မဲခေါင်၊ သြဂုတ် ၂၁
ရှမ်းပြည်နယ် တောင်ပိုင်းက ထွက်ရှိတဲ့ ဂေါ်ဖီထုပ် ဈေးတွေ ထိုးကျလာတာကြောင့် တောင်သူတွေ အနေနဲ့ ခြံပြတ် လှူဒါန်းနေကြတယ်လို့ ဒေသခံတွေက ပြောပါတယ်။
အရင်က ရှမ်းတောင် ဂေါ်ဖီထုပ် တစ်ထုပ်ကို ၅၀၀ ကျပ်ကနေ ၁,၀၀၀ ကျပ်ကြား ဈေးရရှိခဲ့ပေမယ့် ဩဂုတ်လ အစပိုင်းက စပြီး ပဲခူး-မြဝတီမြို့ ကားလမ်း ရေကြီးမှုကြောင့် ၂၀၀ ကျပ်အထိ ကျဆင်းက လက်ရှိ ၁၅၀ ကျပ်အထိ ကျဆင်းလာတာကြောင့် ခြံပိုင်ရှင်တွေ အနေနဲ့ အခုလို ခြံပြတ် လှူဒါန်းဖို့ စီစဉ်လာတာလို့ တီကျစ်မြို့နေ တောင်သူ တစ်ဦးက ပြောပါတယ်။
“စိုက်ပျိုး စရိတ်နဲ့ အလုပ်သမား ပေးရတာနဲ့က မကိုက်တော့ဘူး။ ကျနော်ကတော့ တစ်ခေါက် လှူပြီးပြီ။ ပရဟိတကျောင်းကို လှူလိုက်တာ။ ကား ၂ စီးနဲ့ အပြည့် လာတင်သွားတယ်။ နောက်လည်း လိုချင်ရင် ပြောလို့ရတယ်။ ကျနော်တို့ ပစ်ထားတာ ကြာပြီ” လို့ သူကပြောပါတယ်။
လက်ရှိ တချို့ ပွဲရုံတွေက ၁၅၀ ကျပ်ပင် ဈေးမပေးတော့တာကြောင့် တောင်သူတွေ အနေနဲ့ ဂေါ်ဖီခုတ်ခ၊ သယ်ယူပို့ဆောင်ရေး စရိတ်ပင် ပြန်မရတာကြောင့် အခုလို ခြံပြတ် လှူဒါန်းဖို့ စီစဉ်ရတာလို့ သူက ဆက်ပြောပါတယ်။
ပင်းတယမြို့နေ တောင်သူ တစ်ဦးက “ဝယ်လက် ရှိရင် ရောင်းတယ်။ အဲတာကလည်း ဈေးဖိုးလောက်ပဲ ပြန်ရတာ။ လိုချင်တဲ့သူ ရှိရင် ပေးလိုက်တယ်။ ကိုယ်မှ မပြုစုနိုင်တော့တာ” လို့ ပြောပါတယ်။
အခုနှစ်ထဲမှာ မြေဩဇာနဲ့ ပိုးသတ်ဆေး ၃ ဆနီးပါး ဈေးတက်ထားလို့ ဂေါ်ဖီထုပ်တွေ အခုလို ဈေးကျတာဟာ တောင်သူတွေ အတွက် များစွာ ဆုံးရှုံးနစ်နာ စေတယ်လို့ ဆိုပါတယ်။
ဂေါ်ဖီထုတ်ကို ရှမ်းပြည်နယ် တောင်ပိုင်း နောင်တရား၊ တီကျစ်၊ အောင်ပန်း၊ ရွာငံ၊ ပင်းတယ စတဲ့ မြို့တွေမှာ အဓိက စိုက်ပျိုးကြတယ်လို့ သိရပါတယ်။
CJ-007
#MeKongNews
#ပင်းတယမြို့
#ဂေါ်ဖီထုတ်
#တီကျစ်မြို့