မဲခေါင်၊ မတ် ၁၁
စစ်ကိုင်းတိုင်း၊ ရွှေဘိုအကျဥ်းထောင်မှာရှိတဲ့ နိုင်ငံရေးအကျဥ်းသား ၅ ဦးက ထောင်တွင်းကျန်းမာရေး စောင့်ရှောက်မှုနည်းပါးမှုတွေကြောင့် အောက်ပိုင်းချိနဲ့ဝေဒနာတွေခံစားနေရတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများ ကွန်ရက်က မတ်လ ၁၁ ရက်နေ့က ထုတ်ပြန်ထားပါတယ်။
အကျဥ်းထောင်တွေထဲက ထမင်းဟင်းတွေဟာ ဗီတာမင်ဓာတ်တွေပါဝင်မှုနည်းပါးတာ၊ အကျဥ်းသားအများအပြား စုဝေးနေထိုင်ရတာ၊ အခန်းကျဥ်းထဲ အချိန်ကြာကြာနေထိုင်ရတာ၊ လှုပ်ရှားမှုပြုလုပ်နိုင်တဲ့ ဧရိယာကျဥ်းမြောင်းတာ၊ ကျန်းမာရေးစောင့်ရှောက်မှုမရှိတာ တွေကြောင့် ခန္ဓာကိုယ်အောက်ပိုင်း ချိနဲ့တဲ့ ဝေဒနါတွေ ခံစားနေရတာဖြစ်တယ်လို့ သိရပါတယ်။
အဆိုပါရောဂါလက္ခဏာကို အကျဥ်းထောင်အခေါ်အဝေါ်အနေနဲ့ တုတ်ဆွဲတာလို့ခေါ်ဝေါ်ပြီး ရွှေဘိုအကျဥ်းထောင်ထဲမှာ တလကို အကျဥ်းသား ၂ ဦးကနေ ၅ ဦးအထိ တုတ်ဆွဲတဲ့ရောဂါဝေဒနာကို ခံစားနေရတယ်လို့ဆိုပါတယ်။
“ လက်ရှိမှာ အကျဥ်းထောင်က ပြည့်ဝတဲ့စသောက်နေထိုင်မှု မဖန်တီးပေးနိုင်တဲ့အတွက် အရွယ်ငယ်တဲ့အကျဥ်းသားတွေတောင် လမ်းလျှောက်ဖို့ခက်ခဲတာတွေဖြစ်နေတယ်။ ကျွေးတဲ့အစားအသောက်တွေက ထောင်က အသားကျွေးရမယ့်အချိန်မှာ လည်ပင်းရိုးလောက်ပဲကျွေးတာမျိုးတွေကြောင့် ကိုယ်ခံအားတွေလျော့နည်းလာတယ်” လို့ နိုင်ငံရေးအကျဥ်းသားများ ကွန်ရက် တာဝန်ရှိသူတစ်ဦး က ပြောပါတယ်။
ရောဂါလက္ခဏာအနေနဲ့ ညောင်းညာကိုက်ခဲတာ၊ လမ်းမလျှောက်နိုင်တာ၊ အပေါ့အပါးသွားလာရခက်ခဲတာ၊ ခန္ဓာကိုယ်အောက်ပိုင်း လေဖြတ်သလိုခံစားရတာ၊ ထော့နင်းထော့နင်းဖြစ်တာတွေအပြင် စိတ်ကျရောဂါဝေဒနာတွေအထိ ခံစားရတယ်လို့ သိရပါတယ်။
မြန်မာနိုင်ငံအနှံ့အပြားမှာရှိတဲ့ အကျဥ်းထောင်တွေဟာ စစ်ကောင်စီတပ် အာဏာသိမ်းပြီးချိန်ကစပြီး မတရား ဖမ်းဆီးထားတဲ့ အကျဥ်းသား လူဦးရေအဆမတန်များပြားလာတာကြောင့် တုတ်ဆွဲရောဂါတွေ ဖြစ်ပွားမှုနှုန်းတိုးမြင့်လာတယ်လို့ သိရပါတယ်။
စစ်တပ်က အာဏာသိမ်းပြီးတဲ့နောက်ပိုင်း အကျဥ်းထောင်အသီးသီးမှာ ဖမ်းဆီးခံထားရတဲ့ နိုင်ငံရေးအကျဥ်းသားပေါင်း ၂၆၀၀၀ ကျော်အထိရှိနေတယ်လို့ နိုင်ငံရေးအကျဥ်းသားများ ကူညီထောက်ပံ့ရေးအဖွဲ့ AAPP က မတ်လ ၈ ရက်နေ့က ထုတ်ပြန်ထားပါတယ်။
CJ-004