မဲခေါင်၊ နိုဝင်ဘာ ၂၅
မွန်ပြည်နယ်၊ ရေးမြို့နယ်ထဲမှာ ပထမဆုံး အကြိမ် အနေနဲ့ ရဲတပ်ကြပ် တစ်ဦး လက်နက်အပ် ခိုလှုံလာတယ်လို့ ရေးပြောက်ကျားတပ်ဖွဲ့က ဒီကနေ့ နိုဝင်ဘာ ၂၅ ရက်မှာ ကြေညာပါတယ်။
ရေးမြို့နယ်၊ ခေါဇာမြို့နယ်ခွဲ ရဲစခန်းက ရဲတပ်ကြပ်ဟာ G-3 တစ်လက်၊ ကျည်ဘောက် ၂ ခု၊ ကျည်တောင့် ၁၀၀ နဲ့အတူ ဒီနေ့ နိုဝင်ဘာလ ၂၅ ရက်မှာ YGF-ရေးပြောက်ကျားတပ်ထံ လက်နက်အပ် အလင်းဝင်လာတယ်လို့ ဆိုပါတယ်။
စစ်ကောင်စီဟာ ပြည်သူတွေကို အကြောင်းမဲ့ သတ်ဖြတ်တာ၊ ပြည်သူတွေရဲ့ အိုးအိမ်၊ စည်းစိမ်တွေကို မီးရှို့ဖျက်ဆီး၊ လုယက်တာ၊ မတရားသိမ်းဆည်း ခိုးယူတာ၊ အာဏာရှင် တစုနဲ့ အာဏာရှင်စနစ် အတွက် ကျွန်သဖွယ် လုပ်ကိုင်ရတာတွေကို မနှစ်မြို့တာကြောင့် အမြင်မှန်ရပြီး ခိုလှုံလာတာလို့ YGF က ပြောပါတယ်။
အခုလို အမှားအမှန် ခွဲခြားသိပြီး အချိန်မီ ပြည်သူ့ရဲအဖြစ် ရေးမြို့နယ်မှာ ပထမဦးဆုံး ခိုလှုံလာသူဖြစ်လို့ ရေးပြောက်ကျားတပ်က ဂုဏ်ယူဝမ်းမြောက်စွာနဲ့ နွေးထွေးစွာ ကြိုဆိုတယ်လို့ ဆိုပါတယ်။
ရေးပြောက်ကျားတပ် အနေနဲ့ မွန်ပြည်နယ် အခြေစိုက် တော်လှန်ရေး အင်အားစုတွေ အားလုံး ကိုယ်စား အမြင်မှန်ရကာ အလင်းဝင်လာမယ့် စစ်ကောင်စီတပ်သား၊ ရဲသား၊ ပြည်သူ့စစ်၊ Non-CDM တွေကို လှိုက်လှိုက်လှဲလှဲ နွေးထွေးစွာ ကြိုဆိုမယ့်အပြင် လုံခြုံရေး အပြည့်အဝ တာဝန်ယူပေးမယ်လို့ ထုတ်ပြန်ချက်မှာ ဖော်ပြထားပါတယ်။
MK-009
#MeKongNews
#ရေးမြို့နယ်
#ရဲတပ်ကြပ်
#အလင်း၀င်
