မဲခေါင်၊ မေ ၁
မြန်မာနဲ့ ဘင်္ဂလားနယ်စပ်နားမှာဖြစ်ပေါ်နေတဲ့ မုန်တိုင်းငယ်တစ်ခုဟာ ချင်းပြည်နယ်ဘက်ကနေ ရှမ်းပြည်နယ်မြောက်ပိုင်းထိ ဝင်လာနိုင်ပြီး နိုင်ငံအနှံ့မိုးရွာသွန်းနိုင်တယ်လို့ မိုးလေဝသလေ့လာသုံးသပ်သူ ကိုဝင်းနိုင်က မဲခေါင်သတင်းဌာနကိုပြောပါတယ်။
ဒီကနေ့ မနက် ၆ နာခွဲမှာရတဲ့ အချက်အလက်တွေအရ အခြေခံတွက်ချက်ပြီး ဒီမုန်တိုင်းငယ်ဟာ ချင်းပြည်နယ်ကနေ ရှမ်းပြည်နယ် မြောက်ပိုင်းအထိ ဝင်လာနိုင်တယ်လို့ ကိုဝင်းနိုင်က ခန့်မှန်းထားပါတယ်။
“ကျွန်တော်တို့ ဒီကနေ့ မနက် ၆ နာရီခွဲမှာ ရတဲ့ ဒေတာတွေအရ မြန်မာပြည် နဲ့ ဘင်္ဂလားဒေ့ရှ် နယ်စပ်နားမှာ ဖြစ်ပေါ်နေတဲ့ မုန်တိုင်းငယ်က ချင်းပြည်နယ်၊ မကွေးတိုင်း၊ စစ်ကိုင်းနဲ့မန္တလေးကို ဖြတ်ပြီး ရှမ်းပြည်နယ် မြောက်ပိုင်းအထိရောက်မယ်။ အဲ့ရောက်မှ မုန်တိုင်းက အားပျော့သွားမယ်ပေါ့လေ။တကယ်လို့ မုန်တိုင်းက ဘင်္ဂလား ပင်လယ်အော်ထဲမှာ တောင်ဘက်ကနေ မြောက်ဘက်ကို ရိုးရိုးပဲသွားမယ်ဆိုရင်တောင် မုန်တိုင်းရဲ့ ညာဘက်မှာ ရှိလို့ တစ်နိုင်ငံလုံးအတိုင်းအတာနဲ့ မိုးကတော့ အနှံ့အပြားရွာမယ်။” လို့ သူကပြောပါတယ်။
လက်ရှိတော့ မုန်တိုင်းရဲ့ အခြေအနေကို ဆက်လက်စောင့်ကြည့်နေပြီး မနက်က တွက်ချက်ထားတဲ့ လမ်းကြောင်းအတိုင်းသာ မုန်တိုင်းက ဝင်လာရင် ရှမ်းပြည်နယ်မြောက်ပိုင်းအထိ ရောက်မယ်လို့ ကိုဝင်းနိုင်က ခန့်မှန်းထားပါတယ်။
MK-007
#MeKongNews
#ရှမ်းမြောက်မုန်တိုင်း