မဲခေါင်၊ ဧပြီ ၃
ရှမ်းတောင်မှာ NK 625 ပြောင်းမျိုးစေ့ကို မသမာသူတွေက အတုပြုလုပ်ပြီး ကားနဲ့ နယ်တွေမှာ လိုက်လံ ရောင်းချနေလို့ စိုက်ပျိုး တောင်သူတွေ သတိပြုကြဖို့ NK 625 ပြောင်းမျိုးစေ့ ဖြန့်ဖြူး ရောင်းချနေတဲ့ ဧရာဝတီမျိုးစေ့ ကုမ္ပဏီ ရှမ်းတောင် တာဝန်ရှိသူက ပြောပါတယ်။
အတုရောင်းချသူတွေဟာ ကားတွေနဲ့ ကျေးရွာတွေအထိ ဘောက်ချာ အတုတွေနဲ့ ရောင်းချနေလို့ အရေးယူမယ်လို့ ကုမ္ပဏီရဲ့ ရှမ်းတောင် တာဝန်ခံက ဦးနိုင်ကိုဝင်း ကပြောပါတယ်။
“အတုတွေက စာမတတ်တဲ့ ကောင်တွေက လုပ်ထားတဲ့ဖြစ်တဲ့ အတွက် သေချာကြည့်ရင် ကဒ်ဖာပေါ်မှာကို စာလုံးပေါင်းတွေ မှားတာတွေ အများကြီးပါ။ အတုအိတ်ပေါ်မှာ အပေါက်တွေလည်း ဖောက်ထားပါတယ်။ စတစ်ကာတွေကလည်း အရမ်းညံ့ပါတယ်။ ကွာတောင်ကွာနေပြီ။ သေချာချင်ရင်တော့ ဝယ်တဲ့အခါမှာ ဘောင်ချာ ရအောင် တောင်းပါ။ မသင်္ကာရင် ဆိုင်တွေကနေ တစ်ဆင့် ကုမ္ပဏီဝန်ထမ်းကို ရအောင်ဆက်သွယ်ပါ။ ကားနဲ့လိုက်ရောင်းတဲ့ သူတွေဆီမှာ မဝယ်မိပါစေနဲ့” လို့ သူကပြောပါတယ်။
ပြောင်းမျိုးစေ့ အတုက မတ်လ အတွင်းမှာ ပေါ်လာတာဖြစ်ပြီး အတုတွေ ဆက်မပြန့်အောင် တောင်သူတွေဆီ ကွင်းဆင်းပြီး လိုက်လံ သတိပေးနေတယ်လို့လည်း သူကပြောပါတယ်။
အဲ့ဒါအပြင် အတုပေါ်လာတာနဲ့ ပတ်သက်ပြီး လက်ရှိ စုံစမ်စစ်ဆေးနေကာ ဌာနဆိုင်ရာနဲ့ တိုင်ပင် အရေးယူသွားမယ်လို့ သူကဆိုပါတယ်။
မျိုးစေ့ထုပ်အတုဟာ ပြောင်းဖူး အရောင်မှိန်ခြင်း၊ Havesting Date မှာ 02:23 ဖြစ်ခြင်း၊ Testing Date မှာ 17/3/2023 ဖြစ်နေခြင်း အပြင် Expiry Date မှာလည်း 20.08.24 ဖြစ်ပြီး မှားယွင်းနေတယ်လို့ ကုမ္ပဏီတာဝန်ရှိသူက ပြောပါတယ်။
မျိုးစေ့ထုပ် အစစ်မှာက ပြောင်းဖူးအရောင်ပိုထင်ခြင်း၊ Havesting Dateမှာ 03:22 ဖြစ်ခြင်း၊ Testing Dateမှာ 19-10-22 ဖြစ်ခြင်း အပြင် Expiry Date မှာလည်း အတုထုပ်တွေနဲ့ မတူဘူးလို့ သူကပြောပါတယ်။
စစ်အာဏာသိမ်းပြီးနောက် ရှမ်းပြည်နယ် တောင်ပိုင်းမှာ မျိုးစေ့အတုတွေ မြေဩဇာအတုတွေ ရောင်းချနေလို့ ဝယ်ယူ အသုံးပြုမိတဲ့ တောင်သူတွေက ဆုံးရှုံးမှုတွေ ကြုံနေရပါတယ်။
“တောင်သူတွေ အများစုကလည်း အတု အစစ် သိပ်မခွဲတတ်ကြတော့ မျိုးစေ့ မြေဩဇာ တစ်မျိုးမျိုးက နာမည်ကောင်းရပြီဆို မကြာဘူး အတုတွေပေါ်ပြီ။ အရင်နှစ်လည်း အဲ့လိုတွေ ပေါ်သေးတယ်လေ” လို့ ဟိုပုံးမြို့နယ်မှ တောင်သူ ခွန်တကျော် က ပြောပါတယ်။
ရှမ်းတောင်က တောင်သူအများစုဟာ ပြောင်းကို အဓိက စိုက်ပျိုးကြတာဖြစ်တဲ့ အတွက် တောင်သူ အကျိုးမယုတ်ဖို့ မျိုးစေ့တု ပြဿနာကို အမြန်ဆုံး ဖြေရှင်းနိုင်ဖို့ မျှော်လင့်တယ်လို့လည်း သူကပြောပါတယ်။
NK625 ပြောင်းမျိုးစေ့ထုပ် အစစ် အတုကို ပုံပါအတိုင်းလည်း ခွဲခြားနိုင်ပါတယ်။
CJ-2
