပေါက်ကွဲတာတွေကြောင့်လည်း ဖြစ်တယ်လို့သိရပါတယ်။
အလားတူ ရှမ်းပြည်နယ်အရှေ့ပိုင်းတာချီလိတ်၊ မိုင်းဆတ်၊ မိုင်းတုံမြို့နယ်တွေနဲ့ မိုင်ပေါင်း ၁၅၀ ကျော် ထိစပ်နေတဲ့ ထိုင်းနိုင်ငံ မြောက်ပိုင်းက ချင်းမိုင်မြို့ဟာ လေထုညစ်ညမ်းမှုဟာ IQ AIR ညွှန်းကိန်းတွေအရ ဒေလီနဲ့လာဟိုးမြို့တွေကို ကျော်လွန်ပြီး ကမ္ဘာပေါ်မှာ လေထုအညစ်ညမ်းဆုံးမြို့ အဖြစ် ရောက်ရှိလာတယ် လို့မတ်လ ၇ ရက်က Bankok Post မှာ ဖော်ပြထားတယ်လို့သိရပါတယ်။
ဘူမိအချက်အလက်နဲ့အာကာသနည်းပညာဖွံ့ဖြိုးရေးအေဂျင်စီ(Gistda) ချင်းရိုင်၊ တပ်ခ်၊ မယ်ဟောင်ဆောင်၊ လမ်ဖွန်၊ ဖရာအို၊ နန်၊ လန်ပန်း၊ စတဲ့ ခရိုင် ၂၇ ခုမှာ လေထုထဲအမှုန်အမွှားပါဝင်မှု PM2.5 ထက်ကျော်လွန်ပြီး PM128.8 အထိ အမြင့်ဆုံးအန္တရာယ်အဆင့် ရောက်ရှိနေတယ်လို့ ဖော်ပြထားပါတယ်။
`အပြင်သွားရင် မတ် တပ်မှ၊ နောက်မို့ဆို နှာခေါင်းဝမှာ မဲနေတာပဲ၊ မျက်စိတွေလဲစပ်၊ အသက်ရှုလဲမ၀ နဲ့ နှစ်တိုင်းဖြစ်နေတာပေမယ့်ခုက အစောကြီး ဖြစ်နေတာ”လို့ မိုင်းဆတ်ဒေသခံ တစ်ဦးက မဲခေါင်ကို ပြောပါတယ်။
တာချီလိတ်နဲ့ထိစပ်နေတဲ့ ထိုင်းနိုင်ငံ မယ်ဆိုင်မြို့မှာနေသူ တစ်ဦးကတော့ မယ်ဆိုင်ဘက်မှာ မိုးတုရွာဖို့ ဒေသအုပ်ချုပ်မှုပိုင်းကလုပ်နေသလို ရေတွေလည်း ဖြန်းနေတယ်လို့ ပြောပါတယ်။
ကမ္ဘာတစ်ဝန်း လေထုညစ်ညမ်းမှုကြောင့် အသက်ရှုလမ်းကြောင်းဆိုင်ရာရောဂါတွေနဲ့ နှစ်စဉ် လူ ၂ သန်းကျော် ဆေးရုံတက်နေရတယ်လို့ WHO က ထုတ်ပြန်ထားပါတယ်။
MK-012